Bridal Trend: పెళ్లయిన హిందూ మహిళ మెడలో రూపాయ బిల్లంత మంగళసూత్రం కనపడుతుంది. మంగళ సూత్రం కడితే చాలు పెళ్లి అయిపోయినట్లు భావిస్తాం. వివాహ బంధాన్ని సూచించే ఈ మంగళసూత్రం పేరు వినపడితే చాలు నల్ల పూసలు, పసుపు తాడు, రూపాయ బిల్లంత బంగారాన్ని గుర్తుకు తెచ్చుకుంటాం.
ఇటువంటి మంగళసూత్రం వేసుకోవడం పాత ట్రెండ్‌ అని అంటున్నారు నేటి తరం అమ్మాయిలు. ప్రస్తుతం జరుగుతున్న పెళ్లిళ్లలో కొత్త స్టైల్‌లో మంగళసూత్రాలు ఉంటున్నాయి. చిన్నగా, మోడర్న్‌గా, అమ్మాయి అభిరుచికి, స్టైల్‌కి, అవసరాలకు సరిపోయేలా ప్రత్యేకంగా మంగళసూత్రాన్ని తయారుచేయించుకుంటున్నారు. (Bridal Trend)
జెన్‌ జీ పెళ్లిళ్లు ఇటువంటి మంగళసూత్రంతోనే జరుగుతున్నాయి. పూర్వకాలం నుంచి ఉన్న మంగళసూత్రం రూపాన్ని మార్చి స్లీక్‌గా, ప్రతిరోజూ ధరించేలా స్టైలిష్ట్ మార్చుతున్నారు.
‘మంగళసూత్రం’ అనే పదం సంస్కృతంలో నుంచి వచ్చింది. మంగళం (శుభం), సూత్రం (దారం)… శుభ దారం అనేది వివాహం జరిగిందనడానికి సంకేతం.
కానీ ఈ తరం ఆ సంకేతాన్ని తమ జీవితానికి సరిపోయేలా మార్చుతోంది. స్లీక్‌ (చాలా సింపుల్‌గా, సన్నగా, నాజూగ్గా ఉండే రూపం) ఆకారాలు, పలుచని గొలుసులు, ఆధునిక పెండెంట్లు మంగళసూత్రంగా కనపడుతున్నాయి. పెళ్లికి సంబంధించిన భావం అదే అయినప్పటికీ, మంగళసూత్రం రూపం మాత్రం మారుతోంది.
ఈ మార్పు నెమ్మదిగా జరగడం లేదు. సెలబ్రిటీ వధువులు ఇప్పటికే దీనికి పూర్తిగా సపోర్టు చేస్తున్నారు. అలియా భట్‌, కత్రినా కైఫ్‌ వంటి వారు ఇటువంటి సింపుల్‌ వెర్షన్లలో కనిపించారు. ‘లెస్‌ ఈజ్ మోర్‌’ అంటున్నారు.
ఇటలీకి చెందిన ప్రసిద్ధ లగ్జరీ జ్యువెలరీ బ్రాండ్ బుల్గారి వంటి గ్లోబల్‌ బ్రాండ్లు కూడా ప్రత్యేక మంగళసూత్రాలను తయారు చేస్తున్నాయి. ఈ ట్రెండ్‌నే ఆధునిక అమ్మాయిలు ఫాలో అవుతున్నారు. ఈ తరం వధువులు ఇటువంటి మంగళసూత్రమే కావాలంటున్నారు.
అంతేకాదు, దశాబ్దం క్రితం పెళ్లి జరిగిన కొందరు మహిళలు కూడా పాత మంగళసూత్రాలను మార్చుకుంటున్నారు. 2019లో పెళ్లయిన పూర్ణిమా గుప్తా అనే మహిళ ఇటీవల జరిగిన తన వివాహ వార్షికోత్సవం సందర్భంగా ఆధునిక మంగళసూత్రం ధరించింది.
“నా పెళ్లి సమయంలో ట్రెండ్లు వేరు. ఇప్పుడు ప్రతిరోజూ సులువుగా ధరించి, తిరిగే స్లీక్‌ స్టైల్‌ కావాలనిపించింది” అని ఆమె చెప్పింది. మినిమల్‌ లైట్‌వెయిట్‌ డిజైన్లు, ఇనీషియల్స్‌, సింబల్స్‌, మోడర్న్‌ మోటిఫ్‌లు ట్రెండ్‌లో ఉన్నాయని వ్యాపారులు కూడా చెబుతున్నారు.
