India Vs Pakistan Match: భారత్‌తో ఆడాలంటే.. ఐసీసీ ముందు పాకిస్తాన్ క్రికెట్ బోర్డు పెట్టిన డిమాండ్లు ఇవే..!

BCCI PCB Representative Image (Image Credit To Original Source)

• భారత్-పాకిస్తాన్ మధ్య ద్వైపాక్షిక క్రికెట్ పునఃప్రారంభించాలి
• బంగ్లాదేశ్, పాకిస్తాన్, భారత్ తో కూడిన ముక్కోణపు సిరీస్ నిర్వహించాలి
• భారత్-పాకిస్తాన్ మ్యాచ్ ద్వారా రూ.2,200 కోట్ల ఆదాయం..!

India Vs Pakistan Match: టీ20 వరల్డ్ కప్ లో భారత్ తో మ్యాచ్ ను పాకిస్తాన్ బాయ్ కాట్ చేసిన సంగతి తెలిసిందే. దీనిపై ఆదివారం పాకిస్తాన్ క్రికెట్ బోర్డుతో ఐసీసీ డిస్కస్ చేసింది. పాక్ వైఖరి తెలుసుకునే ప్రయత్నం చేసింది. ఈ సందర్భంగా భారత్ తో మ్యాచ్ ఆడేందుకు పాకిస్తాన్ క్రికెట్ బోర్డ్ అంతర్జాతీయ క్రికెట్ కౌన్సిల్ (ఐసీసీ) ముందు పలు డిమాండ్లు ఉంచింది. భారత్-పాకిస్తాన్ మధ్య ద్వైపాక్షిక సిరీస్.. బంగ్లాదేశ్, పాకిస్తాన్, భారత్ మధ్య ముక్కోణపు సిరీస్, వచ్చే ఏడాది బంగ్లాదేశ్ లో భారత్ పర్యటన.. ఇలాంటి డిమాండ్లను ఐసీసీ ముందు ఉంచింది పాకిస్తాన్. అయితే, పాక్ డిమాండ్లను ఐసీసీ తిరస్కరించింది. అది మా పరిధిలో లేదు అని పాక్ క్రికెట్ బోర్డుకు ఐసీసీ తేల్చి చెప్పింది. కాగా, బంగ్లాదేశ్ కు మద్దతుగా ఫిబ్రవరి 15న కొలంబోలో భారత్ తో జరగాల్సిన మ్యాచ్ ను బహిష్కరించాలని పాక్ నిర్ణయం తీసుకున్న సంగతి తెలిసిందే.

పాకిస్తాన్ ప్రధాని షెహబాజ్ షరీఫ్‌ను సంప్రదించి బోర్డు వైఖరిని ధృవీకరించడానికి పీసీబీ చైర్మన్ మొహ్సిన్ నఖ్వీకి ఒక రోజు సమయం ఇచ్చింది ఐసీసీ. గ్లోబల్ గవర్నింగ్ బాడీ సోమవారం సాయంత్రం లేదా మంగళవారం ఉదయం భారత్-పాకిస్తాన్ మ్యాచ్ స్థితిపై అధికారిక ప్రకటన చేసే అవకాశం ఉంది.

ఆదివారం ఐదు గంటలకు పైగా జరిగిన ఈ సమావేశంలో పాకిస్తాన్ అంతర్గత మంత్రిగా కూడా పనిచేస్తున్న మొహ్సిన్ నఖ్వీ, ఐసీసీ డిప్యూటీ చైర్మన్ ఇమ్రాన్ ఖ్వాజా పాల్గొన్నారు. ముఖ్యంగా, బంగ్లాదేశ్ క్రికెట్ బోర్డు అధ్యక్షుడు అమీనుల్ ఇస్లాం బుల్బుల్ కూడా చర్చలలో పాల్గొనడానికి లాహోర్ వెళ్లారు.

T20 ప్రపంచ కప్‌లో భారత్‌తో తమ జట్టు ఆడేందుకు అనుమతి నిరాకరించింది పాక్ ప్రభుత్వం. అయితే, దీనికి సంబంధించిన వివరాలను అప్పుడు తెలుపలేదు. కొంత సమయం తర్వాత దీనిపై పాక్ ప్రధాని షరీఫ్ కీలక వ్యాఖ్యలు చేశారు. బంగ్లాదేశ్‌కు మద్దతుగా ఈ నిర్ణయం తీసుకున్నామని చెప్పారు. ఐసీసీ పక్షపాత వైఖరిని ప్రదర్శిస్తోందని ఆయన మండిపడ్డారు.

ఆ 5 డిమాండ్లు ఏమిటి?

మొత్తంగా, ఐసీసీ ముందు ఐదు డిమాండ్లు ఉంచింది పీసీబీ. బంగ్లాదేశ్ పట్ల ఐసీసీ వ్యవహరించిన తీరును పాక్ తీవ్రంగా తప్పు పడుతోంది. ఐసీసీతో చర్చల్లో దాన్నే హైలైట్ చేస్తోంది.

మొదటి డిమాండ్..
టీ20 ప్రపంచ కప్ నుండి వైదొలిగినందుకు బంగ్లాదేశ్ శిక్షించబడకూడదు. ICC ఆదాయంలో దాని పూర్తి వాటాను పొందాలి.

రెండో డిమాండ్..
పౌర అశాంతి కారణంగా గత సంవత్సరం మహిళల T20 ప్రపంచ కప్‌ను బంగ్లాదేశ్ నుండి దుబాయ్‌కు మార్చారు. దీనికి పరిహారంగా బంగ్లాదేశ్‌కు గ్లోబల్ టోర్నమెంట్‌ను కేటాయించాలి. అండర్-19 ప్రపంచ కప్‌ను ప్రత్యామ్నాయంగా సూచించింది.

