మంటల్లో చిక్కుకున్న జపాన్ ఎయిర్‌లైన్స్ విమానం.. 367 మంది ప్ర‌యాణికులు..

Plane catches fire on runway at Japan's Haneda airport

Plane catches fire : టోక్యోలోని హ‌నెడా విమానాశ్ర‌యంలో మంగ‌ళ‌వారం ప్ర‌మాదం చోటు చేసుకుంది. జ‌పాన్ ఎయిర్‌లైన్స్‌కు చెందిన జేఏఎల్ 516 విమానం ప్ర‌మాదానికి గురైంది. విమానాశ్ర‌యంలోని ర‌న్ వేపై దిగుతుండ‌గా మంట‌ల్లో చిక్కుకుంది. ఆ దేశ పబ్లిక్ బ్రాడ్‌కాస్టర్ NHK ప్రసారం చేసిన వీడియోల్లో విమానం కిటికీల నుంచి మంటలు రావడం కనిపించింది. కాగా.. ఈ ప్ర‌మాదానికి కార‌ణం కోస్ట్ గార్డ్ ఎయిర్‌క్రాఫ్ట్‌ను ఢీ కొట్ట‌డ‌మేన‌ని తెలిపింది.

కాగా.. ఈ ఘ‌ట‌న పై జపాన్ ఎయిర్‌లైన్స్ ప్రతినిధి మాట్లాడుతూ.. హక్కైడోలోని షిన్-చిటోస్ విమానాశ్రయం నుండి 300 మందికి పైగా ప్ర‌యాణికుల‌తో విమానం బ‌య‌లు దేరిన‌ట్లు చెప్పారు. విమానం ర‌న్ వే పై దిగుతున్న కోస్ట్ గార్డు ఎయిర్ క్రాఫ్ట్‌ను ఢీ కొట్టిన్న‌ట్లుగా భావిస్తున్న‌ట్లు చెప్పారు. క్ష‌ణాల్లోనే మంట‌లు వ్యాపించాయి.

Also Read : జపాన్‌లో భారీ భూకంపం.. 24 మంది మృతి

వెంట‌నే అప్ర‌మ‌త్త‌మైన విమానాశ్ర‌య సిబ్బంది, అగ్నిమాప‌క బృందాలు విమానం వ‌ద్ద‌కు చేరుకుని మంట‌ల‌ను అదుపులోకి తీసుకొచ్చారు. ఈ ప్ర‌మాదం నుంచి ప్ర‌యాణికులు, సిబ్బందితో క‌లిపి 367 మందిని సుర‌క్షితంగా బ‌య‌టకు తీసుకువ‌చ్చిన‌ట్లు ఎన్‌హెచ్‌కే తెలిపింది. అయితే.. కోస్ట్ గార్డ్ ఎయిర్‌క్రాఫ్ట్ లోని ఐదుగురు మరణించినట్టు స్థానిక మీడియా తెలిపింది.