TG EAPCET 2026: పదివేలలోపు ర్యాంకుంటే టాప్ కాలేజీల్లో సీటు.. గతేడాది కటాఫ్ వివరాలు ఇవే.. రేపట్నుంచే ఇంజనీరింగ్ కౌన్సెలింగ్

Engineering web options process in Telangana is set to begin tomorrow

• జేఎన్టీయూహెచ్, ఓయూలలో భారీ పోటీ.

• సీఎస్ఈ, ఈసీఈలకే విద్యార్థుల ప్రాధాన్యత.

• గత ఏడాది కటాఫ్‌ల పూర్తి వివరాలు.

TG EAPCET 2026: తెలంగాణలో లక్షలాది మంది విద్యార్థులు ఎంతో ఆత్రుతగా ఎదురుచూస్తున్న ఇంజనీరింగ్ కౌన్సెలింగ్ (TG EAPCET 2026) ప్రక్రియకు సాంకేతిక విద్యా మండలి సర్వం సిద్ధం చేసింది. ఈనెల 19 నుంచి విద్యార్థులు ఆన్‌లైన్ ద్వారా రిజిస్ట్రేషన్లు చేసుకోవచ్చు. రాష్ట్రవ్యాప్తంగా మొత్తం 159 కాలేజీలు ఈ కౌన్సెలింగ్ ప్రక్రియలో పాల్గొంటుండగా, దాదాపు 1.16 లక్షల ఇంజనీరింగ్ సీట్లు అందుబాటులో ఉన్నాయి. ఇందులో 70 శాతం సీట్లను కన్వీనర్ కోటా కింద కౌన్సెలింగ్ ద్వారా భర్తీ చేయనుండగా, మిగిలిన 30 శాతం సీట్లను యాజమాన్య (మేనేజ్‌మెంట్) కోటా కింద కేటాయిస్తారు.

Open Air Party Zone: నెక్లెస్ రోడ్‌లో ‘ఓపెన్ ఎయిర్ పార్టీ జోన్’.. రూ.1.20 కోట్లతో భారీ స్టేజ్.. హెచ్ఎండీఏ సరికొత్త ప్లాన్

వెబ్ ఆప్షన్ల గడువు, కీలక తేదీలు:

కౌన్సెలింగ్ షెడ్యూల్ ప్రకారం జూన్ 25 నుంచి జూలై 1 వరకూ విద్యార్థులు వెబ్ ఆప్షన్లు ఇచ్చుకోవచ్చు. విద్యార్థుల అవగాహన కోసం జూలై 4న మాక్ సీట్ల కేటాయింపు ఉంటుంది. ఒకవేళ ఆప్షన్లు మార్చుకోవాలనుకుంటే జూలై 5 నుంచి 7 వరకూ గడువు ఇచ్చారు. చివరగా జూలై 10న తొలి దశ సీట్ల అధికారిక కేటాయింపు జరుగుతుంది. విద్యార్థులు తమకు వచ్చిన ర్యాంకు ఆధారంగా, గత ఏడాది కటాఫ్ మార్కులను ప్రామాణికంగా తీసుకుని కాలేజీలు, బ్రాంచీలను చాలా జాగ్రత్తగా ఎంపిక చేసుకోవాలని అధికారులు సూచిస్తున్నారు. లేనిపక్షంలో టాప్ కాలేజీల కోసం ఎక్కువ ర్యాంకు ఉన్నవారు ఆప్షన్లు ఇస్తే సీటు దక్కక నష్టపోయే ప్రమాదం ఉంది.

