Hyderabad Metro
Hyderabad Metro : మెట్రో ప్రయాణికులకు గుడ్‌న్యూస్. హైదరాబాద్ మెట్రో రైల్ యాజమాన్యం కీలక నిర్ణయం తీసుకుంది. ప్రయాణికుల ఇబ్బందులను తొలగించేందుకు టక్కీట్ అనే సంస్థతో కలిసి పనిచేయనుంది. దీంతో ఇకనుంచి ప్రయాణికులు ఎదుర్కొంటున్న ఇబ్బందులు తొలిగిపోనున్నాయి. అయితే, తొలి విడత కేవలం ఏడు స్టేషన్లలో ఈ సదుపాయాలు అమల్లోకి రానున్నాయి. పూర్తి వివరాల్లోకి వెళితే..
మెట్రోలో ప్రయాణించే సమయంలో చేతిలో హెల్మెంట్, భుజాన బ్యాగులు, ఇతర షాపింగ్ సంచులు మోయడం ప్రయాణికులకు పెద్ద తలనొప్పిగా ఉంటుంది. అయితే, ఇక నుంచి ప్రయాణికులకు ఆ ఇబ్బంది ఉండదు. ఇకపై ప్రయాణికులు తమ సామానులను మెట్రో స్టేషన్లలోనే సురక్షితంగా దాచుకొని, హ్యాండ్స్ ఫ్రీగా సిటీలో చక్కర్లు కొట్టేయొచ్చు. ఈ మేరకు మెట్రో యాజమాన్యం స్మార్ట్ లాకర్లను అందుబాటులోకి తెచ్చింది.
ఈ స్మార్ట్ లాకర్ల వాడకం చాలా సులభమని టక్కీట్ సంస్థ నిర్వాహకులు తెలిపారు. కేవలం 30 సెకన్లలోనే ప్రాసెస్ పూర్తవుతుందని చెప్పారు. లాకర్ ప్యానెల్ మీద ఉన్న క్యూఆర్ కోడ్‌ను స్కాన్ చేయాలి.. సామాను సైజును బట్టి లాకర్ పరిమాణాన్ని ఎంచుకోవాలి. ఎంతసేపు దాచుకుంటున్నారో టైం సెలెక్ట్ చేసుకొని డిజిటల్ పేమెంట్ చేయాల్సి ఉంటుంది.
హైదరాబాద్ మెట్రో రైలు యాజమాన్యం టక్కీట్ అనే సంస్థతో జత కట్టబోతుంది. తద్వారా ప్రయాణికులు తమ సామాన్లను మెట్రో స్టేషన్లలో భద్రపర్చుకోవచ్చు. ఉప్పల్ మెట్రో స్టేషన్‌లో ఈ కొత్త సేవలు అందుబాటులోకి వచ్చాయి. ఈ సందర్భంగా ఎల్ అండ్ టీ మెట్రో ఎండీ, సీఈఓ కే.వి.బి. రెడ్డి మాట్లాడుతూ.. ప్రయాణికులకు రోజువారీ ప్రయాణాన్ని మరింత సులభతరం చేయడమే తమ లక్ష్యం అన్నారు. అందులో భాగంగానే ప్రయాణికుల ఇబ్బందులు కలగకుండా హెల్మెంట్ సహా ఇతర వస్తువులను మెట్రో స్టేషన్లలో భద్రపర్చుకొనే సదుపాయాన్ని అందుబాటులోకి తేవడం జరిగిందని చెప్పారు.
రద్దీ ఎక్కువగా ఉండే ఏడు మెట్రో స్టేషన్లలో ఈ స్మార్ట్ లాకర్లను అందుబాటులోకి తెచ్చారు. వీటిలో మియాపూర్, అమీర్ పేట, పంజాగుట్ట, ఎల్బీనగర్, ఉప్పల్, పరేడ్ గ్రౌండ్స్, హైటెక్ సిటీ మెట్రో స్టేషన్లలో ప్రస్తుతం ఈ సేవలు అందుబాటులో ఉన్నాయి.
