AP Govt Anganwadi
AP Govt Anganwadi : ఏపీలోని కూటమి ప్రభుత్వం మహిళలకు మరో గుడ్‌న్యూస్ చెప్పింది. రాష్ట్రంలో భారీగా అంగన్వాడీ సహాయకుల పోస్టులను భర్తీ చేసేందుకు ప్రభుత్వం గ్రీన్ సిగ్నల్ ఇచ్చింది. అంగన్వాడీ కేంద్రాల్లో మరింత మెరుగైన సేవలు అందించడంలో భాగంగా ప్రభుత్వం ఈ నిర్ణయం తీసుకుంది.
ఏపీలో ఇటీవల 4,687 మినీ అంగన్‌వాడీలను మెయిన్ అంగన్‌వాడీలుగా అప్‌గ్రేడ్ చేస్తూ ప్రభుత్వం నిర్ణయించిన విషయం తెలిసిందే. తాజాగా.. ఆ అంగన్వాడీ కేంద్రాల్లో 4,687 అంగన్వాడీ సహాయకుల పోస్టులను భర్తీ చేసేందుకు కూటమి ప్రభుత్వం గ్రీన్ సిగ్నల్ ఇచ్చింది. త్వరితగతిన వీరి నియామకాన్ని చేపట్టాలని మహిళా శిశు సంక్షేమ శాఖ అధికారులను ఆదేశిస్తూ శుక్రవారం ప్రభుత్వం ఉత్తర్వులు జారీ చేసింది.
మినీ అంగన్వాడీ కార్యకర్తలకు పదోన్నతి కల్పిస్తూ ప్రభుత్వం ఇటీవల నిర్ణయించిన విషయం తెలిసిందే. పదో తరగతి పాసైన 4,687 మంది మినీ అంగన్వాడీ కార్యకర్తలను మెయిన్ అంగన్వాడీ కార్యకర్తలుగా మారుస్తారు. వీరికి నెలకు రూ.11,500 గౌరవ వేతనం ఇస్తారు. ప్రస్తుతం 4,678 అంగన్ వాడీ సహాయకుల పోస్టుల భర్తీకి ప్రభుత్వం అనుమతి ఇవ్వడంతో ఈ నియామకాల ద్వారా అంగన్వాడీ కేంద్రాల పనితీరును మరింత మెరుగుపర్చేందుకు ప్రభుత్వం దృష్టిసారించింది.
అర్హతలు ఇవే..
♦ అగన్‌వాడీ సహాయకుల పోస్టుల కొరకు దరఖాస్తు చేసుకునే వారు 10వ తరగతి ఉత్తీర్ణులై ఉండాలి.
♦ అభ్యర్థులు వివాహితులు అయ్యి.. స్థానిక వ్యక్తులై ఉండాలి.
♦ అంగన్వాడీ సహాయకుల పోస్టులకు దరఖాస్తు చేసుకునే అభ్యర్థుల వయస్సు 01.07.2025 నాటికి 21 సంవత్సరాల నుంచి 35 సంవత్సరాలలోపు వారు అయి ఉండాలి.
♦ ఎస్సీ, ఎస్టీ ప్రాంతాల్లో గల ఎస్సీ, ఎస్టీ అభ్యర్థులు 21 సంవత్సరాలు నిండివారు లేకుంటే 18 సంవత్సరాలు నిండిన వారు కూడా అర్హులు.
♦ అంగన్వాడీ కార్యకర్త లేదా అంగన్వాడీ సహాయకురాలు పోస్టు కొరకు ఎస్సీ, ఎస్టీ హాబిటేషన్స్ నందు ఎస్సీ, ఎస్టీ అభ్యర్థులు మాత్రమే అర్హులు
♦ అభ్యర్థులు తమ దరఖాస్తుతో పాటు కులం (ఎస్సీ, ఎస్టీ, బీసీ అయితే), నివాసము, పుట్టిన తేదీ, 10వ తరగతి మార్కుల మెమో, ఆధార్, వికలాంగత్వమునకు సంబంధించిన పత్రములను గెజిటెడ్ అధికారిచే ధృవీకరణ చేసినవి జతపర్చాలి.
♦ ధరఖాస్తులో ఇటీవల తీసిన ఫొటోలను ముందు భాగంలో అతికించి, ఫొటో ఏదేని గెజిటెడ్ అధికారితో ధృవీకరణ తీసుకోవాలి.
♦ ధరఖాస్తులను స్వయంగా లేదా పోస్టు బాక్సు ద్వారా కూడా అందించొచ్చు.
♦ మరిన్ని వివరాల కోసం స్థానిక అధికారులను సంప్రదించాలి.
