అమెరికా అధ్యక్షుడు డొనాల్డ్ ట్రంప్, ప్రపంచ కుబేరుడు ఎలాన్ మస్క్ మధ్య సోషల్ మీడియాలో మొదలైన మాటల యుద్ధం ఇప్పుడు ఆ దేశ అంతరిక్ష ప్రాజెక్టుల భవిష్యత్తునే ప్రశ్నార్థకం చేస్తోంది. డొనాల్డ్ ట్రంప్, ఎలాన్ మస్క్ మధ్య రాజుకున్న వివాదం కారణంగా అమెరికాకు చెందిన కీలకమైన డ్రాగన్ స్పేస్క్రాఫ్ట్ సేవలను నిలిపివేస్తామని మస్క్ సంచలన ప్రకటన చేశారు. ఇదే జరిగితే దీనివల్ల అమెరికాకు ఎలాంటి నష్టం జరుగుతుంది? అసలు ఈ గొడవకు కారణం ఏంటి? పూర్తి వివరాలు…
ఎలాన్ మస్క్‌కు చెందిన స్పేస్‌ఎక్స్ (SpaceX) కంపెనీ అభివృద్ధి చేసిన డ్రాగన్ క్యాప్సూల్ ప్రస్తుతం అమెరికా అంతరిక్ష ప్రోగ్రాంలకు ప్రాణనాడి లాంటిది. ఎందుకంటే… అంతర్జాతీయ అంతరిక్ష కేంద్రానికి (ISS) అమెరికా నుంచి వ్యోమగాములను, సరుకులను తీసుకెళ్లే ఏకైక వ్యోమనౌక ఇదే.
బోయింగ్ కంపెనీ అభివృద్ధి చేసిన “స్టార్‌లైనర్” ప్రయోగం ఇప్పటికే సాంకేతిక సమస్యలతో విఫలమైంది. దాంతో డ్రాగన్‌పైనే ఆధారపడాల్సిన పరిస్థితి ఏర్పడింది. కేవలం NASA మాత్రమే కాదు, టెక్సాస్‌కు చెందిన యాక్సియమ్ స్పేస్ (Axiom Space) వంటి ప్రైవేట్ కంపెనీలు కూడా తమ మిషన్ల కోసం డ్రాగన్‌నే ఉపయోగిస్తున్నాయి.
Also Read: తెలంగాణ మాజీ మంత్రి కేటీఆర్‌కు సుప్రీంకోర్టు నోటీసులు జారీ
ఒకప్పుడు వ్యోమగాములను పంపడానికి రష్యాకు చెందిన సోయుజ్ క్యాప్సూల్స్‌పై ఆధారపడిన అమెరికా, 2020లో స్పేస్‌ఎక్స్ రాకతో ఆ పరిస్థితిని మార్చుకుంది. ప్రస్తుతం NASA చాలా వరకు స్పేస్‌ఎక్స్‌పైనే ఆధారపడుతోంది. అయినా, ఇప్పటికీ బ్యాకప్‌గా రష్యా సోయుజ్‌ను వాడుతోంది. అమెరికా-రష్యా ఒప్పందం ప్రకారం, ప్రతి స్పేస్‌ఎక్స్ మిషన్‌లో ఒక రష్యన్ కాస్మోనాట్, ప్రతి సోయుజ్ మిషన్‌లో ఒక అమెరికన్ ఆస్ట్రోనాట్ ప్రయాణిస్తారు.
ప్రస్తుతం స్పేస్‌ఎక్స్‌కు NASA, అమెరికా రక్షణ విభాగం నుంచి సుమారు $22 బిలియన్ల విలువైన కాంట్రాక్టులు ఉన్నాయి. అయితే, “డబ్బు ఆదా చేయడం” కోసం మస్క్‌కు మద్దతు ఉపసంహరించుకుంటామని ట్రంప్ ప్రకటించారు. ఇది అమెరికా అంతరిక్ష ప్రోగ్రాంపై తీవ్ర ప్రభావం చూపే అవకాశం ఉంది. ట్రంప్ కేవలం మస్క్‌నే కాకుండా, స్పేస్‌ఎక్స్ ద్వారా అంతరిక్షంలోకి వెళ్లిన ప్రైవేట్ వ్యోమగామి జారెడ్ ఐజాక్‌మన్‌ను “డెమోక్రాట్” అంటూ విమర్శించడం ఈ వివాదాన్ని మరింత రాజకీయం చేసింది.
ఈ వివాదం కేవలం స్పేస్‌ఎక్స్‌కే పరిమితం కాలేదు. ట్రంప్ ప్రభుత్వం ఆర్టెమిస్ మూన్ మిషన్లు వంటి అనేక శాస్త్రీయ ప్రాజెక్టుల బడ్జెట్‌ను తగ్గించాలని యోచిస్తోంది. మరోవైపు, అమెరికా సెనేట్ కమిటీ మాత్రం ఈ మిషన్లకు నిధులు కేటాయించేందుకు సిద్ధంగా ఉంది. ఈ రాజకీయ అస్థిరత అమెరికా అంతరిక్ష పరిశోధనల వేగాన్ని తగ్గిస్తుందని నిపుణులు ఆందోళన చెందుతున్నారు.
Also Read: నీటి దోపిడీ కోసం వారికి కేసీఆర్ సహకరించారు: ఉత్తమ్ కుమార్ రెడ్డి
ఈ వివాదం స్పేస్‌ఎక్స్‌కు ప్రత్యామ్నాయ కంపెనీలకు లాభం చేకూరుస్తోంది. ఈకోస్టార్ (EchoStar), AST స్పేస్‌మొబైల్ వంటి కంపెనీల షేర్లు పెరిగాయి. భవిష్యత్తులో బోయింగ్, బ్లూ ఒరిజిన్ (జెఫ్ బెజోస్), అమెజాన్ కూపర్ ప్రాజెక్ట్ వంటివి స్పేస్‌ఎక్స్‌కు గట్టి పోటీ ఇచ్చే అవకాశం ఉంది.
NASA మాజీ డిప్యూటీ అడ్మినిస్ట్రేటర్ లారీ గార్వర్ మాట్లాడుతూ… “ఒక కంపెనీ CEO అంతరిక్ష వాహనాలను నిలిపివేస్తానని బెదిరించడమంటే వ్యోమగాముల ప్రాణాలకు ముప్పు తేవడమే. చట్టపరంగా స్పేస్‌ఎక్స్ కాంట్రాక్టులను రద్దు చేయడం సులభం కాదు, కానీ ప్రస్తుత పరిస్థితి చాలా గందరగోళంగా ఉంది” అని హెచ్చరించారు. మొత్తంమీద, ఈ వివాదం అమెరికా ప్రభుత్వం, ప్రైవేట్ అంతరిక్ష కంపెనీల మధ్య ఉన్న సున్నితమైన సంబంధాన్ని బయటపెట్టింది. రాజకీయాలు సైన్స్‌ను శాసిస్తే, అమెరికా అంతరిక్ష ఆధిపత్యం ప్రమాదంలో పడే అవకాశం ఉంది.
