Jubilee Hills Bypoll : జూబ్లీహిల్స్ ఉపఎన్నిక.. సింగిల్ టీ రూ.5, బిర్యానీకి రూ.170.. రేట్‌చార్జ్‌ను రిలీజ్ చేసిన ఈసీ

Jubilee Hills Bypoll

Jubilee Hills Bypoll : జూబ్లీహిల్స్ ఉప ఎన్నికకు ఎలక్షన్ కమిషన్ షెడ్యూల్ విడుదల చేసిన విషయం తెలిసిందే. నవంబర్ 11న ఉప ఎన్నిక పోలింగ్ జరగనుండగా.. నవంబర్ 14న ఫలితాలు వెల్లడికానున్నాయి. ఇక అక్టోబర్ 13న ఉప ఎన్నికల నోటిఫికేషన్ రానుంది. గత ఎన్నికల్లో జూబ్లీహిల్స్ నియోజకవర్గం నుంచి మాగంటి గోపీనాథ్ బీఆర్ఎస్ అభ్యర్థిగా పోటీ చేసి విజయం సాధించారు. ఇటీవల ఆయన అకాల మరణంతో ఈ ఉప ఎన్నికలు జరుగుతున్నాయి.

జూబ్లీహిల్స్ ఉప ఎన్నికల్లో విజయం సాధించాలని అధికార కాంగ్రెస్ పార్టీ పట్టుదలతో ఉంది. నవీన్ యాదవ్ ను ఆ పార్టీ అధిష్టానం అభ్యర్థిగా ప్రకటించింది. ప్రతిపక్ష బీఆర్ఎస్ పార్టీ నుంచి మాగంటి గోపీనాథ్ సతీమణి మాగంటి సునీత పోటీ చేస్తున్నారు. ఇక బీజేపీ అధిష్టానం అభ్యర్థి ఎంపికపై కసరత్తు చేస్తోంది. ఈ మూడు పార్టీల మధ్య ప్రధానంగా పోటీ జరగనుంది. అయితే, ప్రస్తుతం ఏ ఎన్నికల్లో అయినా అభ్యర్థులు చేసే ఖర్చు రూ.కోట్లలో ఉంటుందనేది జగమెరిగిన సత్యం. ఎన్నికల నిబంధనల మేరకు మాత్రం అసెంబ్లీకి పోటీచేసే అభ్యర్థుల వ్యయ పరిమితి రూ.40లక్షలు మించరాదు. అభ్యర్థులు తాము ఎంత మొత్తంలో ఖర్చు చేసినా లెక్క మాత్రం అంతకు లోబడే ఉండాలి.

Also Read: Telangana : తెలంగాణలో మళ్లీ మంత్రుల మధ్య వార్.. ఈసారి కొండా వర్సెస్ పొంగులేటి.. సీఎం వద్దకు పంచాయితీ..? అసలేం జరిగిందంటే..

జూబ్లీహిల్స్ ఉప ఎన్నిక నేపథ్యంలో అభ్యర్థులు పెట్టే ఖర్చులకు సంబంధించిన ధరల పట్టికను ఎన్నికల అధికారులు విడుదల చేశారు. ఎన్నికల ప్రవర్తన నియమావళి ప్రకారం అభ్యర్థులు రోజువారీగా ఖర్చులను చూపించాలని, నిబంధనలు ఉల్లంఘిస్తే చర్యలు ఉంటాయని ఈసీ హెచ్చరించింది. అయితే, రేట్ చార్టులో ప్రచారానికి ఉపయోగించే సౌండ్ బాక్స్ లు మొదలుకుని బ్యానర్లు, వాల్ పోస్టర్లు, కుర్చీల వరకు అన్నింటికి ధరలను ఈసీ నిర్ణయించింది.

రేట్‌చార్ట్‌లో ధరలు ఇలా..
♦ డ్రోన్ కెమెరాకు 12 గంటలకు రూ.5వేలు.
♦ మినీ ఫంక్షన్హాల్ రోజుకు రూ.6,200.
♦ సింగిల్ టీ రూ.5.
♦ పెద్ద కప్పులో టీ రూ.10.
♦ కాఫీ సింగిల్‌కు రూ.6.
♦ పెద్ద కప్పులో కాఫీ రూ.11.
♦ వాటర్ ప్యాకెట్ ఒక్కటి రూ.2.
♦ 200 మిల్లీ లీటర్ల వాటర్ బాటిల్‌కు రూ.6.
♦ 500 మిల్లీలీటర్ల బాటిల్‌కు రూ.10.
♦ లీటర్ వాటర్ బాటిల్‌కు రూ. 20.
♦ 300 గ్రాముల పులిహోరకు రూ.40.
♦ ఒక ఆలూ సమోసాకు రూ.10.
♦ వెజ్ బిర్యానీ 750 గ్రాములకు రూ.115.
♦ చికెన్ బిర్యానీ 750 గ్రాములకు రూ.170.
♦ ఎగ్ బిర్యానీ 750 గ్రాములకు రూ.135.
♦ మటన్ బిర్యానీ 750 గ్రాములకు రూ.180.
♦ వెజ్ ఫ్రైడ్ రైస్ 750 గ్రాములకు రూ.90.
♦ ప్లేట్ ఇడ్లీ (నాలుగు) రూ.20.
♦ వడ ప్లేట్ (రెండు) రూ.20.
♦ వెజ్ మీల్స్ (సింగి ల్)కు రూ.80.
♦ సమావేశాలను ఏర్పాటు చేసుకునేందుకు తీసుకునే పెద్ద ఫంక్షన్ హాల్‌కు రూ.62,000.
♦ ఏసీ ఫంక్షన్ హాల్‌కు రూ.1,25,000.
♦ ఫొటో గ్రాఫర్ కు రోజుకు రూ.1500.
♦ సౌండ్ బాక్సులు, కుర్చీలు, పేపర్ పేట్లు, టీషర్టులు, వీడియోలు, డ్రోన్ కెమెరాలకు ఇలా అన్నింటికి ఒక్కో రేటు పెట్టారు.