Bollywood Star Nawazuddin Siddiqui Exclusive Interview about Venkatesh Saindhav Movie
Nawazuddin Siddiqui : టాలీవుడ్ విక్టరీ వెంకటేష్(Venkatesh) తన 75వ సినిమాగా ‘సైంధవ్’(Saindhav) సినిమాతో రాబోతున్నారు. శైలేష్ కొలను(Sailesh Kolanu) దర్శకత్వంలో నిహారిక ఎంటర్టైన్మెంట్ బ్యానర్ పై వెంకట్ బోయినపల్లి నిర్మాణంలో ఈ సినిమా తెరకెక్కుతుంది. సైంధవ్ సినిమాలో శ్రద్ధ శ్రీనాధ్, రుహాణి శర్మ, ఆండ్రియా, నవాజుద్దీన్ సిద్దిఖీ, ఆర్య.. పలువురు ముఖ్య పాత్రలు చేశారు. ఇప్పటికే రిలీజయిన టీజర్, ట్రైలర్, సాంగ్స్ తో సైంధవ్ సినిమాపై మంచి అంచనాలు నెలకొన్నాయి.
ఇక సైంధవ్ సినిమా జనవరి 13న సంక్రాంతి కానుకగా రాబోతుంది. దీంతో చిత్రయూనిట్ ప్రమోషన్స్ లో బిజీగా ఉన్నారు. ఈ సినిమాలో ముఖ్య పాత్ర చేసిన బాలీవుడ్ స్టార్ నవాజుద్దీన్ సిద్ధిఖీ తాజాగా మీడియాతో ముచ్చటించారు. సినిమా గురించి పలు ఆసక్తికర విషయాలు తెలిపారు. థాని తెలుగు పరిశ్రమలోకి స్వాగతిస్తున్నందుకు థ్యాంక్యూ చెప్పారు.
#మీ నటనతో దేశవ్యాప్తంగా ప్రేక్షకాదరణ పొందారు. తెలుగులోకి రావడానికి ఎందుకింత ఆలస్యమైయింది?
ప్రతి నటుడు ఒక మంచి కథ కోసం ఎదురుచూస్తాడు. నేను కూడా మంచి స్క్రిప్ట్ కోసం ఎదురుచూశాను. అది ‘సైంధవ్’తో కుదిరింది. ఇది చాలా ఆసక్తికర కథ. వెంకటేష్ గారితో కలసి పని చేయడం చాలా అనందంగా వుంది.
#ఇప్పుడు మీరు విలన్ పాత్రలు తగ్గించారు.. మరి సైంధవ్ లో ఎందుకు విలన్ గా చేశారు?
నేను ఎప్పుడూ విలన్, హీరో పాత్ర అని చూడలేదు. పాత్ర ఆసక్తికరంగా ఉందా లేదా అనేదే ముఖ్యం. కొన్ని సార్లు పాజిటివ్ రోల్స్ కంటే నెగిటివ్ రోల్స్ లో పర్ఫార్మ్ చేసే అవకాశం ఎక్కువగా వుంటుంది. సైంధవ్ లో దర్శకుడు శైలేష్ చాలా యూనిక్ రోల్ ని డిజైన్ చేశారు నా కోసం. అది నటించడానికి చాలా అవకాశం ఉన్న పాత్ర. అందుకే ఈ సినిమా ఒప్పుకున్నాను.
#తొలి సినిమాకే తెలుగులో డబ్బింగ్ చెప్పారు కదా? తెలుగు నేర్చుకోవడంలో సవాళ్ళు ఎదుర్కొన్నారా?
ఈ విషయంలో దర్శకుడు శైలేష్ నాకు సపోర్ట్ ఇచ్చారు. నా నటనకు వేరే ఎవరో డబ్బింగ్ చెప్పడం కూడా నాకు ఇష్టం వుండదు. పాత్రలో ఆ డెప్త్ రాదు. ఇందులో నాది హైదరాబాది పాత్ర. హిందీ, కొంచెం తెలుగు రెండూ మాట్లాడే పాత్ర. ఆ పాత్రకు నేను డబ్బింగ్ చెబితేనే న్యాయం జరుగుతుంది. భాషని, భావాన్ని అర్ధం చేసుకొని చెప్పాను. ఏదైనా కొత్త భాష నేర్చుకున్నప్పుడు మొదట్లో కొంత కష్టంగానే వుంటుంది. భాష గురించి తెలుసుస్తున్న కొద్ది అది ఈజీ అవుతుంది. షూటింగ్ లో కూడా నాకు ప్రామ్టింగ్ మీద నమ్మకం లేదు. ఎంత కష్టమైనా నా డైలాగులని నేనే నేర్చుకొని చెప్తాను. సైంధవ్ లో కూడా అలాగే నేర్చుకొని డైలాగ్స్ చెప్పను.
#తెలుగు సినిమాలు చూస్తారా ?
