ఇడ్లీ, చెట్నీ, సాంబార్.. ఓ డీల్.. డీకే, సిద్ధరామయ్య మధ్య కుదిరిన ఒప్పందం ఇదే?

Siddaramaiah And DK Shivakumar

Siddaramaiah: కర్ణాటక ముఖ్యమంత్రి సిద్ధరామయ్య, ఉప ముఖ్యమంత్రి డీకే శివకుమార్ మధ్య రాజీ కుదిరింది. ముఖ్యమంత్రి పదవి అంశంపై ఇటీవల ఇద్దరి మధ్య సత్సంబంధాలు దిగజారినప్పటికీ ఓ పరిష్కార మార్గం దొరకడంతో అవి సమసిపోయాయి. ఇవాళ ఉదయం వారిద్దరు కలిసి బ్రేక్‌ఫాస్ట్ చేస్తూ ఇక తమ మధ్య ఉన్న వివాదాలు ముగిసినట్టేనన్న సంకేతాలు ఇచ్చారు.

ఏం జరిగింది?
కర్ణాటకలో కాంగ్రెస్ ప్రభుత్వం ఏర్పడి రెండున్నరేళ్లు అవుతోంది. ఆ రాష్ట్ర ఎన్నికల్లో కాంగ్రెస్‌ గెలిచిన సమయంలో సిద్ధరామయ్య, డీకే శివకుమార్‌లో ముఖ్యమంత్రి ఎవరన్న విషయంపై గందరగోళం నెలకొనగా, రెండున్నరేళ్లు సిద్ధరామయ్య.. ఆ తర్వాత మరో రెండున్నరేళ్లు డీకే శివకుమార్‌ ముఖ్యమంత్రిగా ఉంటారని ఒప్పందం చేసుకున్నట్లు ప్రచారం జరిగింది. (Siddaramaiah)

అయితే, కాంగ్రెస్‌ అటువంటి ఒప్పందం ఏమీ జరగలేదని చెబుతోంది. ఇప్పుడు కర్ణాటకలో కాంగ్రెస్ ప్రభుత్వం ఏర్పడి రెండున్నరేళ్లు అవుతోన్న నేపథ్యంలో ఇక డీకే శివకుమార్ తనకు ముఖ్యమంత్రి పదవిని ఇవ్వాలని డిమాండ్ చేసినట్లు వార్తలు వచ్చాయి.

ఈ నేపథ్యంలోనే ఏఐసీసీ సూచనల మేరకు ఇవాళ సిద్ధరామయ్య, డీకే శివకుమార్ బ్రేక్‌ఫాస్ట్ చేసి, మీడియా సమావేశం నిర్వహించారు. 2028లో జరిగే కర్ణాటక అసెంబ్లీ ఎన్నికల్లో విజయం సాధించడమే తమ లక్ష్యమని, నాయకత్వం అంశంలోనూ పార్టీ అగ్రనాయకత్వ నిర్ణయమే ఫైనల్‌ అని చెప్పుకొచ్చారు.

Also Read: ఆ స్లీపర్ బస్సులు ఇక వాడొద్దు.. అన్ని రాష్ట్రాలకు ఎన్‌హెచ్‌ఆర్‌సీ ఆదేశాలు

కొత్త ఫార్ములా.. ఏం జరగనుంది?
బయటకు చెప్పకపోయినప్పటికీ ముఖ్యమంత్రి పదవి అంశంపై సిద్ధరామయ్య, డీకే శివకుమార్ ఓ కొత్త ఫార్ములాకు అంగీకరించినట్లు ప్రచారం జరుగుతోంది. అయితే, రాజకీయ విశ్లేషకులు చెబుతున్న వివరాల ప్రకారం.. డీకే శివకుమార్ త్వరలోనే ఎటువంటి గందరగోళం లేకుండా ముఖ్యమంత్రి అయ్యే అవకాశాలు బలంగా కనిపిస్తున్నాయి.

కొందరి అంచనాల ప్రకారం.. 2026 మార్చి లేదా ఏప్రిల్‌లోనే డీకే శివకుమార్ ముఖ్యమంత్రి అవుతారు. అనలిస్టులు ‘కాంప్రమైస్ ఫార్ములా’ అని పిలుస్తున్న ఈ ఒప్పందం ప్రకారం.. శివకుమార్ ముఖ్యమంత్రి కుర్చీలో కూర్చునే వరకు ప్రశాంతంగా డిప్యూటీ ముఖ్యమంత్రిగా కొనసాగాలని హైకమాండ్‌ నుంచి సూచనలు ఉన్నాయి.

దానికి ప్రతిఫలంగా పార్టీలోని శివకుమార్ అనుకూల నేతలకు మరిన్ని క్యాబినెట్ హోదాలు ఇవ్వడం, శివకుమార్ కర్ణాటక కాంగ్రెస్ చీఫ్‌గా కొనసాగడం వంటివి ఉంటాయని విశ్లేషకులు అంటున్నారు. చివరికి 2028 ఎన్నిక సమయంలో శివకుమార్ నాయకత్వానికి సిద్ధరామయ్య పూర్తిగా మద్దతు ఇస్తారని అంచనా.

శివకుమార్ కాస్త వెనక్కి తగ్గడానికి కారణం.. కర్ణాటక కాంగ్రెస్‌లో పూర్తిస్థాయిలో మద్దతు ఆయన వద్ద లేదు. కాంగ్రెస్‌ కూడా సిద్ధరామయ్యలాంటి అనుభవజ్ఞులైన నేతను తొలగిస్తే పార్టీకి నష్టం అవుతుందని భావిస్తోంది. ఈ పరిస్థితుల్లో శివకుమార్‌కు ఇదే మంచి ఒప్పందమని విశ్లేషకులు చెబుతున్నారు.

అయితే ఈ ‘కాంప్రమైస్ ఫార్ములా’లోనూ మార్పులు చోటుచేసుకునే అవకాశం ఉందన్న వాదనలు ఉన్నాయి. సిద్ధరామయ్య తన మాట నిలబెట్టుకుంటారని శివకుమార్ నమ్ముతారా? ఎందుకంటే అధికార భాగస్వామ్యంపై చివరి నిమిషంలో మార్పులు వచ్చే పరిస్థితులను కర్ణాటక రాజకీయాల్లో తరచూ చూస్తున్నాం.

గతంలో ఇచ్చిన మాటకే దిక్కులేదు ఇప్పుడు కొత్తగా ఇచ్చే మాటకు విలువ ఉంటుందా? అన్న ప్రశ్నలూ తలెత్తుతున్నాయి. 2028 ఎన్నికల ముందు సరైన సమయానికే అధికార మార్పు జరిగేలా కాంగ్రెస్ హైకమాండ్ పర్యవేక్షించగలదా? అన్నదీ డౌటే. 2028లో కర్ణాటక ఎన్నికల నాటికి సిద్ధరామయ్య సైడ్ అయిపోవాలి. డీకేకి సపోర్ట్ చేయాలి. వచ్చే ఎన్నికల నాటికి డీకేనే సీఎం అభ్యర్థి. దాన్ని తిరస్కరించే ప్రయత్నం ప్రస్తుతం సిద్ధు చేయకపోవచ్చు. ఆయన దగ్గర ఆ స్థాయిలో ఎమ్మెల్యేలు లేరు.