Zelensky Fled
Zelensky Fled : రష్యా యుద్ధం నేపథ్యంలో యుక్రెయిన్ సేనలను ముందుండి నడిపించిన ఆ దేశాధ్యక్షుడు వొలొదిమిర్ జెలెన్ స్కీ త‌న దేశం వదిలి పారిపోయారా? అంటే, అవుననే అంటోంది రష్యన్ మీడియా. జెలెన్ స్కీ దేశం వదిలి ప‌రార‌య్యారంటూ ర‌ష్యాకు చెందిన మీడియా… మళ్లీ కథనాలు ప్రసారం చేస్తోంది. యుక్రెయిన్‌ను వీడిన జెలెన్ స్కీ..(Zelensky Fled) ప్ర‌స్తుతం పోలండ్‌లో తలదాచుకున్నారని కూడా రష్యా మీడియా చెబుతోంది.
కాగా, సైనిక చర్య పేరుతో రష్యా సేనలు దండెత్తిన వేళ జెలెన్ స్కీ యుక్రెయిన్ సైన్యం వెన్నంటి నిలిచారు. స్వయంగా రంగంలోకి దిగి సైనికుల్లో ధైర్యం నూరిపోశారు. దేశాన్ని కాపాడుకునేందుకు యుద్ధ రంగంలోకి దిగేందుకు ఆస‌క్తి క‌లిగిన వారు ముందుకు వ‌స్తే.. ఆయుధాలు ఇస్తామని కూడా ప్ర‌క‌టించి జెలెన్ స్కీ సంచ‌ల‌నం రేపారు. అంతేకాకుండా త‌మ దేశం రష్యా గుప్పిట్లోకి వెళ్ల‌కుండా ఉండే దిశ‌గా శ‌క్తివంచ‌న లేకుండా ఆయ‌న వ్యూహాలు ర‌చించారు. జెలెన్ స్కీ వ్యూహాల కార‌ణంగానే యుక్రెయిన్‌కు ప్ర‌పంచ దేశాల మ‌ద్ద‌తు లభించింది.
జెలెన్ స్కీ దేశం వీడి పారిపోయారని వార్తలు రావడం ఇది తొలిసారి కాదని యుక్రెయిన్ అంటోంది. గతంలోనూ రష్యా మీడియా ఇలాంటి కథనాలు ప్రసారం చేసిందని గుర్తు చేసింది. యుద్ధం మొద‌లైన తొలి రెండు రోజుల్లోనే జెలెన్ స్కీ భ‌య‌ప‌డి విదేశాల‌కు పారిపోయారని రష్యా ప్ర‌చారం చేసిన సంగ‌తి తెలిసిందే. దీనికి జెలెన్ స్కీ వెంటనే కౌంటర్ ఇచ్చారు. రష్యా చెప్పేదంతా అబ‌ద్ధ‌మేన‌ని చెబుతూ తాను యుక్రెయిన్‌లోనే ఉన్న‌ట్లుగా వీడియో విడుద‌ల చేశారు.
Russia Military : సైన్యంపై త‌ప్పుడు ప్ర‌చారం చేస్తే 15ఏళ్ల జైలు శిక్ష, రష్యా కొత్త చట్టం
రష్యా- యుక్రెయిన్ మ‌ధ్య భీకర యుద్ధం కొనసాగుతోంది. రష్యా సేనలు యుక్రెయిన్ పై బాంబుల వర్షం కురిపిస్తున్నాయి. ఇప్పటికే ప‌లు కీల‌క న‌గ‌రాల‌ను కూడా స్వాధీనం చేసుకున్నాయి. అంతేకాకుండా యూర‌ప్‌లోనే అతిపెద్ద అణువిద్యుత్ కేంద్ర‌మైన జ‌పోరిజియాపై రష్యా సేనలు దాడుల‌కు దిగాయి. ఈ దాడిలో జ‌పోరిజియా ప్లాంట్ ప్ర‌మాదానికి గురైంది. ఫైరింగ్ వ‌ల్ల ఆ ప్లాంట్‌లో మంట‌లు వ్యాపించిన విష‌యం తెలిసిందే. అయితే ఆ మంట‌లను ఫైర్‌ఫైట‌ర్స్ ఆపిన‌ట్లు శుక్రవారం తెలిపారు. న్యూక్లియ‌ర్ ప్లాంట్‌లో ఉన్న ప‌వ‌ర్ యూనిట్ల‌ను అక్క‌డే ఉన్న సిబ్బంది మానిట‌ర్ చేస్తున్నార‌ని స్థానికులు తెలిపారు. ప్లాంట్ దాడిలో రియాక్ట‌ర్ నెంబ‌ర్ వ‌న్‌లో స్వ‌ల్పంగా డ్యామేజ్ జ‌రిగిన‌ట్లు అధికారులు తెలిపారు.
ఒక‌వేళ ఆ అణు కేంద్రం పేలి ఉంటే ప‌రిస్థితి ఎంత భ‌యాన‌కంగా ఉండేదో ఊహించడమే కష్టం అన్న అభిప్రాయం వ్యక్తమైంది. జ‌పోరిజియా న్యూక్లియ‌ర్ ప్లాంట్ యూరోప్‌లోనే పెద్ద అణు విద్యుత్తు కేంద్రం. ఆ ప్లాంట్‌లో మొత్తం ఆరు రియాక్ట‌ర్లు ఉన్నాయి. ఒక‌వేళ ఆ ప్లాంట్‌లో పేలుడు జ‌రిగి ఉంటే, దాని ప్ర‌భావం చెర్నోబిల్ ఘ‌ట‌న క‌న్నా ప‌ది రెట్లు ఎక్కువ‌గా ఉండేదని యుక్రెయిన్ విదేశాంగ మ‌త్రి డిమిట్రో కులేబా తెలిపారు.
రష్యా సేనలకు దీటుగా బ‌దులిస్తున్నామ‌ని యుక్రెయిన్ సాయుధ బ‌ల‌గాలు స్ప‌ష్టం చేశాయి. ఇప్ప‌టివ‌ర‌కూ 250 రష్యన్ ట్యాంకుల‌ను ధ్వంసం చేశామ‌ని, 10వేల మంది రష్యన్ సైనికుల‌ను మ‌ట్టుబెట్టామ‌ని యుక్రెయిన్ ఆర్మీ తెలిపింది.
రష్యా వైపు భారీ న‌ష్టం వాటిల్లింద‌ని.. 33 విమానాలు, 37 రష్యన్ హెలికాఫ్ట‌ర్ల‌ను కూల్చామ‌ని తెలిపింది. 939 సాయుధ క్యారియ‌ర్ల‌ను ధ్వంసం చేశామ‌ని, 60 ఫ్యూయ‌ల్ ట్యాంకుల‌ను పేల్చివేశామ‌ని, 18 యాంటీ ఎయిర్‌క్రాఫ్ట్ వార్‌ఫేర్‌ను ధ్వంసం చేశామ‌ంది. ఇక జ‌పోరిజియా అణుశ‌క్తి కేంద్రాన్ని రష్యా దళాలు స్వాధీనం చేసుకున్న‌ట్లు యుక్రెయిన్ అధికారులు తెలిపారు.
