Donald Trump: అమెరికా, రష్యా, చైనా, భారత్, జపాన్తో కలిసి ఎలైట్ ‘సీ5’ (కోర్ ఫైవ్) ఫోరాన్ని ఏర్పాటు చేయాలని యూఎస్ అధ్యక్షుడు డొనాల్డ్ ట్రంప్ యోచిస్తున్నారని పలు రిపోర్టులు చెబుతున్నాయి. యూరప్ ఆధిపత్యం ఉన్న జీ7 సహా సంప్రదాయ ప్రజాస్వామ్య, సంపన్న దేశాల కూటములను పక్కన పెట్టేలా ఈ కాన్సెప్ట్ ఉందని ప్రచారం జరుగుతోంది.
ఇప్పటివరకు సీ5 కూటమిపై అధికారిక ప్రకటన రాలేదు. అయితే, ఈ కొత్త హార్డ్ పవర్ గ్రూప్ (సైనిక శక్తి అధికంగా ఉన్న దేశాల కూటమి) ఆలోచన అమెరికా “నేషనల్ సెక్యూరిటీ స్ట్రాటజీ”కి సంబంధించిన లాంగ్ వెర్షన్లో ఉన్నట్లు అమెరికా పత్రిక పొలిటికో రిపోర్ట్ చేసింది. (Donald Trump)
ఈ లాంగ్ వెర్షన్లోని పూర్తి అంశాలను ఇప్పటివరకు అమెరికా విడుదల చేయలేదు. కానీ, వైట్ హౌస్ గత వారం ఇందుకు సంబంధించి 33 పేజీలతో ఉన్న షార్టర్ పబ్లిక్ వెర్షన్ను విడుదల చేసింది.
అయితే, సుదీర్ఘ ప్రణాళిక అమెరికా వద్ద నిజంగానే ఉందా? లేదా? అన్న విషయాన్ని తాము ఏమీ నిర్ధారించలేదని పొలిటికో పత్రిక తెలిపింది. అయితే, మరో పత్రిక “డిఫెన్స్ వన్”లో మాత్రం అంతకుముందే సీ5 కూటమి ఏర్పాటు యోచన గురించి పలు వివరాలు ప్రచురితమయ్యాయి.
జీ7 దేశాల కూటమి నిబంధనల్లో రెండు అంశాలు ప్రధానంగా ఉంటాయి. దాని ప్రకారం జీ7లో ఉండే దేశాలు ధనిక, ప్రజాస్వామ్య దేశాలై ఉండాలి. అయితే, ట్రంప్ ఏర్పాటు చేయాలనుకుంటున్న సీ5 దేశాల కూటమిలో మాత్రం ఈ నిబంధనలు లేవు.
“యునైటెడ్ స్టేట్స్, చైనా, రష్యా, భారత్, జపాన్ కలిసే ‘కోర్ ఫైవ్’ కూటమిని ఈ స్ట్రాటజీ ప్రతిపాదిస్తుంది. ఈ దేశాల్లో ఒక్కో దేశం జనాభా 100 మిలియన్ దాటే ఉంటుంది. జీ7లాగే కోర్ ఫైవ్ కూటమి కూడా నిర్దిష్ట అంశాలపై రెగ్యులర్గా సమిట్లలో చర్చలు జరుపుతుంది. ప్రతిపాదిత సీ5 మొదటి అజెండా.. మధ్యప్రాచ్య భద్రత, ముఖ్యంగా ఇజ్రాయెల్-సౌదీ అరేబియా అధికారిక సంబంధాలను సాధారణీకరణ చేయడం” అని రిపోర్ట్ తెలిపింది.
పొలిటికో పత్రిక తెలిపిన వివరాల ప్రకారం.. కోర్ ఫైవ్ కూటమి ఏర్పాటు యోచన ఉందన్న ప్రచారాన్ని వైట్ హౌస్ ఖండించింది. ప్రెస్ సెక్రటరీ హాన్నా కెల్లి దీనిపై స్పందిస్తూ “33 పేజీల అధికారిక ప్లాన్ను విడుదల చేశాం. అంతేగానీ.. దానికి ప్రత్యామ్నాయ, ప్రైవేట్, సీక్రెట్ వెర్షన్ వంటిది ఏదీ లేదు” అని చెప్పారు. కాగా, కోర్ ఫైవ్ కూటమి ఏర్పాటు యోచన ఉందన్న ప్రచారంపై అమెరికా మిత్రదేశాలు ఆందోళన చెందుతున్నట్లు తెలుస్తోంది.
