Telangana Govt: కాలేజీల్లో సినిమా ప్రమోషన్లకు చెక్.. ప్రైవేట్ ఈవెంట్లపై నిషేధానికి సిద్ధం.. రేవంత్ ప్రభుత్వం తీవ్ర ఆగ్రహం!
తెలంగాణలోని (Telangana Govt)విద్యా సంస్థల్లో సినిమా ప్రమోషన్లు, ప్రైవేట్ ఈవెంట్ల నిర్వహణపై నిషేధం విధించే దిశగా రేవంత్ రెడ్డి ప్రభుత్వం సిద్ధమవుతోంది.
- V Santhosh Kumar
- Published on- November 10, 2026 / 08:38 PM IST
Telangana govt to ban movie promotions and private events in colleges
Telangana Govt: తెలంగాణలోని ప్రైవేట్ కాలేజీల ఇష్టారాజ్యానికి కళ్లెం వేస్తూ విద్యార్థుల భద్రతకే అత్యున్నత ప్రాధాన్యతనిచ్చే దిశగా విద్యా సంస్థల క్యాంపస్‌లలో సినిమా ప్రమోషన్లు, ప్రైవేట్ ఈవెంట్ల నిర్వహణపై పూర్తిస్థాయి నిషేధం విధించేందుకు తెలంగాణ ప్రభుత్వం తీవ్ర కసరత్తు చేస్తోంది. విద్యా సంస్థల క్యాంపస్‌లను ఇకపై కేవలం విద్యా సంబంధిత, క్రీడా కార్యక్రమాలకు మాత్రమే పరిమితం చేయాలని యోచిస్తుండటంతో పాటు విద్యార్థులను వాణిజ్య, రాజకీయ ప్రచారాలకు ఉపయోగించడంపై ప్రభుత్వం తీవ్ర నిరసన వ్యక్తం చేసింది.
సెలవులు ప్రకటించడంపై అభ్యంతరం.. అనుమతుల్లేని ఈవెంట్లతో తోపులాటలు:
సినిమాలు చూడాలని విద్యార్థులకు ఏకంగా సెలవులు ప్రకటించిన కొన్ని ప్రైవేట్ కాలేజీల తీరును తీవ్రంగా పరిగణించిన రేవంత్ ప్రభుత్వం(Telangana Govt), ముందస్తు అనుమతులు లేని ఈవెంట్ల వల్ల తోపులాటలు జరిగి విద్యార్థుల ప్రాణాలకు ముప్పు రావడంపై తీవ్ర ఆందోళన చెందుతోంది. ప్రమోషన్ల పేరుతో విద్యార్థుల చదువును, క్రమశిక్షణను దెబ్బతీయడాన్ని ఏమాత్రం సహించేది లేదని స్పష్టం చేసింది. ఇకపై ఏదైనా భారీ కార్యక్రమం నిర్వహిస్తే విద్యాశాఖతో పాటు పోలీసుల నుంచి ముందస్తు అనుమతి తప్పనిసరి చేసే అవకాశం ఉంది.
త్వరలోనే నూతన మార్గదర్శకాలు.. భద్రతా నిబంధనలపై స్పష్టత:
క్యాంపస్‌లలో నిర్మించే స్టేజ్ నిర్మాణం, ఫైర్ సేఫ్టీ, విద్యార్థుల రక్షణకు సంబంధించి ప్రత్యేక భద్రతా నిబంధనలు విధించేందుకు ప్రభుత్వం సిద్ధమవుతోంది. విద్యార్థుల భద్రతను విస్మరించి వ్యాపార ధోరణితో వ్యవహరించే యాజమాన్యాలపై కఠిన చర్యలు ఉంటాయని హెచ్చరిస్తోంది. ఈ మేరకు విద్యా సంస్థలకు నూతన నియమావళితో కూడిన అధికారిక ఉత్తర్వులను విద్యాశాఖ త్వరలోనే విడుదల చేయనున్నట్లు సచివాలయ వర్గాలు వెల్లడించాయి.