దేశంలో ఉల్లి ధరలు రోజురోజుకి ఆకాశాన్ని తాకుతున్నాయి. సామాన్యుడి కళ్లల్లో ఉల్లి కన్నీళ్లు పెట్టిస్తోంది. ఉల్లి ధరలతో విసిగిపోయిన జనం ఆగ్రహం వ్యక్తం చేస్తున్నారు. కొందరు విక్రయదారులపై వారి కోపాన్ని చూపిస్తున్నారు. ఉల్లిపాయలు లేవని ఓ యువకుడు ఉల్లిపాయలు విక్రయిస్తున్న సేవాదళ్ సభ్యుడి వేలును కొరికేసిన ఘటన ఉత్తరాఖండ్ రాష్ట్రంలోని హల్ద్వానిలో జరిగింది.
ఉల్లి ధరలు పెరగటం వల్ల జిల్లాలోని హల్ద్వానిలో కాంగ్రెస్ సేవాదళ్ ఆధ్వర్యంలో ఉల్లిపాయల విక్రయ కేంద్రం ఏర్పాటు చేశారు. తక్కువ ధరకే ఉల్లిపాయలు అందిస్తున్నారు. సమాచారం తెలుసుకున్న ఓ యువకుడు స్టాల్ దగ్గరకు వెళ్లాడు. అయితే అప్పటికే ఉల్లిపాయలు అయిపోయాయని విక్రయదారులు చేప్పారు. ఈ క్రమంలో ఆగ్రహం వ్యక్తి చేసిన ఆ యువకుడు అక్కడ హల్చల్ సృష్టించాడు. స్టాల్లో ఉన్న కాంగ్రెస్ సేవాదళ్ సభ్యుడి వేలును కొరికేశాడు. వేలు తెగి కిందపడిపోయింది.ఆ యువకుడిని సేవదళ్ సభ్యులు పట్టుకుని చితకబాదారు. అతను బీజేపీకి చెందిన వ్యక్తిగా ఆరోపించారు. ఘటనపై సమాచారం తెలుసుకున్న పోలీసులు అక్కడికి చేరుకున్నారు. నిందితున్ని అదుపులోకి తీసుకుని.. కేసు నమోదు చేసుకుని దర్యాప్తు చేపట్టారు.
