Donald Trump
US Elections Results : అమెరికా అధ్యక్ష ఎన్నికల ఓటింగ్ ప్రశాంతంగా సాగుతోంది. అమెరికాకు 47వ అధ్యక్షుడిని ఎన్నుకునేందుకు పోలింగ్ కేంద్రాల వద్దకు ఓటర్లు పోటెత్తారు. భారత కాలమానం ప్రకారం.. మంగళవారం సాయంత్రం 4గంటలకు ఓటింగ్ ప్రక్రియ ప్రారంభం కాగా.. బుధవారం ఉదయం 9గంటల వరకు ఓటింగ్ కొనసాగే అవకాశం ఉంది. ఓటింగ్ సరళిని బట్టి రిపబ్లికన్ అభ్యర్ధి డొనాల్డ్ ట్రంప్, డెమోక్రటిక్ అభ్యర్ధి కమలా హారిస్ మధ్య పోటీ హోరాహోరీగా ఉన్నట్లు తెలుస్తోంది. అయితే, ఫలితాలు వెల్లడవుతున్నా కొద్దీ డొనాల్డ్ ట్రంప్ ఆధిక్యం పెరుగుతోంది.
Also Read: Kamala Harris: యూఎస్ అధ్యక్ష ఎన్నికల పోలింగ్.. బయటకు వచ్చి ఓటు వేయండి : అమెరికన్లకు హారిస్ పిలుపు
అమెరికా అధ్యక్ష ఎన్నికలకు పలు రాష్ట్రాల్లో ఓటింగ్ జరుగుతుండగా.. ఇప్పటికే ఓటింగ్ పూర్తయిన రాష్ట్రాల్లో ఫలితాలు వెల్లడవుతున్నాయి. ప్రస్తుతానికి వెల్లడయిన ఫలితాల్లో రిపబ్లికన్ పార్టీ అభ్యర్ధి డొనాల్డ్ ట్రంప్ ముందంజలో ఉన్నారు. ట్రంప్ తొమ్మిది రాష్ట్రాల్లో విజయం సాధించాడు. అలబామా, ఫ్లోరిడా, ఇండియానా, కెంటకీ, మిసిపిపి, ఓక్లహోమా, సౌత్ కరోలినా, టెన్నెసీ, వెస్ట్ వర్జీనియా రాష్ట్రాలు ట్రంప్ వశం అయ్యాయి. వెర్మాంట్, రోడ్ ఐల్యాండ్, మేరీ ల్యాండ్, మసాచుసెట్స్, కనెక్టికట్ లో కమల హారిస్ విజయం సాధించారు. ఇప్పటి వరకు డొనాల్డ్ ట్రంప్ 100కుపైగా ఎలక్టోరల్ ఓట్లు సాధించగా.. కమలా హారిస్ వెనుకబడిపోయింది. ఆమెకు కేవలం 35 ఎలక్టోరల్ ఓట్లు వచ్చాయి.
అమెరికా అధ్యక్ష ఎన్నిక పరోక్ష ఎన్నిక. అంటే.. ప్రజలు నేరుగా అధ్యక్షుడిని ఎన్నుకోరు. అమెరికా ఓటర్లు.. ప్రస్తుత ఎన్నికల్లో డొనాల్డ్ ట్రంప్, కమలా హారిస్ లేదా ఇతర అభ్యర్థులకే ఓటు వేసినా.. అధ్యక్షుడిని నేరుగా ఎన్నుకోవడం లేదు. అధ్యక్షుడిని నిర్ణయించే ఎలక్టోరల్ కాలేజీ ప్రతినిధులను మాత్రమే ప్రజలు ఎన్నుకుంటున్నారు. మొత్తం అన్ని రాష్ట్రాల్లో కలిపి 538 ఎలక్టోరల్ కాలేజీ సీట్లుంటాయి. ఈ 538 మందిలో 270 వచ్చినా వారు అధ్యక్షులవుతారు.
