ప్రాపర్టీ కొనుగోలులో బీ కేర్‌ఫుల్‌.. చిన్న పొరపాటు చేసినా అసలుకే ఎసరు

Free launch offer in real estate: సొంతిల్లు.. ఈ మాట మనలో చాలామందికి ప్రశాంతతనిచ్చే అంశం. కుటుంబ బాధ్యతల్లో ఉన్న ప్రతి వ్యక్తి సొంతింటి కోసం కలలుగంటారు. చిన్నదో పెద్దదో తమ ఆర్థికస్తోమతకు అనుగుణంగా ఒక ఇల్లు కట్టుకోవాలని లేదా ఇంటి స్థలం కొనాలని అనుకుంటారు. తన కుటుంబానికి.. తన బిడ్డలకు సెక్యూరిటీ ఉండేలా మంచి ప్రాజెక్ట్ కోసం చూస్తుంటారు. అందుకోసం కొంతమంది తమ జీవితాంతం కష్టపడి సంపాదించిన డబ్బునంతా వెచ్చించి ఇల్లు లేదా ఇంటి స్థలం కొనుగోలు చేస్తారు. మరికొందరైతే తమ ఆదాయంలో కొంత భాగాన్ని ఈఎంఐగా చెల్లిస్తూ సొంతిల్లు కలను నెరవేర్చుకుంటుంటారు. అయితే ఫ్లాట్స్‌, ఖాళీ స్థలాలు, నిర్మించిన ఇంటి కొనుగోలు విషయాల్లో ఆచితూచి అడుగులు వేయాల్సిన అవసరం ఎంతైనా ఉంది. ఇటీవల కొన్ని రియల్ ఎస్టేట్ సంస్థలు చేస్తున్న మోసాలు ఇలాంటి అంశాలను నొక్కి చెబుతున్నాయి.

అలాంటి వాటి పట్ల జాగ్రత్తగా ఉండాలి
కొనుగోలుదారులను ఆకర్షించేందుకు కొన్ని రియల్టీ సంస్థలు ఇష్టం వచ్చినట్లుగా వ్యవహరిస్తుంటాయి. నిబంధనలకు నీళ్లు వదిలి.. ప్రి లాంచ్ ఆఫర్… తక్కువ ధర అంటూ ప్రకటనలు గుప్పిస్తుంటాయి. ఆయా ప్రాంతాల్లో ప్రముఖ కంపెనీలు వస్తున్నాయంటారు. భవిష్యత్తులో భారీగా రేట్లు పెరుగుతాయి అంటారు.. గ్రాఫిక్స్ మాయాజాలం చేస్తారు. తక్కువ ధరేకదా అని డబ్బులు చెల్లించారో ఇక అంతే సంగతులు. అదిగో ఇదిగో అంటూ బోర్డు తిప్పేసారు. గత కొన్నాళ్లుగా హైదరాబాద్ కేంద్రంగా అక్కడక్కడ కొన్ని రియల్టీ సంస్థలు వినియోగదారులకు కుచ్చు టోపీ పెడుతున్నాయి. కోట్లాది రూపాయలు పోగేసుకుని ప్రాజెక్టులను పక్కన పెట్టేస్తున్నాయి. దాంతో లబోదిబోమనడం కస్టమర్ల వంతు అవుతుంది. అలాంటి వాటి పట్ల జాగ్రత్తగా ఉండాలంటున్నారు పోలీసులు.

పర్మిషన్లు ఉన్నాయో, లేదో చెక్ చేయాలి
మరి ఇళ్ల కొనుగోలు సమయంలో తీసుకోవాల్సిన జాగ్రత్తలు ఏంటి? నిర్మాణ సంస్థలు, రియల్ ఎస్టేట్ వ్యాపారులు చెబుతున్న మాటలను ఎలా కంపేర్ చేసుకోవాలి అనేది మనలో చాలా మందిని వేధిస్తున్న ప్రశ్న. ఇల్లు లేదా ఫ్లాట్ లేదా ప్రాపర్టీ కొనుగోలు విషయంలో పలు జాగ్రత్తలు తీసుకోవాల్సిన అవసరం ఉంది. లేదంటే తరువాత చాలా కష్టాలు ఎదుర్కోవాల్సి ఉంటుంది. ముఖ్యంగా ఆ లేఅవుట్ లేదా నిర్మాణానికి సంబంధిత విభాగాల పర్మిషన్లు ఉన్నాయో లేదో పూర్తిగా చెక్ చేసుకోవాలి. తర్వాత క్షేత్రస్థాయిలో లేఅవుట్ లేదా భవన నిర్మాణ ప్రాంతం పనులను పరిశీలించుకోవాలి. నిర్మాణ సంస్థ చెబుతున్నట్లుగా ఆ ప్రాజెక్టు ఇన్ టైంలో పూర్తి అవుతుందా అనేది ఒక అంచనాకు రావాల్సి ఉంటుంది. లక్షల రూపాయలు, కోట్ల రూపాయలు వెచ్చించి ప్లాట్లు ఇల్లు, ఆస్తులు కొనుగోలు చేస్తున్న సందర్భంలో మోసపోకుండా ఉండేందుకు కోసం తప్పనిసరిగా అన్ని అంశాలను క్షుణ్ణంగా పరిశీలన చేసుకోవాలంటున్నారు నిపుణులు.

