Finland
Finland: జీవనశైలి, భద్రత, సహజ సౌందర్యం కారణంగా ప్రపంచంలో మోస్ట్ హ్యాపియెస్ట్‌ కంట్రీగా ఫిన్లాండ్ నిలిచింది. చాలా మంది భారతీయులు అక్కడ స్థిరపడాలని, ఉద్యోగం చేయాలని కలలు కంటుంటారు. ఫిన్లాండ్‌లో శాశ్వత నివాస హక్కు (పీఆర్) పొందితే కుటుంబాన్ని కూడా అక్కడకు తీసుకెళ్లే అవకాశం లభిస్తుంది.
పీఆర్ పౌరసత్వం పొందే మార్గాన్ని ఫిన్లాండ్ సులభతరం చేస్తోంది. గత కొన్నేళ్లలో ఫిన్లాండ్ ప్రభుత్వం వలస చట్టాల్లో పలు ముఖ్యమైన మార్పులు చేసి, ఐటీ, ఇంజినీరింగ్, ఆరోగ్య రంగాల్లో నిపుణులను ఆకర్షిస్తోంది. (Finland)
ఫిన్లాండ్ ప్రభుత్వం 2025లో వలస నియమాల్లో ప్రధాన మార్పులు చేసింది. ఐటీ, ఆరోగ్య సేవలు, ఇంజినీరింగ్ రంగాల్లో పనిచేసే వారికి అక్కడ శాశ్వత నివాసం పొందడం సులభమైంది. ఫిన్లాండ్ పీఆర్ ద్వారా యూరోపియన్ కాని ఏ వ్యక్తి అయినా ఆ దేశంలో శాశ్వతంగా నివసించవచ్చు, ఉద్యోగం చేసుకోవచ్చు.
పీఆర్ పొందిన వారికి ఆరోగ్య సేవలు, విద్య, ఇతర సామాజిక ప్రయోజనాలు లభిస్తాయి. ఈ కార్డును ప్రతి 5 సంవత్సరాలకు ఒకసారి పునరుద్ధరించుకోవాలి. అయితే, ఫిన్లాండ్ పౌరసత్వం పొందాలంటే కనీసం ఎనిమిది సంవత్సరాలు ఆ దేశంలో నివసించి, అధికారిక భాష మాట్లాడగలగాలి.
ఇటీవల ఫిన్లాండ్ ప్రభుత్వం వర్క్ వీసా నిబంధనలను సవరించింది. కుటుంబాన్ని తీసుకురావాలనుకునే వ్యక్తి కనీసం రెండు సంవత్సరాలు ఫిన్లాండ్‌లో నివసించి ఉండాలి. ఇద్దరు జీవిత భాగస్వాముల కనీస వయస్సు 21 సంవత్సరాలు ఉండాలి.