కంప్యూటర్ సైన్స్ (CSE) కే జై కొడుతున్న విద్యార్థులు:

ఈ ఏడాది కూడా విద్యార్థుల చూపు ప్రధానంగా కంప్యూటర్ సైన్స్ ఇంజనీరింగ్ (CSE), దాని అనుబంధ ఎమర్జింగ్ కోర్సులపైనే ఉంది. అయితే ఈసారి ఈసీఈ (ECE) గ్రూపులో కూడా చేరికలు పెరుగుతాయని నిపుణులు భావిస్తున్నారు. ఉస్మానియా, జేఎన్టీయూహెచ్ ($JNTUH$) వంటి టాప్ క్యాంపస్‌లలో సీట్ల కోసం విపరీతమైన పోటీ నెలకొంది. యూనివర్సిటీల్లో సీఎస్ఈ లో 2 వేల లోపు, ఈసీఈ లో 5 వేల లోపు ర్యాంకు వచ్చిన వారికి మాత్రమే సీటు దక్కే అవకాశం కనిపిస్తోంది. విద్యార్థులు ఎక్కువగా హైదరాబాద్ పరిసర ప్రాంతాల్లోని కాలేజీలకే మొగ్గు చూపుతుండటంతో ఇతర జిల్లాల్లోని కొత్త కాలేజీలలో 90 వేల ర్యాంకు వరకు కూడా సీట్లు వచ్చే ఛాన్స్ ఉంది.

గత ఏడాది కటాఫ్ ర్యాంకులను పరిశీలిస్తే:

• ఉస్మానియా యూనివర్సిటీ (OU) లో కంప్యూటర్ సైన్స్ (CSE) సీటు బాలురకు 1,221, బాలికలకు 1,600 ర్యాంకు వద్ద ముగియగా, ఈసీఈ (ECE) సీటు బాలురకు 3,144, బాలికలకు 3,638 ర్యాంకు వద్ద లభించింది.
• జేఎన్టీయూహెచ్ (JNTUH) లో సీఎస్ఈ కటాఫ్ బాలురకు 625, బాలికలకు 692 కాగా, ఈసీఈ లో బాలురకు 1,908, బాలికలకు 2,028 గా నమోదైంది.
• సిబిఐటి (CBIT) లో సీఎస్ఈ సీటు బాలురకు 1,201, బాలికలకు 1,591 వద్ద రాగా, ఈసీఈ సీటు బాలురకు 3,474, బాలికలకు 4,227 ర్యాంకు వద్ద క్లోజ్ అయింది.
• విజ్ఞాన జ్యోతి (VNR VJIET) లో సీఎస్ఈ కటాఫ్ బాలురకు 1,535, బాలికలకు 1,884 కాగా, ఈసీఈ లో బాలురకు 4,530, బాలికలకు 5,237 గా ఉంది.
• నారాయణమ్మ కాలేజీ లో గత ఏడాది సీఎస్ఈ సీటు 4,109 ర్యాంకు వద్ద, ఈసీఈ సీటు 8,343 ర్యాంకు వద్ద లభించింది.
• వాసవి కాలేజీ లో సీఎస్ఈ కటాఫ్ బాలురు, బాలికలిద్దరికీ 1,215 గానే ఉండగా, ఈసీఈ లో బాలురకు 4,530, బాలికలకు 5,237 వద్ద సీట్లు కేటాయించారు.
• శ్రీనిధి కాలేజీ లో సీఎస్ఈ సీటు బాలురకు 2,878, బాలికలకు 3,348 వద్ద రాగా, ఈసీఈ లో బాలురకు 4,834, బాలికలకు 8,967 ర్యాంకు కటాఫ్‌గా నిలిచింది.
• మహాత్మా గాంధీ (MGIT) కాలేజీలో సీఎస్ఈ సీటు బాలురకు 9,844, బాలికలకు 10,230 వద్ద లభించగా, ఈసీఈ లో బాలురు, బాలికలిద్దరికీ 14,777 ర్యాంకే కటాఫ్‌గా ఉంది.
• రాష్ట్రంలోని మరికొన్ని ప్రధాన కాలేజీలలో సగటున సీఎస్ఈ సీటు 13,493 ర్యాంకు వద్ద, ఈసీఈ సీటు 22,276 ర్యాంకు వద్ద ముగిశాయి.