రెరాలో ప్రాజెక్ట్ రిజిస్టర్ అయిందా?
ప్రాజెక్టులను పరిశీలించేటప్పుడు ఆయా ప్రాంతాలకు అనుగుణంగా హెచ్ఎండీఏ లేదా మున్సిపాలిటీలు, గ్రామ పంచాయతీలు ఇచ్చే పర్మిషన్లు సరైనవేనా లేదా అనేది తనిఖీ చేసుకోవాలి. అంతేకాకుండా తెలంగాణ రియల్ ఎస్టేట్ రెగ్యులేటరీ అథారిటీ.. రెరాలో మీరు కొనాలనుకుంటున్న ప్రాజెక్ట్ రిజిస్టర్ అయిందా లేదా అనేది తప్పనిసరిగా చూసుకోవాలంటున్నారు అధికారులు. కొనుగోలుదారుల హక్కుల పరిరక్షణ కోసం టీఎస్ రెరా అనేక చర్యలు తీసుకుంటుంది. ప్రాజెక్టు అనుకున్న టైమ్‌కు పూర్తి కాకుంటే అందుకు తగిన నష్టాన్ని కొనుగోలుదారుకు చెల్లించే అవకాశం రెరాలో నమోదు చేసుకున్న ప్రాజెక్టుకు ఉంటుంది. రెరాలో ఒక ప్రాజెక్టు రిజిస్టర్ అయ్యిందంటే అందుకు సంబంధించిన అన్ని డాక్యుమెంట్స్ సరైనవిగా భావించేందుకు అవకాశం ఉంటుంది. రెరాలో నమోదు చేసుకున్న ప్రాజెక్టుల వివరాలను పూర్తిస్థాయిలో పరిశీలించిన అనంతరం అధికారులు వారికి ప్రత్యేకంగా అనుమతులు మంజూరు చేస్తారు. ఎవరైనా డెవలపర్స్ లేదా రియల్ ఎస్టేట్ వ్యాపారులు ప్రకటనలు ఇస్తున్న సందర్భంలోనూ తప్పనిసరిగా సంబంధిత సంస్థల పర్మిషన్ నంబర్లు రెరా నంబర్ కూడా ముద్రించాల్సి ఉంటుంది. వాటన్నింటినీ సరిచూసుకున్న తర్వాతే కొనుగోలు చేస్తే ఇబ్బందుల నుంచి గట్టెక్కవచ్చంటున్నారు అధికారులు.

రెరాతో భరోసా
ఇక ల్యాండ్ టైటిల్ విషయంలోనూ ఇన్ టైమ్‌లో ప్రాజెక్టు పూర్తి చేయడంలోనూ ఈ ప్రాజెక్టు కోసం వసూలు చేసిన డబ్బులు ఇక్కడ ఎక్కువ శాతం ఖర్చు చేయడంలోనూ రెరాలో నమోదు చేసుకున్న డెవలపర్స్, తప్పని సరిగా నిబంధనలు పాటిస్తారు. అనుభవజ్ఞులైన లాయర్లు, చార్టెడ్ అకౌంటెన్స్, ఆర్కిటెక్చర్స్ ఇచ్చిన పత్రాలు.. లెక్కలు రెరాకు సమర్పించాల్సి ఉంటుంది. ప్రాజెక్టులో కొనుగోలుదారులకు ఇచ్చిన హామీలకు కాకుండా ఇతర మార్పులు చేర్పులు చేసేందుకు అదనపు సమయాన్ని బయ్యర్స్‌ నుంచి బిల్డర్స్‌ తప్పనిసరిగా అనుమతి తీసుకోవాల్సి ఉంటుంది. ఇన్‌టైమ్‌లో ప్రాజెక్టు హ్యాండ్ ఓవర్ చేయకపోయినా.. కొనుగోలుదారులు రెరాను ఆశ్రయించవచ్చు. దాంతో వేగంగా న్యాయం జరగడమే కాకుండా కొనుగోలుదారులు ఒప్పందాన్ని రద్దు చేసుకోవడానికి, నష్టంగా పరిహారం పొందడానికి వీలవుతుంది. సో.. తప్పనిసరిగా అన్ని అనుమతులు పొందిన ప్రాజెక్టులు, రెరాలో నమోదు చేసుకున్న ప్రాజెక్టుల్లో ప్రాపర్టీలు కొనుగోలు చేస్తే ఇబ్బందులు ఉండవంటున్నారు అధికారులు.

Also Read: తెలంగాణలో దూసుకుపోతున్న రియల్ ఎస్టేట్.. ఏపీతో పోలిస్తే రెట్టింపు ప్రాజెక్టులు

గత కొన్నేళ్లుగా గ్రేటర్ హైదరాబాద్‌ పరిధిలో వివిధ రూపాల్లో ప్రకటనలు ఇస్తున్న కొన్ని రియల్ ఎస్టేట్ సంస్థలు కొనుగోలుదారులను అడ్డంగా మోసం చేస్తున్నాయి. దీంతో ప్రాపర్టీ కొనుగోలులో ప్రజలు చాలా జాగ్రత్తగా ఉండాల్సిందేనంటున్నారు ఎక్స్‌పర్ట్స్‌. లేకుంటే ఎంతో శ్రమకోర్చి పైసాపైసా కూడగట్టి సంపాదించిన నష్టపోవాల్సి వస్తుందని ఎక్స్‌పర్ట్స్‌ హెచ్చరిస్తున్నారు.