Telangana Police: తెలంగాణ పోలీసు శాఖలో కీలక మార్పులు.. కొత్తగా 112 మంది డీఎస్పీలు.. కోర్టు కేసులు వెనక్కి, వివాదానికి ముగింపు

112 DSPs to be newly introduced in Telangana

Telangana Police: తెలంగాణ రాష్ట్ర పోలీసు యంత్రాంగంలో త్వరలోనే భారీ స్థాయి మార్పులు చోటుచేసుకోనున్నాయి. పోలీస్ అకాడమీలో కొత్తగా శిక్షణ పూర్తిచేసుకున్న 112 మంది డీఎస్పీలు ప్రొబేషనరీలుగా బాధ్యతలు స్వీకరించడానికి సిద్ధమవుతున్నారు. గ్రేహౌండ్స్ వంటి వివిధ విభాగాల్లో అంతర్గత క్షేత్రస్థాయి శిక్షణ పూర్తయిన అనంతరం వీరు సేవల్లోకి రానున్నారు. చాలాకాలంగా నేరుగా డీఎస్పీల భర్తీ జరగకపోవడంతో సిబ్బంది కొరతతో ఉన్న విభాగానికి ఈ కొత్త అధికారుల రాకతో పెద్ద ఊరట లభించనుంది. కొత్తగా ఏర్పాటైన ఈగల్, సైబర్ సెక్యూరిటీ బ్యూరో, హైడ్రా వంటి కీలక విభాగాలకు వీరి సేవలు ఎంతో ప్రయోజనకరంగా మారనున్నాయి.

Indian Railways: రైల్వే టికెట్ బుకింగ్స్‌లో కీలక మార్పులు.. దీపావళికి ముందే ప్రయాణికులకు గుడ్‌న్యూస్!

నలుగుతున్న పదోన్నతుల వివాదం.. డీజీపీ సీవీ ఆనంద్ చొరవతో పరిష్కారం:

మరోవైపు 1995, 1996 బ్యాచ్‌లకు చెందిన డీఎస్పీల(Telangana Police) పదోన్నతుల వివాదం ఎట్టకేలకు పరిష్కారం దిశగా కదులుతోంది. గతంలో ఒకేసారి 140 మందికి సూపర్‌న్యూమరరీ పోస్టుల ద్వారా పదోన్నతులు ఇవ్వడంతో ఈ సమస్య మొదలై, కోర్టు కేసుల వరకు వెళ్లి నిలిచిపోయింది. దీనిపై ఇటీవల డీజీపీ సీవీ ఆనంద్ ఇరు బ్యాచ్‌ల అధికారులతో ప్రత్యేక సమావేశం నిర్వహించి మాట్లాడారు. కోర్టు కేసులు ఉపసంహరించుకుంటే అందరికీ న్యాయం చేస్తానని ఇచ్చిన హామీతో చాలామంది అధికారులు తమ కేసులను వెనక్కి తీసుకునేందుకు ముందుకు వచ్చారు.

అదనపు ఎస్పీల భర్తీకి కసరత్తు.. పర్యవేక్షణ మరింత సమర్థవంతం:

ప్రస్తుతం పోలీసు శాఖలో 37 అదనపు ఎస్పీ పోస్టులు ఖాళీగా ఉన్నాయి. పదోన్నతుల వివాదం సద్దుమణుగుతుండటంతో ఈ ఖాళీల భర్తీకి అధికారులు సన్నాహాలు ప్రారంభించారు. డీఎస్పీలకు అదనపు ఎస్పీలుగా పదోన్నతి కల్పిస్తే, అంతే సంఖ్యలో డీఎస్పీ పోస్టులు ఖాళీ అయి కింది స్థాయి అధికారులకు కూడా పదోన్నతులు లభిస్తాయి. ఈ క్రమబద్ధమైన ప్రక్రియ వల్ల నాన్‌క్యాడర్ ఎస్పీల వరకు ఖాళీలు భర్తీ కావడమే కాకుండా, పోలీసు యంత్రాంగంలో శాంతిభద్రతల పర్యవేక్షణ మరింత మెరుగ్గా, సమర్థవంతంగా తయారవుతుందని అధికారులు భావిస్తున్నారు.