Sada Bainama: సీఎం చంద్రబాబు సమక్షంలో నిన్న క్యాబినెట్ భేటీ జరిగిన సంగతి తెలిసిందే. ఇందులో పలు కీలక నిర్ణయాలు తీసుకున్నారు. పలు అంశాలకు క్యాబినెట్ ఆమోద ముద్ర వేసింది. అందులో సాదా బైనామాల రిజిస్ట్రేషన్ అంశం ఉంది. సాదా బైనామాల క్రమబద్ధీకరణకు గడువును 2027 డిసెంబర్ 31 వరకు పొడిగించింది. ఒప్పంద పత్రాల ద్వారా భూములు కొనుగోలు చేసిన వారికి రిజిస్ట్రేషన్ చేసుకునే అవకాశం కల్పించింది. ఈ ప్రతిపాదనకు క్యాబినెట్ ఆమోద ముద్ర వేసింది. అయితే, ఈ సౌకర్యం కేవలం గ్రామీణ ప్రాంతాల్లోని వ్యవసాయ భూములకు మాత్రమే వర్తిస్తుంది.
భూమిని అమ్మే వ్యక్తి తప్పనిసరిగా చిన్న లేదా సన్నకారు రైతు అయి ఉండాలి. ఈ క్రమబద్ధీకరణ ప్రక్రియలో భాగంగా, అర్హులైన రైతులకు కొన్ని రాయితీలు కూడా లభిస్తాయి. బదిలీ సుంకం, రిజిస్ట్రేషన్ రుసుములు, స్టాంప్ డ్యూటీ వంటివి చెల్లించాల్సిన అవసరం లేదు. ఈ మినహాయింపుల వల్ల చిన్న, సన్నకారు రైతులపై ఆర్థిక భారం గణనీయంగా తగ్గుతుంది. భూ రికార్డులను సరి చేసుకోవడం వారికి మరింత సులభం అవుతుంది. ఈ నిర్ణయం రైతుల సంక్షేమానికి దోహదపడుతుందని ప్రభుత్వం భావిస్తోంది.
సాదా బైనామా అంటే అధికారికంగా రిజిస్టర్ కాని, తెల్ల కాగితాలపై చేసుకున్న భూముల కొనుగోలు ఒప్పందాలు. భూమిని కొన్న వారు, అమ్మిన వారు ఒక ఒప్పందంపై సంతకాలు చేస్తారు. అయితే దీన్ని అధికారికంగా ప్రభుత్వ కార్యాలయంలో నమోదు చేయరు.
చిన్న, సన్నకారు రైతులు వ్యవసాయ భూముల క్రయ విక్రయాలు చేసినప్పుడు రిజిస్టర్డ్ డాక్యుమెంట్‌పై కాకుండా తెల్ల కాగితాలపై లావాదేవీల ఒప్పందం రాసుకుంటారు. దాని ఆధారంగానే భూముల క్రయ విక్రయాలు జరిగిపోతుంటాయి. కొన్ని దశాబ్దాలుగా గ్రామీణ ప్రాంతాల్లో కొన్ని క్రయవిక్రయాలలో ఇలా జరుగుతోంది. ఇలా తెల్లకాగితాలపై ఒప్పందం రాసుకోవడాన్నే సాదా బైనామాగా పిలుస్తుంటారు.
Also Read: నెల రోజుల్లో పెన్షన్లు, హెల్త్ కార్డులు..! అమరావతి రైతులకు ప్రభుత్వం గుడ్ న్యూస్..
