CM Chandrababu: ఏపీ బ్రాండ్ దెబ్బతీసే కుట్ర.. అవే అబద్ధాలు, అవే అరాచకాలు.. వైసీపీపై సీఎం చంద్రబాబు సంచలన కామెంట్స్

AP CM Chandrababu sensational comments about YSRCP and YS Jagan

CM Chandrababu: ఆంధ్రప్రదేశ్‌లో ఒకప్పుడు బాహ్య శక్తుల నుంచి వచ్చిన శాంతిభద్రతల సమస్యలు, ఇప్పుడు ప్రధాన ప్రతిపక్షమైన వైకాపా నుంచే ఉత్పన్నమవుతున్నాయని ముఖ్యమంత్రి నారా చంద్రబాబు నాయుడు(CM Chandrababu) ఆరోపించారు. ఉండవల్లిలోని పార్టీ కార్యాలయంలో ఏర్పాటు చేసిన మీడియా సమావేశంలో ఆయన మాట్లాడుతూ, గత 2019-24 మధ్యకాలంలో రాష్ట్రంలో విధ్వంసం పరాకాష్ఠకు చేరిందని ధ్వజమెత్తారు. నేరాలు, రౌడీయిజం చేసేవారిని ప్రజలు ఎప్పటికీ ఆదరించరని స్పష్టం చేసిన సీఎం, అభివృద్ధి, సంక్షేమం మరియు సుపరిపాలనే లక్ష్యంగా తమ కూటమి ప్రభుత్వం ముందుకు సాగుతోందని తేల్చి చెప్పారు.

Goddeti Madhavi: స్థానిక పోరులో సంచలనం.. జెడ్పీటీసీ బరిలో మాజీ ఎంపీ గొడ్డేటి మాధవి నామినేషన్!

స్థానిక సంస్థల ఎన్నికలు, బీసీ రిజర్వేషన్లపై జగన్ కుట్రలు:

స్థానిక సంస్థలకు నిధులు రాకుండా అడ్డుకోవడమే లక్ష్యంగా వైకాపా దాదాపు 59 పిటిషన్లు వేసిందని, బీసీల రిజర్వేషన్లను సైతం అడ్డుకునేందుకు సర్వశక్తులూ ఒడ్డిందని చంద్రబాబు విమర్శించారు. బీసీ హక్కుల రక్షణ కోసం తమ ప్రభుత్వం సుప్రీంకోర్టు వరకు వెళ్లి పోరాడి విజయం సాధించిందని, సాధ్యమైన ప్రతిచోటా బీసీలకు అత్యధిక స్థానాలు కేటాయించామని తెలిపారు. ఫేక్ ప్రచారాలు చేస్తూ, కోర్టులకు తప్పుడు సమాచారాన్ని అందిస్తూ వైకాపా నేతలు క్రిమినల్ లిటిగెంట్లుగా మారారని దుయ్యబట్టారు.

రాష్ట్రవ్యాప్తంగా వైకాపా హింసాకాండ.. ఉదాహరణలతో ఎండగట్టిన సీఎం:

రాష్ట్రంలో వైకాపా సాగిస్తున్న రౌడీయిజం, అరాచకాలపై ప్రజల్లో విస్తృత చర్చ జరగాలని పిలుపునిచ్చారు. పుంగనూరు, రాయచోటి, కనిగిరి, దర్శి, కడప, తిరుపతి వంటి ప్రాంతాల్లో వైకాపా సృష్టించిన హింసాత్మక ఘటనలను ఆయన ఎండగట్టారు. కడపలో వైకాపా ఎంపీ వాహనంతో ఎన్డీయే కార్యకర్తను తొక్కించిన వైనాన్ని తీవ్రంగా నిరసించారు. రాజకీయ ముసుగులో నేరాలకు పాల్పడుతూ, ఏపీ బ్రాండ్‌ను దెబ్బతీసేలా ప్రవర్తించడం ఆ పార్టీ నైజమని మండిపడ్డారు.

“అవే అబద్ధాలు.. అవే అరాచకాలు”.. బుక్‌లెట్ విడుదల చేసిన చంద్రబాబు:

సొంత చెల్లెలు షర్మిల కుమార్తె వివాహ ఆహ్వాన పత్రికలు పంచిన తర్వాత కూడా ఆ పెళ్లికి అడ్డంకులు సృష్టిస్తూ జగన్ ‘కంసమామ’గా మారారని తీవ్ర వ్యాఖ్యలు చేశారు. సొంత చెల్లి పట్ల జగన్ ప్రవర్తిస్తున్న తీరును రాష్ట్ర ప్రజలు గమనించాలని కోరారు. ఈ సందర్భంగా వైకాపా హింసాత్మక ఘటనల ఆధారాలతో కూడిన వీడియోలను ప్రదర్శించడంతో పాటు, ‘‘అదే హింస.. అవే అబద్ధాలు.. అవే అరాచకాలు’’ పేరిట రూపొందించిన ప్రత్యేక బుక్‌లెట్‌ను సీఎం విడుదల చేశారు.