National Herald Case: నేషనల్ హెరాల్డ్ మనీలాండరింగ్ కేసులో కాంగ్రెస్ అగ్ర నేతలు సోనియా గాంధీ, రాహుల్ గాంధీపై కొత్త ఎఫ్ఐఆర్ నమోదైంది. నేరపూరిత కుట్ర అభియోగాలపై వారి పేర్లను ఢిల్లీ పోలీస్ ఎకనామిక్ ఆఫెన్సెస్ వింగ్ చేర్చింది.
మొత్తం ఆరుగురిపై దాఖలు చేసిన ఈ కొత్త ఎఫ్ఐఆర్లో వీరిద్దరి పేర్లు ఉన్నాయి. ఎఫ్ఐఆర్లో శ్యామ్ పిట్రోడా, సుమన్ దూబే, సునీల్ భండారి, మరో వ్యక్తి పేర్లతో పాటు అసోసియేటెడ్ జర్నల్స్ లిమిటెడ్ (ఏజీఎల్), యంగ్ ఇండియన్, డోటెక్స్ మర్చండైజ్ ప్రైవేట్ లిమిటెడ్ పేర్లను చేర్చారు. ఏజీఎల్‌ను తప్పుడు రీతిలో స్వాధీనం చేసుకునేందుకు నేరపూరిత కుట్ర జరిగిందని ఆ ఎఫ్ఐఆర్లో పేర్కొన్నారు. (National Herald Case)
Also Read: పాకిస్థాన్‌ రాజ్యాంగంలో సవరణలు.. ఐక్యరాజ్య సమితి వార్నింగ్.. ప్రమాదం పొంచి ఉందా?
డోటెక్స్ మర్చండైజ్ అనే కోల్‌కతా బేస్డ్‌ షెల్ కంపెనీ.. యంగ్ ఇండియన్ సంస్థకు రూ.కోటి ఇచ్చింది. యంగ్ ఇండియన్‌లో సోనియా, రాహుల్‌కు 76 శాతం షేర్‌లు ఉన్నాయి. ఈ లావాదేవీ ద్వారా కాంగ్రెస్‌కు యంగ్ ఇండియన్ రూ.50 లక్షలు చెల్లించి ఏజీఎల్‌ను తన నియంత్రణలోకి తెచ్చుకుందని ఆరోపణ. ఏజీఎల్‌కు సుమారు రూ.2,000 కోట్లు విలువైన ఆస్తులు ఉన్నాయి.
ఢిల్లీ పోలీసుకు ఈడీ తన దర్యాప్తు నివేదిక ఇచ్చింది. ఎఫ్ఐఆర్ తేదీని అక్టోబర్ 3గా పేర్కొన్నారు. దీన్ని ఈడీ ఫిర్యాదు ఆధారంగా నమోదు చేశారు. ఏదైనా ఏజెన్సీని షెడ్యూల్డ్ క్రైమ్‌ నమోదు దర్యాప్తు చేయాలని ప్రివెన్షన్ ఆఫ్ మనీలాండరింగ్ యాక్ట్‌ (పీఎంఎల్ఏ) సెక్షన్ 66(2) కింద ఈడీ కోరవచ్చు.
నేషనల్ హెరాల్డ్ కేసుపై ఢిల్లీ కోర్టు తన నిర్ణయాన్ని డిసెంబర్ 16కి వాయిదా వేస్తామని తెలిపిన సమయంలో ఈ ఎఫ్ఐఆర్ అంశం బయటకు వచ్చింది. నేషనల్ హెరాల్డ్ కేసు 2012 నుంచి ఉంది. బీజేపీ నేత సుబ్రహ్మణ్య స్వామి స్థానిక కోర్టులో ఈ కేసు దాఖలు చేశారు. నేషనల్ హెరాల్డ్ పత్రికను ఏజీఎల్ ప్రచురించింది.
