Khammam Congress: ఆ ఉమ్మడి జిల్లాలో రెండు జిల్లా అధ్యక్ష పోస్టులు. పైగా అధికార పార్టీ పగ్గాలు. రేసులో 76 మంది నేతలు. ఆ ముగ్గురు మంత్రులు ఆశీస్సులు ఉంటేనే..అధ్యక్ష పీఠం దక్కే అవకాశం. ఇది ఖమ్మం, భద్రాద్రి జిల్లా డీసీసీ అధ్యక్ష రేసుగుర్రాల పరిస్థితి. ఖమ్మం కాంగ్రెస్ ప్రెసిడెంట్ ఎవరు కాబోతున్నారు? భద్రాద్రి జిల్లా డీసీసీ పీఠంలో కూర్చునేదెవరు? అమాత్యుల అండదండలు ఎవరికి? పార్టీ పదవులు భట్టికి..ప్రోటోకాల్‌ పోస్టులు పొంగులేటి, తుమ్మల పంచుకున్నారా?
అధికార కాంగ్రెస్‌లో డీసీసీ అధ్యక్ష రేసు ఆసక్తికరంగా మారింది. ఏఐసీసీ తీసుకొచ్చిన మార్పులు..డీసీసీ రోల్‌ను కీలకంగా మార్చేయడంతో జిల్లా రథసారధి అయ్యేందుకు హస్తం పార్టీ నేతలు తీవ్ర లాబీయింగ్ చేస్తున్నారట. ఉమ్మడి ఖమ్మం జిల్లాలో రెండు డీసీసీ ప్రెసిడెంట్ పోస్టులు కోసం ఏకంగా 76 మంది దరఖాస్తు పెట్టుకున్నారు. అనేక కసరత్తులు, అభిప్రాయ సేకరణ తర్వాత ఖమ్మం జిల్లా కాంగ్రెస్ అధ్యక్ష పదవి రేసులో ఇద్దరి పేర్లు మాత్రమే ఏఐసీపీ వెళ్లినట్లు తెలుస్తోంది.
డిప్యూటీ సీఎం మల్లు భట్టి విక్రమార్క అనుచరుడైన వైరాకు చెందిన నూతి సత్యనారాయణ గౌడ్, మధిరకు చెందిన వేమిరెడ్డి శ్రీనివాస్‌రెడ్డిలలో ఒక్కరికి ఖమ్మం డీసీసీ పదవి దక్కే ఛాన్స్ ఉందట. ఇప్పటికే ఏఐసీసీ పరిశీలకులు జిల్లాలో వారం రోజుల పాటు పర్యటించి గ్రామ స్థాయి నుంచి జిల్లా స్థాయి వరకు సమావేశాలు పెట్టి అభిప్రాయ సేకరణ చేశారు దాదాపు 5వేల మంది కార్యకర్తల ఒపీనియన్‌ తీసుకుని..జిల్లాకు చెందిన ముగ్గురు మంత్రులతో కూడా భేటీ అయ్యారు.
ఖమ్మం జిల్లా అధ్యక్షుడిగా నూతి సత్యనారాయణ, వేమిరెడ్డి శ్రీనివాస్‌రెడ్డిలో ఒక్కరి పేరు ఖరారు అయ్యే అవకాశం ఉందట. వైరాకు చెందిన నూరి సత్యనారాయణ మొదటి నుంచి కాంగ్రెస్ పార్టీలో పని చేస్తున్నారు. మల్లు భట్టి విక్రమార్కకు నమ్మిన బంటు. ప్రస్తుతం పీసీసీ ప్రధాన కార్యదర్శిగా పనిచేస్తున్నారు. మొన్నటి వరకు పువ్వాళ దుర్గాప్రసాద్ డీసీసీ అధ్యక్షుడిగా పనిచేసినందున ఈసారి బీసీకి అవకాశం ఇవ్వాలనుకుంటే నూతి సత్యానారాయణ పేరు ఖరారయ్యే అవకాశం ఉంది. లేదా మధిరకు చెందిన వేమిరెడ్డి పేరును పరిశీలించొచ్చు. ప్రస్తుత అధ్యక్షుడు పువ్వాళ దుర్గాప్రసాద్ భట్టి వర్గానికి చెందిన నేత. ఆయనను డీసీసీ నుంచి తప్పిస్తే సుడా ఛైర్మన్‌గా అవకాశం కల్పిస్తారని అంటున్నారు.
భద్రాద్రి జిల్లా కాంగ్రెస్ అధ్యక్ష పదవికి 25 మంది దరఖాస్తు చేసుకోగా..ప్రస్తుతం అధ్యక్షుడిగా ఉన్న మాజీ ఎమ్మెల్యే పోదెం వీరయ్యకే మళ్లీ అవకాశం ఇవ్వాలని భద్రాచలం సెగ్మెంట్ కార్యకర్తలు తీర్మానించారు. అదే విధంగా నాగసీతారాములు, మోత్కూరి ధర్మరావు, ఏడవల్లి క్రిష్ణ, శౌరి, ఏలూరి కోటేశ్వర్ రావు, నల్లపు దుర్గాప్రసాద్, చందా సంతోష్ కుమార్, ఏనుగుల అర్జున్ రావులు రేసులో ఉన్నారు.
బీఆర్ఎస్ పార్టీ జిల్లా అధ్యక్షుడిగా రేగా కాంతారావు ఉన్నందున అదే సామాజికవర్గానికి చెందిన పోదెం వీరయ్యనే మళ్లీ కొనసాగించే అవకాశం ఉన్నట్లు తెలిసింది. డీసీసీ అధ్యక్షులుగా మళ్లీ భట్టి వర్గానికే అవకాశం దక్కితే మాత్రం జడ్పీ ఛైర్మన్ పదవి మంత్రి పొంగులేటి శ్రీనివాస్ రెడ్డి వర్గానికి, డీసీసీబీ ఛైర్మన్ పదవి మంత్రి తుమ్మల నాగేశ్వరరావు అనుచరులకు దక్కేలా ముగ్గురు మంత్రులు మూడు కీలక పదవులను పంచుకున్నట్లుగా పార్టీలో ప్రచారం జరుగుతుంది.
Also Read: జూబ్లీహిల్స్ బైపోల్‌.. సీఎం రేవంత్ నయా స్కెచ్ ఏంటి..! ఈ రెండు వ్యూహాలు కాంగ్రెస్ ను గట్టెక్కిస్తాయా?
