Perni Nani
Perni Nani : కూటమి ఎమ్మెల్యేలు బాలకృష్ణ, కామినేని శ్రీనివాస్ పై మాజీ మంత్రి, వైసీపీ నేత పేర్ని నాని సంచలన కామెంట్స్ చేశారు. అసెంబ్లీ వేదికగా జగన్ మోహన్ రెడ్డి పై బాలకృష్ణ, కామినేని శ్రీనివాస్ చేసిన వ్యాఖ్యలకు ఆయన స్ట్రాంగ్ కౌంటర్ ఇచ్చారు.
పేర్ని నాని మాట్లాడుతూ.. కైకలూరు ప్రజల కష్టాలు పట్టని ఎమ్మెల్యే కామినేని శ్రీనివాస్.. జనం తాగునీరు లేక ఇబ్బందులు పడుతున్నా ఆయనకు పట్టదు.. కైకలూరులో దళితులపై జనసేన నేతలు కత్తులతో దాడి చేస్తే మాట్లాడలేదు. ప్రజల కష్టాల గురించి మాట్లాడటం చేతకానోడు అసెంబ్లీలో జగన్ మోహన్ రెడ్డి గురించి మాట్లాడుతున్నాడు. 80ఏళ్లు మీదపడినా ఆయనకు ఇంగితజ్ఞానం లేదు. అర్జంట్ గా మంత్రి అయిపోవాలని కామినేని ఆరాటంగా కనిపిస్తుందని పేర్ని నాని విమర్శించారు.
బాలకృష్ణపైనా పేర్నినాని తీవ్రస్థాయిలో విరుచుకుపడ్డారు. పవన్ కల్యాణ్ ఉపముఖ్యమంత్రిగా హెలీకాప్టర్లలో తిరుగుతుండటం బాలకృష్ణ చూడలేకపోతున్నాడు. తన బావ చంద్రబాబుతో సమానంగా పవన్ కల్యాణ్ జామర్ కార్లలో తిరుగుతుంటే తట్టుకోలేకపోతున్నాడు. పవన్ కు చంద్రబాబు ఒంగిఒంగి సలామ్ కొడుతుంటే కుతకుతలాడిపోతున్నాడు. బాలకృష్ణ వల్ల అసెంబ్లీ గేటు దగ్గర కూడా బ్రీత్ ఎనలైజర్లు పెట్టాల్సిన పరిస్థితి వచ్చింది. ఆయన తప్పతాగి కళ్లునెత్తికెక్కి మాట్లాడుతున్నాడు. అసలు సైకో బాలకృష్ణ. పవన్ కల్యాణ్ ను చూసి తట్టుకోలేని సైకో బాలకృష్ణ అంటూ పేర్నినాని తీవ్ర స్థాయిలో ఆగ్రహం వ్యక్తం చేశారు.
బాలకృష్ణ స్వయంగా నాతో ఫోన్లో మాట్లాడారు. నాకు జన్మనిచ్చిన తల్లిదండ్రులపై ప్రమాణం చేసి చెబుతున్నా. దమ్ముంటే నువ్వు నీ తల్లిదండ్రులపై ప్రమాణం చెయ్యి.. అంటూ బాలకృష్ణకు పేర్నినాని సవాల్ చేశారు. నందమూరి తారకరామారావు, బసవతారకం ఎంత గొప్ప వ్యక్తులు. అలాంటి వారి కడుపున పుట్టిన నువ్వు ఇంతలా దిగజారిపోవడం సిగ్గుచేటు. అఖండ సినిమా కోసం బాలకృష్ణ నాకు స్వయంగా ఫోన్ చేశాడు. జగన్ మోహన్ రెడ్డితో అపాయింట్ మెంట్ ఇప్పించండి అని అడిగారు. బాలకృష్ణ ఫోన్ చేస్తే నేనే జగన్ మోహన్ రెడ్డికి విషయం చెప్పాను. వాళ్లు ఏ సాయం అడిగితే అది చేసిపెట్టమని చెప్పిన గొప్ప వ్యక్తి జగన్ మోహన్ రెడ్డి అని పేర్ని నాని అన్నారు.
వైఎస్సార్ ఎంత సాయం చేశాడో మర్చిపోయావా బాలకృష్ణ..? యావజ్జీవ శిక్ష నుంచి తప్పించుకున్న విషయం గుర్తు లేదా.. మనిషి జన్మ ఎత్తినవాడెవడైనా చేసిన సాయం మర్చిపోతాడా. జగన్ మోహన్ రెడ్డిని కలవడం ఇష్టం లేకపోతే రావడం మానేయండి. అంతేకానీ ఎందుకు ఈ సైకో మాటలు అంటూ బాలకృష్ణపై పేర్నినాని తీవ్ర స్థాయిలో ఆగ్రహం వ్యక్తం చేశారు.
చిరంజీవిని సొంత అన్నలాగా భావించి జగన్ మోహన్ రెడ్డి గౌరవించారు. మూడు, నాలుగేళ్ల నుంచి ఎన్నో అవమానాలను భరించాం. చిరంజీవి వెంటనే స్పందించినందుకు సంతోషం. గతంలో పవన్ కళ్యాణ్ నోటికొచ్చినట్లు మాట్లాడినప్పుడు చిరంజీవి ప్రకటన చేసుంటే బాగుండేది. నిజంగా మేం సినీపరిశ్రమను ఇబ్బంది పెట్టుంటే.. ఎందుకు ఇంకా మేం ఇచ్చిన జీవోలను అమలు చేస్తున్నారు..? అధిక ధరలు పెంచుకుంటూ పోతే సినీపరిశ్రమ దెబ్బతింటుందని జగన్ మోహన్ రెడ్డి ఆనాడే చెప్పారు.
సినీపరిశ్రమ మనుగడను కాపాడాలని జగన్ కోరారు. సినీ పరిశ్రమకు స్థలాలు ఇస్తామన్నారు కదా.. జగన్ మోహన్ రెడ్డి ఆలోచనను గౌరవించి చిరంజీవి, రామ్ చరణ్ వైజాగ్ లో స్థలం కొన్నారు. చంద్రబాబు ఏనాడైనా సినీపరిశ్రమకు మేలు చేశాడా..? చంద్రబాబు సినీపరిశ్రమను తన ఈవెంట్లకు.. అడ్వరటైజ్ మెంట్లకు వాడుకున్నాడు అంటూ పేర్ని నాని విమర్శించారు. విదేశాల్లో ఉన్నప్పటికీ చిరంజీవి పెద్ద మనసుతో స్పందించినందుకు ఆయనకు మా ధన్యవాదాలు తెలుపుతున్నామని పేర్ని నాని అన్నారు.
