Telangana Rains : తెలంగాణకు వర్షాల అలర్ట్.. ఈ మూడు జిల్లాల్లో భారీ వర్షాల హెచ్చరిక!

Telangana Rains

Telangana Rains : తెలంగాణలో వర్షాలు కురుస్తున్నాయి. రాయలసీమ, తమిళనాడు మీదుగా తెలంగాణ నుంచి మన్నార్ గల్ఫ్ వరకు ద్రోణి కొనసాగుతుండటంతో పాటు నైరుతి రుతుపవనాలు వేగంగా విస్తరిస్తున్నాయి. ఈ కారణంగా తెలంగాణ రాష్ట్రంలోని పలు జిల్లాల్లో రెండు రోజులు వర్షాలు దంచికొట్టనున్నట్లు వాతావరణ శాఖ అంచనా వేసింది.

Also Read : Gold Silver Rate Today : వరుసగా రెండోరోజు భారీగా తగ్గిన బంగారం, వెండి ధరలు.. కారణాలు ఇవే.. ఏపీ, తెలంగాణలో తులం గోల్డ్ ఎంతంటే?

హైదరాబాద్ వాతావరణ కేంద్రం వెల్లడించిన వివరాల ప్రకారం.. ఇవాళ సాయంత్రం రాష్ట్రంలోని పలు జిల్లాల్లో తేలికపాటి నుంచి మోస్తరు వర్షాలు కురిసే అవకాశం ఉందని అధికారులు తెలిపారు. ముఖ్యంగా భద్రాద్రి కొత్తగూడెం, ఖమ్మం, నల్గొండ జిల్లాల్లో అక్కడక్కడ భారీ వర్షాలు కురిసే అవకాశం ఉందని, ఆయా జిల్లాల ప్రజలు అప్రమత్తంగా ఉండాలని వాతావరణ శాఖ అధికారులు సూచించారు.

హైదరాబాద్ నగరంతోపాటు రంగారెడ్డి, మేడ్చల్ -మల్కాజిగిరి, సంగారెడ్డి, వికారాబాద్, మహబూబ్ నగర్ తదితర జిల్లాల్లో ఉరుములు, మెరుపులతో కూడిన వర్షాలు కురిసే అవకాశం ఉందని హైదరాబాద్ వాతావరణ శాఖ పేర్కొంది. వర్షాలతోపాటు గంటకు 30 నుంచి 40 కిలోమీటర్ల వేగంతో ఈదురుగాలులు వీచే అవకాశం ఉన్నందున ప్రజలు అప్రమత్తంగా ఉండాలని అధికారులు సూచించారు. ముఖ్యంగా ఉరుములు, మెరుపులు సంభవించే సమయంలో చెట్ల కింద, బహిరంగ ప్రదేశాల్లో ఉండొద్దని హెచ్చరించారు.

బుధవారం (జూన్ 25వ తేదీ) కూడా రాష్ట్రంలోని పలు ప్రాంతాల్లో మోస్తరు నుంచి భారీ వర్షాలు కురుస్తాయని హైదరాబాద్ వాతావరణ కేంద్రం పేర్కొంది. భద్రాద్రి కొత్తగూడెం, ఖమ్మం, నల్గొండ జిల్లాల్లో భారీ వర్షాలు నమోదయ్యే అవకాశాలు ఉన్నాయని అంచనా వేసింది. రాబోయే రెండు రోజుల పాటు రాష్ట్రంలో వర్షాలు కొనసాగనున్న నేపథ్యంలో ప్రజలు, రైతు వాతావరణ పరిస్థితులను ఎప్పటికప్పుడు గమనించాలని వాతావరణ శాఖ అధికారులు సూచించారు.