North Korea: ఊళ్లకు ఊళ్లు కూల్చేస్తున్న కిమ్ జోంగ్ ఉన్

North Korea: ఇరాన్‌, ఇజ్రాయెల్-అమెరికా మధ్య యుద్ధంతో మిడిల్ ఈస్ట్ లో తీవ్ర ఉద్రిక్తతలు నెలకొన్నాయి. ఈ ప్రాంతంలో అనిశ్చితి ఏర్పడింది. ఇది చాలదన్నట్లు ఇప్పుడు ఉత్తర కొరియా చేసిన పని మరింత అనిశ్చితికి దారితీసింది. కిమ్ జోంగ్ ఉన్ నిర్వాకం షాక్ కి గురి చేస్తోంది. ఊళ్లకు ఊళ్లు కూల్చేస్తున్నాడు కిమ్ జోంగ్ ఉన్. తన విస్తరణ ప్రణాళికలకు సంకేతంగా దేశంలోని కీలక క్షిపణి ఉపగ్రహ పరీక్షా కేంద్రాలలో ఒకదాని సమీపంలోని పట్టణాలను నేలమట్టం చేయడం భద్రతాపరమైన ఆందోళనలను మరింత పెంచింది.

దేశ పశ్చిమ తీరంలోని సోహే ఉపగ్రహ ప్రయోగ కేంద్రానికి సరిహద్దుగా ఉన్న వందలాది భవనాలతో కూడిన రెండు గ్రామాలను మార్చిలో కూల్చివేశారని స్టిమ్సన్ సెంటర్‌లోని 38 నార్త్ ప్రోగ్రామ్ విడుదల చేసిన నివేదికలో తెలిపింది.

“దేశం కొత్త పంచవర్ష ప్రణాళికలో ఉపగ్రహాలు, ఉపగ్రహ వ్యతిరేక ఆయుధాలు ఉన్న తీరును బట్టి చూస్తే, ఉత్తర కొరియా ప్రధాన అంతరిక్ష కేంద్రం విస్తరణ జరుగుతూ ఉండొచ్చు” అని స్టిమ్సన్ సెంటర్ సీనియర్ ఫెలో మార్టిన్ విలియమ్స్ ఆ నివేదికలో తెలిపారు.

ఉత్తర కొరియా ఫిబ్రవరిలో 2030 వరకు వర్తించే తన కొత్త వ్యూహాత్మక ప్రణాళికను ప్రకటించింది. ఇందులో అదనపు గూఢచార ఉపగ్రహాలను కక్ష్యలోకి ప్రవేశపెట్టడం సహా కీలక వ్యూహాత్మక లక్ష్యాలను నిర్దేశించింది. 2023లో ఉత్తర కొరియా నాయకుడు కిమ్ జోంగ్ ఉన్, రష్యా అధ్యక్షుడు వ్లాదిమిర్ పుతిన్ రష్యాలోని వోస్టోచ్నీ కాస్మోడ్రోమ్ అంతరిక్ష కేంద్రంలో చర్చలు జరిపారు. ఈ చర్చలు కిమ్ అంతరిక్ష కార్యక్రమాన్ని ప్రోత్సహించడానికి మాస్కో సాయపడే అవకాశంపై ఆందోళనలు రేకెత్తించాయి.

దాడుల సామర్థ్యాలను మెరుగుపరుచుకునే ప్రణాళిక..

తమ సైన్యం వ్యూహాత్మక దాడుల సామర్థ్యాలను మెరుగుపరుచుకోవడానికి ఒక కొత్త ఘన-ఇంధన ఇంజిన్‌ను పరీక్షించినట్లు ఉత్తర కొరియా ప్రకటించిన కొద్ది రోజులకే ఈ నివేదిక వెలువడింది. యుక్రెయిన్‌పై రష్యా చేస్తున్న యుద్ధంలో కిమ్ కీలక మిత్రుడిగా ఉన్నారు. ఈ నేపథ్యంలో ఉత్తర కొరియా తన అణు , క్షిపణి సామర్థ్యాలను అభివృద్ధి చేసే ప్రయత్నాలను వేగవంతం చేస్తోంది.

పరీక్ష ఎక్కడ జరిగిందో ఉత్తర కొరియా వెల్లడించలేదు. కానీ ప్రభుత్వ మీడియా విడుదల చేసిన ఫోటోలను ఉటంకిస్తూ ఈ పరీక్ష సోహే సైట్‌లో నిర్వహించినట్లు కనిపిస్తోందని 38 నార్త్ నివేదిక వెల్లడించింది. గత సంవత్సరం తాము ఆవిష్కరించిన దానికంటే సుమారు 20% ఎక్కువ శక్తివంతమైనదని ఉత్తర కొరియా పేర్కొన్న ఈ కొత్త ఇంజన్, బహుశా ఖండాంతర బాలిస్టిక్ క్షిపణి కోసం ఉద్దేశించినదై ఉండొచ్చని మాజీ విదేశాంగ శాఖ అధికారి డీపెన్ అన్నారు.

హర్ముజ్ జలసంధిని తిరిగి తెరవడానికి సాయం చేయాలని అమెరికా అధ్యక్షుడు డొనాల్డ్ ట్రంప్ దక్షిణ కొరియాతో సహా మిత్రదేశాలపై ఒత్తిడి పెంచారు. పొరుగున ఉన్న “అణుశక్తి” నుండి దానిని రక్షించడానికి తమ భూభాగంలో 10వేల మంది అమెరికన్ సైనికులు ఉన్నప్పటికీ, ఈ వ్యూహాత్మక జలమార్గాన్ని తిరిగి తెరవడానికి అమెరికా చేస్తున్న ప్రయత్నాలకు దక్షిణ కొరియా సహాయపడటం లేదని ట్రంప్ అన్నారు.

Also Read: యుద్ధం ఎఫెక్ట్.. మందుల ధరలు పెరుగుతున్నాయ్..! ఏ ఔషధం రేటు ఎంత పెరిగిందంటే?