మూడో డిమాండ్..
పాకిస్తాన్‌తో ద్వైపాక్షిక క్రికెట్‌ను తిరిగి ప్రారంభించడానికి భారత్ ని ప్రోత్సహించాలని డిమాండ్ చేసింది. ఈ అభ్యర్థనను ఐసీసీ తిరస్కరించింది. ద్వైపాక్షిక సిరీస్‌లు దాని అధికార పరిధికి వెలుపల వస్తాయని తేల్చి చెప్పింది.

2025లో వాయిదా పడిన సిరీస్ కోసం ఈ ఏడాది చివర్లో భారత్ బంగ్లాదేశ్‌లో పర్యటించాలనే డిమాండ్ మాదిరిగానే.. భారత్-పాకిస్తాన్-బంగ్లాదేశ్ ట్రై-సిరీస్ ప్రతిపాదనను కూడా తిరస్కరించింది. అటువంటి ద్వైపాక్షిక లేదా త్రైపాక్షిక ఏర్పాట్లు దాని అధికారం పరిధిలో లేవని ICC పేర్కొంది.

ఫిబ్రవరి 15న భారత్‌తో జరగనున్న మ్యాచ్‌ను బహిష్కరించాలని పాకిస్తాన్ ప్రభుత్వం తీసుకున్న నిర్ణయాన్ని వివరిస్తూ అంతర్జాతీయ పాలక మండలికి అధికారికంగా రాసినప్పటి నుండి ఐసీసీ వారితో చర్చలు జరుపుతోంది. దీనికి ప్రతిస్పందనగా, ఫోర్స్ మేజ్యూర్ నిబంధనను అమలు చేయడంపై పీసీబీ నుండి వివరణ కోరింది. బోర్డు తన వైఖరిని పునఃపరిశీలించుకోవాలని కోరింది.

అటు భారత జట్టు ICC ప్రోటోకాల్ ప్రకారం ఖచ్చితంగా ముందుకు సాగనుందని తెలుస్తోంది. జట్టు షెడ్యూల్ ప్రకారం శ్రీలంకకు వెళ్లి శిక్షణా సెషన్లు, తప్పనిసరి ప్రీ-మ్యాచ్ ప్రెస్ కాన్ఫరెన్స్‌తో సహా దాని సాధారణ ప్రీ-మ్యాచ్ సన్నాహాలను నిర్వహిస్తుందని భావిస్తున్నారు. మ్యాచ్ రోజున నిర్ణీత సమయానికి భారత్ ప్రేమదాస స్టేడియంకు చేరుకుంటుంది. పాకిస్తాన్ మైదానంలోకి దిగకూడదని డిసైడ్ అయితే మ్యాచ్‌ను రద్దు చేయడంపై మ్యాచ్ రిఫరీ నిర్ణయం తీసుకునే వరకు వేచి ఉంటుంది.

భారత్-పాక్ మ్యాచ్ తో వేల కోట్ల ఆదాయం..!

భారత్-పాకిస్తాన్ మ్యాచ్ ప్రపంచ క్రికెట్‌లో అత్యంత లాభదాయకమైన మ్యాచ్‌. దీని ద్వారా రూ. 2,200 కోట్ల ఆదాయం వస్తుంది. ఆ ఆకర్షణను ఉపయోగించుకోవడానికి ICC 2012 నుండి ప్రతి ప్రధాన టోర్నమెంట్‌లో రెండు జట్లను ఒకే గ్రూపులో ఉంచింది. దౌత్య సంబంధాలు క్షీణించడం వల్ల గత 14 సంవత్సరాలుగా ద్వైపాక్షిక క్రికెట్‌కు అవకాశం లేకుండా పోయింది. పాకిస్తాన్ మొండిగా ముందుకెళితే మిలియన్ల ఆదాయాన్ని కోల్పోయే ప్రమాదం ఉంది. మ్యాచ్ రద్దుతో ICC ఖజానాకు గణనీయమైన ఆర్థిక నష్టం కలుగుతుంది. 10 సెకన్ల కమర్షియల్ స్లాట్ రూ.40 లక్షల వరకు ఖర్చయ్యే మార్క్యూ గేమ్‌కు హోస్ట్ బ్రాడ్‌కాస్టర్ రూ.200 కోట్ల నుండి రూ. 250 కోట్ల వరకు ప్రకటనల ద్వారా వచ్చే ఆదాయానికి గండి పడుతుంది.

అటు శ్రీలంక క్రికెట్ బోర్డు సైతం పీసీబీకి మెయిల్‌ పంపింది. ఫిబ్రవరి 15న చిరకాల ప్రత్యర్థుల మధ్య జరగాల్సిన మార్క్యూ మ్యాచ్ లేకపోవడం వల్ల శ్రీలంక క్రికెట్ బోర్డుకు ఆర్థికంగా నష్టాలు వస్తాయని వాపోయింది. పాక్ నిర్ణయం సంస్థతో పాటు టోర్నమెంట్ ప్రతిష్టను దెబ్బతీస్తుందని ఆవేదన వ్యక్తం చేసింది.

Also Read: హాస్పిట‌ల్ బెడ్‌పై నుంచే హ‌ర్షిత్ రాణా పోస్టు.. శ‌స్త్ర‌చికిత్స విజ‌య‌వంతం.. ఇక నా దృష్టంతా..