ఆ స్లీపర్ బస్సులు ఇక వాడొద్దు.. అన్ని రాష్ట్రాలకు ఎన్‌హెచ్‌ఆర్‌సీ ఆదేశాలు
ఈ మేరకు ఎన్‌హెచ్‌ఆర్‌సీ అన్ని రాష్ట్రాలు, కేంద్రపాలిత ప్రాంతాల చీఫ్‌ సెక్రటరీలకు తీవ్ర హెచ్చరికతో లేఖ పంపింది.
- Published By: 10TV Digital Team ,Published On : November 29, 2025 / 04:34 PM IST
Public Transport: దేశంలో ఇటీవల జరిగిన వరుస బస్సు ప్రమాదాలు ప్రజల్లో తీవ్ర భయందోళనలు సృష్టిస్తున్న వేళ జాతీయ మానవ హక్కుల కమిషన్ కీలక ఆదేశాలు జారీ చేసింది. భద్రతా ప్రమాణాల ప్రకారంలేని స్లీపర్ బస్సులను పక్కనపెట్టాలని చెప్పింది.
ఈ మేరకు ఎన్‌హెచ్‌ఆర్‌సీ అన్ని రాష్ట్రాలు, కేంద్రపాలిత ప్రాంతాల చీఫ్‌ సెక్రటరీలకు తీవ్ర హెచ్చరికతో లేఖ పంపింది. ప్రజా రవాణా బస్సుల్లో డిజైన్ లోపాలు, వాహన అనుమతి ప్రక్రియల్లో వ్యవస్థాత్మక తప్పులు ఉన్నాయని ఆందోళన వ్యక్తం చేసింది. అక్టోబరు 14న రాజస్థాన్‌ జైసల్మేర్–జోధ్‌పూర్ హైవేపై జరిగిన స్లీపర్ బస్ అగ్నిప్రమాదంపై వచ్చిన ఫిర్యాదుతో ఎన్‌హెచ్‌ఆర్‌సీ ఈ చర్యలు తీసుకుంటోంది. (Public Transport)
సెంట్రల్ ఇన్‌స్టిట్యూట్ ఆఫ్ రోడ్ ట్రాన్స్‌పోర్ట్‌ (సీఐఆర్టీ) తన పరిశీలనలో ఏఐఎస్‌-052, ఏఐఎస్‌-119 భద్రత ప్రమాణాల ఉల్లంఘనలు గుర్తించింది. ఫైర్ కంట్రోల్ వ్యవస్థలు లేకపోవడం, లోపలి విభాగాల డిజైన్ తప్పుగా ఉండడం వంటివి వెలుగులోకి వచ్చాయి.
బస్సులో డ్రైవర్ ఉండే ప్రదేశాన్ని (డ్రైవర్ కేబిన్‌ను) బస్సు ప్రయాణికుల భాగం కనపడకుండా వేరుగా నిర్మించడం వల్ల డ్రైవర్‌కు వెనుక భాగంలో అగ్ని ప్రమాదం జరిగితే వెంటనే గుర్తించే అవకాశం తగ్గిపోతుంది.
Also Read: Vladimir Putin: పుతిన్‌ 2 రోజుల భారత పర్యటన.. ఎందుకింత ప్రాధాన్యం సంతరించుకుందంటే?
అలాగే అత్యవసర సమయాల్లో ప్రయాణికులు డ్రైవర్‌తో మాట్లాడే అవకాశం కూడా తగ్గిపోతుంది. ఇటువంటి లోపాల వల్ల రహదారులపై ప్రమాదాల తీవ్రత ఎక్కువవుతోందని, ప్రమాదం జరిగినప్పుడు ప్రాణనష్టం ఘటనలకు కారణమయ్యాయని పేర్కొంది.
ఇటువంటి అన్‌సేఫ్‌ డిజైన్ విధానాలు రాజ్యాంగం ఆర్టికల్ 21లోని జీవించే హక్కుకు భంగం కలిగిస్తున్నాయని ఫిర్యాదుదారు పేర్కొన్నారు. బస్సు తయారీదారులు, అనుమతి ఇచ్చే అధికారులు నిర్లక్ష్యంగా వ్యవహరిస్తున్నారని చెప్పారు. దీనిపై వెంటనే చర్యలు తీసుకోవడం అవసరమని, డిజైన్‌ను మెరుగుపర్చడం తప్పనిసరి చేయాలని, బాధ్యులపై చర్యలు చేపట్టాలని అన్నారు. బాధితులకు పరిహారం అందే విధానాలు కూడా అమలు చేయాలని డిమాండ్ చేశారు.
ఎన్‌హెచ్‌ఆర్‌సీ తన లేఖలో రవాణా మంత్రిత్వశాఖ, పుణే సీఐఆర్టీ డైరెక్టర్‌కు నోటీసులు జారీ చేయాలని రిజిస్ట్రీకి ఆదేశించింది. సమగ్రంగా దర్యాప్తు చేసి రెండు వారాల్లో కార్యాచరణ నివేదిక ఇవ్వాలని సూచించింది.
అదనంగా, దేశవ్యాప్తంగా భద్రతా ప్రమాణాల అమలు, సరిగ్గాలేని బస్సులపై రాష్ట్రస్థాయి రీకాల్‌ చర్యలు, అనుమతి ఇచ్చిన అధికారుల నిర్లక్ష్యంపై క్రిమినల్ దర్యాప్తు కోరింది. అలాగే బాధితులకు పరిహారాన్ని అందించే సరైన వ్యవస్థను ఏర్పాటు చేయాలని సూచించింది.
ఏఐఎస్‌-052, ఏఐఎస్‌-119 ప్రమాణాలు ఆటోమోటివ్ రీసెర్చ్ అసోసియేషన్ ఆఫ్ ఇండియా (ఎఆర్ఏఐ) రూపొందించినవి. సెంట్రల్ మోటార్ వెహికిల్స్ రూల్స్ 1989 ప్రకారం బస్సుల నిర్మాణం, ఫైర్ సేఫ్టీ విధానాలు వీటిలో ఉంటాయి.
