సాధారణంగా మనందరికీ పెళ్లంటే జీవితంలో ఒక్కసారి మాత్రమే వచ్చే పెద్ద పండుగలాంటిది. బంధుమిత్రులకు శుభలేఖలు పంపి ఎంతో ఘనంగా నిర్వహిస్తారనే సంగతి తెలుసు. కానీ,
పెళ్లికి మాత్రమే అందరినీ పిలవాలా? విడాకులు తీసుకునేప్పుడు ఎందుకు పిలవకూడదు? పెళ్లి ఎలా అయితే పెద్ద పండుగలా చేసుకుంటారో.. విడాకులను కూడా అలాగే చేసుకోవాలి. ఎందుకంటే.. ఆ తర్వాత ప్రతిరోజూ పండగే అంటూ.. ఓ పాకిస్థాన్ ఆర్టిస్ట్, సినీ నిర్మాత విడాకుల ఆహ్వాన కార్డును రూపొందించింది.
ఆర్టిస్ట్ కోమల్ ఆష్ ఈ డివోర్స్ కార్డును తయారుచేసింది. ఇందులో ఓ వివాహిత విడాకుల వేడుకను సెలబ్రేట్ చేసుకుంటున్న ఫోటో కూడా ఉంది. అందులో ఆమె గుండెను చేతితో పిసుకుతున్నట్లుగా ఉంది. పాకిస్థాన్ లో మహిళలు ఎదుర్కొంటున్న సమస్యలను చూపేందుకు కోమల్ ఈ సాహసం చేసిందట. ఇన్‌స్టాగ్రామ్‌లో పోస్టు చేసిన ఈ డివోర్స్ కార్డు ప్రస్తుతం సోషల్ మీడాయాలో వైరల్‌ గా మారింది.
కోమల్ మాట్లాడుతూ.. మా ఇష్టంతో పనిలేకుండా పెద్దలు తమకు నచ్చిన వాడితో పెళ్లి చేస్తున్నారు. దానివల్ల మా మధ్య ప్రేమలు ఉండటంలేదు. మహిళల్లో చాలామంది తమ వయస్సు కంటే రెండింతలు ఎక్కువ వయస్సు ఉన్న పురుషులనే పెళ్లి చేసుకుంటున్నారు. జీవితంలో స్థిరపడిన వ్యక్తితో పెళ్లి చేస్తున్నామని పెద్దలు అనుకుంటున్నారేగానీ.. అమ్మాయికి ఇష్టమా, కాదా అని ఎవ్వరూ ఆలోచించడం లేదు. అందుకే పెళ్లి తర్వాత నరకాన్ని అనుభవించి భర్త నుంచి విడిపోయే మహిళలకు విడాకులు నిజంగానే పండుగ అని తెలిపింది.
