Rohit Sharma need 3 sixes Break World Record As India Take On South Africa In 1st ODI
Rohit Sharma : భారత్, ద‌క్షిణాఫ్రికా జ‌ట్ల మ‌ధ్య రాంచి వేదిక‌గా నేడు (ఆదివారం న‌వంబ‌ర్ 30) తొలి వ‌న్డే మ్యాచ్ జ‌ర‌గ‌నుంది. ఈ మ్యాచ్‌కు ముందు టీమ్ఇండియా స్టార్ ఆట‌గాడు రోహిత్ శర్మ(Rohit Sharma)ను ఓ అరుదైన ఘ‌న‌త ఊరిస్తోంది. ఈ మ్యాచ్‌లో గ‌నుగ రోహిత్ శర్మ మూడు సిక్స‌ర్లు బాదితే.. వ‌న్డేల్లో అత్య‌ధిక సిక్స‌ర్లు కొట్టిన బ్యాట‌ర్‌గా హిట్‌మ్యాన్ చ‌రిత్ర సృష్టిస్తాడు.
రోహిత్ శర్మ 276 వ‌న్డే మ్యాచ్‌లు ఆడాడు. 268 ఇన్నింగ్స్‌ల్లో 49.22 స‌గ‌టుతో 11370 ప‌రుగులు సాధించాడు. ఇందులో 33 సెంచ‌రీలు, 59 అర్థ‌శ‌త‌కాలు ఉన్నాయి. ఇప్ప‌టి వ‌ర‌కు హిట్‌మ్యాన్ 349 సిక్స‌ర్లు బాదాడు. ప్ర‌స్తుతం వ‌న్డేల్లో అత్య‌ధిక సిక్స‌ర్లు కొట్టిన ఆట‌గాడి రికార్డు షాహిద్ అఫ్రిది పేరిట ఉంది. అఫ్రిది 398 మ్యాచ్‌ల్లో 351 సిక్స‌ర్లు కొట్టాడు. వీరిద్ద‌రి త‌రువాత ఈ జాబితాలో క్రిస్‌గేల్‌, జయసూర్య, ధోని ఉన్నారు.
వ‌న్డేల్లో అత్య‌ధిక సిక్స‌ర్లు కొట్టిన ఆట‌గాళ్లు వీరే..
* షాహిద్ అఫ్రిది (పాకిస్తాన్‌) – 351 సిక్స‌ర్లు
* రోహిత్ శర్మ (భారత్) – 349* సిక్స‌ర్లు
* క్రిస్‌గేల్‌ (వెస్టిండీస్‌) – 331 సిక్స‌ర్లు
* సనత్‌ జయసూర్య (శ్రీలంక) – 270 సిక్స‌ర్లు
* ఎంఎస్‌ ధోని (భారత్) – 229 సిక్స‌ర్లు
టెస్టులు, టీ20ల‌కు రిటైర్‌మెంట్ ప్ర‌క‌టించిన రోహిత్ శర్మ ప్ర‌స్తుతం వ‌న్డేల్లో మాత్ర‌మే కొన‌సాగుతున్నాడు. 2027 వ‌న్డే ప్ర‌పంచ‌క‌ప్‌లో ఆడ‌డ‌మే ల‌క్ష్యంగా అత‌డు ముందుకు సాగుతున్నాడు. ఈ క్ర‌మంలోనే బ‌రువు త‌గ్గి త‌న ఫిట్‌నెస్ ను ఎంతో మెరుగుప‌ర‌చుకున్నాడు. ఇటీవ‌ల జ‌రిగిన ఆసీస్‌తో వ‌న్డే సిరీస్‌లో అద్భుతంగా రాణించాడు. అదే ఊపును ద‌క్షిణాఫ్రికా సిరీస్‌లోనూ కొన‌సాగించాల‌ని కోరుకుంటున్నాడు.
