Garlic Health Benefits : చలికాలంలో జలుబు, ఫ్లూ వంటి అనేక సీజనల్ వ్యాధులు చుట్టుముడుతుంటాయి. ఇటువంటి కీలక సమయంలో రోగనిరోధక శక్తిని కాపాడుకోవడానికి మనల్ని మనం వ్యాధుల నుంచి రక్షించుకోవడానికి వెల్లుల్లి గొప్ప మార్గం. అందుకే ఈ సీజన్లో తీసుకునే ఆహారంలో వెల్లుల్లి భాగం చేసుకోవటం మంచిది. వెల్లుల్లిలో విటమిన్లు, ఖనిజాలు, కాల్షియం, ఐరన్ సమృద్ధిగా ఉంటాయి.
పురాతన కాలం నుంచి ఆయుర్వేదంలో వెల్లుల్లిని ఔషధాల్లో ఉపయోగించే వారు. మధుమేహ రోగులు కూడా తరచూ దీన్ని తినడం వల్ల రక్తంలో చక్కెర స్థాయిలు అదుపులో ఉంటాయి. గొంతు కండరాల నొప్పిని తగ్గించడంలో సహాయపడుతుంది. వెల్లుల్లి నీళ్ళని తాగడం వల్ల ఆరోగ్య సమస్యలు దరి చేరవు. ఇందులో యాంటీ బ్యాక్టీరియల్, యాంటీ వైరల్ లక్షణాలు ఉన్నాయి. శీతాకాలంలో వచ్చే రోగాలని అడ్డుకుంటుంది. వెల్లుల్లిలోని గుణాలు శరీరంలో రక్తసరఫరా బాగా జరిగేలా చూస్తాయి.
చలికాలంలో వెల్లుల్లి వల్ల ప్రయోజనాలు ;
1. వెల్లుల్లి బరువు తగ్గడానికి సహాయపడుతుంది. జలుబు, దగ్గుని నివారించడంలో తోడ్పడుతుంది. శ్వాసకోశ వ్యవస్థని ఆరోగ్యంగా ఉంచుతుంది.
2. శరీరాన్ని డిటాక్స్ చేయడంలో సహాయకారిగా ఉపయోగపడుతుంది. కండరాల వాపు, గొంతు నొప్పిని తగ్గిస్తుంది. యాంటీ ఇన్‌ఫ్లమేటరీగా పనిచేస్తుంది.
3. ఆర్థరైటిస్ తో బాధపడే వాళ్ళు మృదులాస్థి దెబ్బతినకుండా నిరోధించడానికి వెల్లుల్లి నూనెని ఉపయోగిస్తుంటారు.
4. వెల్లుల్లి గుండె ఆరోగ్యాన్ని మెరుగుపరుస్తుంది. అల్జీమర్స్, డీమెన్షియా వంటి క్షీణించిన వ్యాధులని నివారించడంలో వెల్లుల్లి బాగా సహాయపడుతుంది. రక్త నాళాలను శుభ్రపరిచి గుండెకి రక్త ప్రసరణ బాగా జరిగేలా చూస్తుంది.
5. చలికాలంలో కొలెస్ట్రాల్ స్థాయిని తగ్గిస్తుంది. చర్మం, జుట్టు ఆరోగ్యాన్ని ప్రోత్సాహిస్తుంది. జలుబు, ఫ్లూ వంటి వైరస్ లతో పోరాడే తెల్ల రక్త కణాల సామర్థ్యాన్ని పెంచుతుంది.
6. చల్లని వాతావరణం వల్ల శరీరంలో జీవక్రియ నెమ్మదిస్తుంది. వెల్లుల్లిలోని సహజ ఔషధ గుణాలు జీర్ణప్రక్రియను వేగవంతం చేస్తాయి.
