kidnapping case Bhuma Akhila Priya family : తెలుగు రాష్ట్రాల్లో సంచలనం సృష్టించిన బోయినపల్లి కిడ్నాప్ కేసులో కీలక మలుపులు చోటు చేసుకుంటున్నాయి. బోయినపల్లి కిడ్నాప్ కేసులో ప్రధాన సూత్రధారి అని పోలీసులు చెబుతున్న ఏపీ మాజీ మంత్రి భూమా అఖిలప్రియ కుటుంబం చుట్టూ మరింత ఉచ్చు బిగుస్తోంది. ఈ కేసులో అఖిలప్రియతో పాటు ఆమె భర్త భార్గవ రామ్, టీడీపీ నేత ఏవీ సుబ్బారెడ్డిలను కీలక నిందితులుగా పోలీసులు ఎఫ్ఐఆర్‌లో నమోదు చేశారు. హఫీజ్‌పేట్‌ భూ వివాదమే కిడ్నాప్ వ్యవహారానికి ప్రధాన కారణమని పోలీసులు వెల్లడించారు.
ప్రవీణ్ రావు సోదరుల కిడ్నాప్ :-
వ్యాపారవేత్తలైన బ్యాడ్మింటన్ ప్లేయర్ ప్రవీణ్ రావు సోదరుల కిడ్నాప్ కేసును తక్కువ సమయంలో చేధించిన పోలీసులు ఈ కేసులో ప్రధాన నిందితురాలిగా ఏపీ మాజీ మంత్రి భూమా అఖిలప్రియను అదుపులోకి తీసుకున్న సంగతి తెలిసిందే. భూమా అఖిలప్రియకు కోర్టు రిమాండ్ విధించగా 14 రోజుల జ్యుడిషియల్ రిమాండ్ కోసం ఆమెను చంచల్ గూడ జైలుకు తరలించారు. ఈ క్రమంలో అఖిల ప్రియ కోర్టులో తనకు బెయిల్ మంజూరు చేయాలంటూ పిటిషన్ దాఖలు చేశారు. తన అనారోగ్య కారణాల దృష్ట్యా, తాను గర్భవతి అయిన కారణంగా తనకు బెయిల్ మంజూరు చేయాలని బెయిల్ పిటిషన్ దాఖలు చేశారు. భూమా అఖిలప్రియ తరఫు న్యాయవాది సికింద్రాబాద్ కోర్టులో బెయిల్ కోసం వాదనలు వినిపించారు.
ఇంకెన్ని కీలక మలుపులు :-
ఎఫ్ఐఆర్‌లో ముందు ఏ2 గా ఉన్న అఖిలప్రియను ఏ1 గా మార్చారని, అంతేకాకుండా ప్రజాప్రతినిధిగా ఉన్న అఖిలప్రియకు 41 సీఆర్‌పీసీ నోటీసులు కూడా ఇవ్వలేదని కోర్టు దృష్టికి తీసుకు వెళ్లారు న్యాయవాది. అఖిలప్రియ ఆరోగ్యం బాగోలేదని అందువల్ల ఆమెకు బెయిల్ మంజూరు చేయాలని కోర్టుకు విజ్ఞప్తి చేశారు. ఆమెకు బెయిల్ మంజూరు చేస్తే సాక్ష్యాలు తారుమారు అవుతాయని ప్రభుత్వం తరఫు న్యాయవాది వాదించారు. మాజీ మంత్రి అయినందున అధికారాన్ని, పలుకుబడిని ఉపయోగించి… సాక్ష్యాలు తారుమారు చేయించే అవకాశం ఉన్నందున అఖిలప్రియకు బెయిల్ మంజూరు చేయవద్దని కోర్టు దృష్టికి తీసుకెళ్లారు.
ఈ వ్యవహారంలో కౌంటరు దాఖలు చేయాలని పోలీసులను కోర్టు ఆదేశించింది. ఈ నేపథ్యంలో కోర్టులో పోలీసులు కౌంటర్ దాఖలు చేయనున్నారు. మరోపక్క భూమా అఖిలప్రియ భర్త భార్గవ్ రామ్ ఇంకా పరారీలోనే ఉన్నాడు. ముందు ముందు ఈ కేసు మరెన్ని కీలక మలుపులు తిరుగుతుందో అన్న అనుమానం వ్యక్తం అవుతోంది.
