Haleem
Hyderabadi Haleem: హైదరాబాదీ హలీంకు మరింత గుర్తింపు దక్కింది. రసగుల్లా, బికనేరి భుజియా, రత్లామి సేవ్ వంటి భౌగోళిక గుర్తింపు (జీఐ-జియోగ్రాఫికల్‌ ఇండికేషన్‌) ఉన్న 17 ఆహార పదార్థాల్లో ‘అత్యంత ప్రసిద్ధి చెందిన జీఐ’గా హైదరాబాదీ హలీం కేంద్ర వాణిజ్య, పరిశ్రమల శాఖ నుంచి అవార్డు గెలుచుకుంది. ఈ పోటీలో విజేతను ఓటింగ్ ప్రక్రియ ద్వారా ఎంపిక చేశారు. పరిశ్రమలు, అంతర్గత వాణిజ్యాన్ని ప్రచారం చేయడానికి కేంద్రం ఈ ఓటింగ్ నిర్వహించింది.
భారత్ తో పాటు విదేశాల నుంచి కూడా ఆహార ప్రియులు ఆగస్టు 2 నుంచి అక్టోబరు 9 మధ్య ఈ ఓటింగ్ లో పాల్గొన్నారు. హైదరాబాదీ హలీం ఇందులో భారీ మెజారిటీతో గెలుపొందింది. రంజాన్ సమయంలో మాంసం, పప్పు ధాన్యాలు, గోధుమ, సుగంధ ద్రవ్యాలతో హలీం చేస్తారు. హైదరాబాదీ హలీంకి తొలిసారి జీఐ హోదా వచ్చింది. 2019లో రెండోసారి దాన్ని రెన్యువల్ చేశారు.
పదేళ్ల పాటు జీఐ హోదా కొనసాగుతుంది. హైదరాబాదీ హలీంకి భారత్ నుంచే కాకుండా ఇతర దేశాల నుంచి కూడా ఓట్లు భారీగా వచ్చాయని జీఐ అటార్నీ ఎస్.రవి అన్నారు. హైదరాబాదీ హలీంకు వచ్చిన ఈ అవార్డును హైదరాబాద్ హలీం మేకర్స్ అసోసియేషన్ అధ్యక్షుడు ఎంఏ మజీద్ కు న్యూఢిల్లీలోని అంబేద్కర్ ఇంటర్నేషనల్ సెంటర్ లో ఇటీవలే కేంద్ర మంత్రి పీయూష్ గోయల్ ప్రదానం చేశారని చెప్పారు.
10 TV live: “నాన్ స్టాప్ న్యూస్ అప్ డేట్స్ కోసం 10TV చూడండి”..
