India vs Australia Test Series: భారత్ వర్సెస్ ఆస్ట్రేలియా జట్ల మధ్య టెస్ట్ సిరీస్‌కు అంతా సిద్ధమైంది. రేపటి నుంచి ఇరు జట్ల మధ్య నాలుగు టెస్టు మ్యాచ్‌ల సిరీస్ ప్రారంభమవుతుంది. తొలి టెస్టు ఫిబ్రవరి 9 నుంచి 13వ తేదీ వరకు నాగ్‌పూర్ వేదికగా జరుగుతుంది. ఇరు జట్ల ఆటగాళ్లు ప్రాక్టీస్‌లో నిమగ్నమయ్యారు. అయితే, తొలి టెస్టుకు ముందే ఆస్ట్రేలియా జట్టుకు మరో షాక్ తగిలింది. ఆ జట్టుకు చెందిన ఫాస్ట్ బౌలర్, ఆల్ రౌండర్ కెమెరూన్ గ్రీన్ తొలి టెస్టు మ్యాచ్‌కు దూరమైనట్లు తెలుస్తోంది. ఈ విషయాన్ని ఆసీస్ కెప్టెన్ స్టీవ్ స్మిత్ సైతం దృవీకరించారు. అయితే, చివరి వరకు వేచిచూస్తామని అన్నారు.
కెమెరూన్ ఆడే విషయంపై స్మిత్ మాట్లాడుతూ.. నాగ్‌పూర్ టెస్టులో ఆడేందుకు గ్రీన్‌కు ఇబ్బందిగా ఉందని చెప్పాడు. గ్రీన్ నెట్స్‌లో ప్రాక్టీస్‌లో కూడా పాల్గొనలేదని, ఈ క్రమంలో తొలి టెస్టుకు అతను దూరమయ్యే అవకాశాలే ఎక్కువగా ఉన్నాయని తెలిపాడు. మ్యాచ్ ప్రారంభ సమయం వరకు వేచిచూస్తామని, ఆ సమయంలోపు గ్రీన్ మ్యాచ్‌కు అన్నివిధాల సిద్ధమైతే తుది జట్టులో ఎంపిక చేస్తామని, లేకుంటే విశ్రాంతి ఇస్తామని స్మిత్ చెప్పాడు.
భారత్ జట్టుతో ఆసీస్ నాలుగు టెస్టు మ్యాచ్‌లను ఆడనుంది. ఇప్పటికే ఆ జట్టు ఫాస్ట్ బౌలర్ జోష్ హేజిల్‌వుడ్ కూడా తొలి టెస్టుకు దూరమైన విషయం విధితమే. తాజాగా కామెరాన్ గ్రీన్ కూడా గాయం కారణంగా తొలి టెస్టుకు ఆడేది అనుమానంగా మారడంతో ఆ జట్టుకు ఇబ్బందికర పరిస్థితిగానే క్రికెట్ విశ్లేషకులు అభిప్రాయ పడుతున్నారు.
భారత్ వర్సెస్ ఆస్ట్రేలియా టెస్టు మ్యాచ్‌ల తేదీలు ..
1వ టెస్ట్ – ఫిబ్రవరి 9 నుండి 13 వరకు (నాగ్‌పూర్)
2వ టెస్ట్ – ఫిబ్రవరి 17 నుండి 21వ తేదీ వరకు (ఢిల్లీ)
3వ టెస్ట్ – మార్చి 1 నుండి 5వ తేదీ వరకు (ధర్మశాల)
4వ టెస్ట్ – మార్చి 9 నుంచి 13 వ తేదీ వరకు (అహ్మదాబాద్)
