Narendra Modi: ప్రధాని నరేంద్ర మోడీకి ఉజ్బెకిస్థాన్ అత్యున్నత గౌరవం.. భారత ప్రజలకే అంకితమన్న ప్రధాని

Pm modi conferred with uzbekistan highest civilian honour oli darajli dustlik award

• ప్రధాని మోడీకి ఉజ్బెకిస్థాన్ గౌరవం
• వాణిజ్యం, రక్షణ రంగాల్లో మైత్రి
• యోగా, సాంస్కృతిక ప్రదర్శనల్లో వేడుకలు

Narendra Modi: భారత్, ఉజ్బెకిస్థాన్ దేశాల మధ్య ద్వైపాక్షిక సంబంధాలు మరో మైలురాయిని చేరుకున్నాయి. ప్రధాని నరేంద్ర మోడీ(Narendra Modi)కి ఉజ్బెకిస్థాన్ ప్రభుత్వం తమ దేశ అత్యున్నత పురస్కారమైన ‘ఓలీ దరాజ్లీ దోస్త్లిక్’ గౌరవాన్ని ప్రకటించి అరుదైన రీతిలో సత్కరించింది. ఉజ్బెకిస్థాన్ స్వాతంత్ర్యం 35వ వార్షికోత్సవం సందర్భంగా అధ్యక్షుడు షవ్కత్ మిర్జియోయెవ్ ఈ అవార్డును ప్రధానికి అందజేశారు. ఇరు దేశాల మధ్య మైత్రిని మరింత బలోపేతం చేసినందుకు గాను దక్కిన ఈ అత్యున్నత గౌరవాన్ని ప్రధాని మోడీ 140 కోట్ల మంది భారతీయ ప్రజలకు అంకితం చేస్తున్నట్లు ప్రకటించారు.

Kishan Reddy: తెలంగాణలో 42 రైల్వే స్టేషన్ల అభివృద్ధి.. ఈ ఏడాది చివరిలోగా.. మంత్రి కిషన్ రెడ్డి కీలక వ్యాఖ్యలు

తాష్కెంట్‌లో ప్రతినిధుల స్థాయి చర్చలు:

ఈ పర్యటనలో భాగంగా తాష్కెంట్‌లోని కుక్సారోయ్ ప్రెసిడెన్షియల్ ప్యాలెస్‌లో ఇరు దేశాల ప్రతినిధుల స్థాయి చర్చలు జరిగాయి. వాణిజ్యం, పెట్టుబడులు, రక్షణ, డిజిటల్ కనెక్టివిటీ, ఇంధనం, విద్యా రంగాల్లో సహకారాన్ని మరింత విస్తరించేందుకు ప్రాధాన్యతా ప్రణాళికలను ఖరారు చేశారు. ఈ భేటీలో భారత విదేశాంగ మంత్రి ఎస్. జైశంకర్, జాతీయ భద్రతా సలహాదారు అజిత్ దోవల్, ఇతర ఉన్నతాధికారులు పాల్గొన్నారు. శనివారం విమానాశ్రయం నుంచి హోటల్ వరకు ప్రధానికి అధ్యక్షుడు మిర్జియోయెవ్ స్వయంగా స్వాగతం పలికి విందు ఇచ్చారు.

యోగా కార్యక్రమం, సాంస్కృతిక వేడుకలు:

తాష్కెంట్‌లో ఉజ్బెకిస్థాన్ యోగా ఫెడరేషన్ నిర్వహించిన ప్రత్యేక యోగా కార్యక్రమంలో ప్రధాని మోడీ పాల్గొన్నారు. అలాగే యాంగీ ఉజ్బెకిస్థాన్ పార్క్‌లోని స్మారక చిహ్నం వద్ద పుష్పగుచ్ఛం ఉంచి నివాళులర్పించారు. భారత ప్రవాసులు నిర్వహించిన కథక్, ఉజ్బెక్ సంప్రదాయ నృత్య రూపకాల ఫ్యూజన్ ప్రదర్శనలను, బాలీవుడ్ పాటల ప్రదర్శనలను ఆయన ప్రత్యేకంగా అభినందించారు. ప్రధాని పర్యటన సందర్భంగా తాష్కెంట్‌లోని ప్రధాన భవనాలను భారత త్రివర్ణ పతాక కాంతులతో శోభాయమానంగా అలంకరించడం విశేషం.