ఉదయాన్నే మనం చేసే కొన్ని పనులు ఆ రోజంతా ప్రభావం చూపిస్తాయి. మేల్కొన్న వెంటనే శరీరానికి, ఆరోగ్యానికి హానికరం అయిన పనులు చేయకుండా జాగ్రత్తపడటం అవసరం. కాబట్టి, ఉదయం మంచి అలవాట్లు పాటించడం, ప్రతికూలమైన పనులను నివారించడం ముఖ్యం. ఇక్కడ మనం ఉదయాన్నేలేచిన వెంటనే చేయకూడని పనులు ఏంటి? దాని వలన కలిగే నష్టాలు ఏంటో తెలుసుకుందాం..
ఉదయం లేటుగా లేవడం:
చాలా ఆలస్యంగా లేవడం వల్ల మీ రోజువారీ పనులను సమయానికి పూర్తి చేయడం కష్టమవుతుంది. పనులు పూర్తి చేయడానికి ఆలస్యం అవ్వడం వలన ఒత్తిడి పెరుగుతుంది. ఒత్తిడి పెరిగితే మానసిక ఆందోళన పెరిగి, పనితీరు తగ్గే అవకాశం ఉంటుంది. కాబట్టి, ఉదయం త్వరగా లేవడం మంచిది. శరీరానికి, మనసుకు ఉల్లాసంగా ఉండే విధంగా రోజును ప్రారంభించడం వల్ల పనులు సమర్థవంతంగా చేయగలుగుతారు. రోజంతా ఉత్సాహంగా ఉండేందుకు సహాయపడుతుంది.
నిద్రలేవగానే సెల్ ఫోన్ ని అధికంగా వాడటం:
ఉదయం లేవగానే మొబైల్ ఫోన్ చూడడం అలవాటుగా మారిపోతే, అది శరీరానికి, మనసుకు హానికరం. ఫోన్ స్క్రీన్ నుండి వచ్చే బ్లూ లైట్ కళ్లపై ప్రభావం చూపి, కంటి నొప్పి, అలసట, తలనొప్పికి కారణం అవుతుంది. అంతేకాకుండా, ఎక్కువ సమయం మొబైల్ స్క్రీన్ చూస్తే మెదడుపై ఒత్తిడి పెరిగి, మానసిక ఆరోగ్యంపై ప్రభావం చూపుతుంది. ఇదే అలవాటుగా మారితే, రాత్రిపూట నిద్ర సరిగా పట్టక నిద్రలేమి సమస్య ఏర్పడే అవకాశం ఉంది. కాబట్టి, ఉదయం లేచిన వెంటనే మొబైల్ ఫోన్ వినియోగాన్ని తగ్గించుకోవడం ఉత్తమం. దీని వల్ల శరీరానికి, మనసుకు ఉత్తేజంగా, ఆరోగ్యంగా ఉండేందుకు అవకాశం ఉంటుంది.
బ్రేక్ ఫాస్ట్ తినకపోవడం:
ఉదయం అల్పాహారం తినకపోతే, దాని ప్రభావం శారీరక, మానసిక ఆరోగ్యంపై పడుతుంది. రాత్రి భోజనం తర్వాత చాలా గంటల పాటు ఏమీ తినకపోవడం వల్ల శరీరంలో గ్లూకోజ్ స్థాయిలు తగ్గిపోతాయి, అంతేగాక షుగర్, గుండె సంబంధిత సమస్యలను తెచ్చిపెట్టే అవకాశాలు ఎక్కువగా ఉంటాయి. ఆరోగ్యాన్ని కాపాడుకోవాలంటే, ప్రతిరోజూ పోషకాహారంతో కూడిన టిఫిన్ చేయడం చాలా అవసరం.
ఎలాంటి వ్యాయామాలు చేయకపోవడం:
శారీరక, మానసిక ఆరోగ్యాన్ని మెరుగుపరచుకోవాలంటే ప్రతి ఒక్కరూ ఉదయన్నే వర్కౌట్ చేయాలి. రోజును ఉల్లాసంగా ప్రారంభించేందుకు, రోజంతా ఉత్సాహంగా ఉండేందుకు సహాయపడుతుంది. క్రమం తప్పకుండా వ్యాయామం చేస్తే శరీర బరువును కూడా అదుపులో ఉంచుకోవచ్చు. కాబట్టి, ఉదయం వ్యాయామం చేయడం అలవాటు చేసుకోవాలి.
ఈ అలవాట్లు మన ఆరోగ్యాన్ని, మనసును, అంతేగాక రోజువారీ జీవితాన్ని ప్రభావితం చేస్తాయి. కాబట్టి మనం ఉదయాన్నే మంచి అలవాట్లు అలవర్చుకుని, హానికరమైన అలవాట్లను దూరం చేసుకోవాలి. ఆరోగ్యకరమైన జీవనశైలిని అనుసరిస్తూ, రోజును ఉల్లాసంగా ప్రారంభిద్దాం!