చాలా తెలుగు సినిమాలు చూశాను. వెంకటేష్ గారు చేసిన ఫ్యామిలీ సినిమాలు, ఆయన హిందీలో చేసిన అనారి సినిమా కూడా చూశాను.
#ఒక నటుడిగా మీ నుంచి మిగతా వాళ్ళు నేర్చుకుంటారు, మీరు వెంకటేష్ గారి నుంచి ఏమన్నా నేర్చుకున్నారా?
ప్రతి నటుడి నుంచి ఏదో ఒకటి నేర్చుకోవచ్చు. వెంకటేష్ గారు చాలా కూల్ గా వుంటారు. ఎప్పుడూ ప్రశాంతంగా కనిపిస్తారు. లొకేషన్ కి వచ్చిన ముందే డైలాగ్స్ అన్నీ నేర్చుకొని వస్తారు. యాక్షన్ సీన్స్ లో చాలా రిస్క్ లు తీసుకున్నారు. ఎలాంటి డూప్ లేకుండా స్వయంగా యాక్షన్ చేశారు. ఇందులో ఆయనది చాలా ఇంటెన్స్ క్యారెక్టర్. ఈ ప్రయాణంలో ఆయన నుంచి చాలా విషయాలు నేర్చుకున్నాను. ముఖ్యంగా ఆయనకి సహనం ఎక్కువ. అది ఆయన నుంచి తప్పకుండా నేర్చుకోవాలి.
#ఇది వెంకటేష్ గారి 75వ సినిమా.. ఇందులో భాగం లావడం ఎలా అనిపించింది?
వెంకటేష్ గారితో కలసి పని చేయడం గ్రేట్ ఎక్స్‌పీరియన్స్. ఇందులో వెంకటేష్ గారు చాలా డిఫరెంట్ పాత్రలో కనిపిస్తారు. ఆయన 75వ చిత్రంలో భాగం కావడం ఆనందంగా వుంది.
#దర్శకుడు శైలేష్ గురించి ?
శైలేష్ చాలా ప్రొఫెషనల్ డైరెక్టర్. తనకి చాలా క్లారిటీ ఉంది. ఎడిటింగ్ కూడా తన మైండ్ లో వుంటుంది. ఎంత షూట్ చేయాలనేది తనకు పూర్తి క్లారిటీ వుంటుంది. నా క్యారెక్టర్ ని చాలా ఇంప్రవైజ్ చేశాడు. అవకాశం వున్న ప్రతి చోట మెరుగుపరిచాడు. తను కథ చెప్పినప్పుడే ఇది తప్పకుండా పెద్ద విజయం సాధించే చిత్రం అవుతుందనే నమ్మకం కలిగింది. కథని ఎంత అద్భుతంగా చెప్పాడో అంతే అద్భుతంగా చిత్రాన్ని తీశాడు. తను చిత్ర పరిశ్రమలోకి వచ్చి కేవలం ఐదేళ్ళు అవుతుంది. కానీ చాలా అనుభవం అతనిలో కనిపిస్తుంది. అన్ని విషయాలపై తనకి స్పష్టత ఉంది.
#ఇందులో మీకు సవాల్ గా అనిపించిన అంశం ఏమిటి ?
హెవీ యాక్షన్ ఉన్న సినిమా ఇది. యాక్షన్ సీక్వెన్స్ లు చేయడం కాస్త సవాల్ గా అనిపించింది. మీరు చూస్తున్నపుడు ఇందులో యాక్షన్ ఎంత కష్టమో అర్ధమవుతుంది.
#ఇందులో మీకు మెమరబుల్ మూమెంట్ ?
శ్రీలంక షెడ్యూల్ మర్చిపోలేను. సముద్రంలో బోట్ యాక్షన్ సీక్వెన్స్ ని చిత్రీకరిస్తున్నాం. బోట్ పై స్పీడ్ గా వెళుతున్నాను. అకస్మాత్తుగా ఒక పెద్ద అల వచ్చింది. దీంతో ఒక్కసారి బోట్ వదిలేసి అలతో పాటు పైకి లేచాను. అదృష్టవశాత్తు.. మళ్ళీ బోట్ లోనే ల్యాండ్ అయ్యాను. ఆ సీన్ సినిమాలో ఉంటుంది. ఆ సీక్వెన్స్ ని ప్రేక్షకులు చాలా ఎంజాయ్ చేస్తారు.
#సైంధవ్ ప్రొడక్షన్ హౌస్ గురించి ?
నిహారిక ఎంటర్టైన్మెంట్ చాలా మంచి ప్రొడక్షన్ హౌస్. భవిష్యత్ లో వారి చేసే చిత్రాలలో నటించాలని కోరుకుంటాను.
#టాలీవుడ్, బాలీవుడ్ వర్కింగ్ స్టైల్ లో ఎలాంటి తేడా గమనించారు ?
టాలీవుడ్ చాలా ప్రొఫెషనల్ గా ఉంది. ఇక్కడ సమయపాలన చక్కగా ఉంది.
#తెలుగు పరిశ్రమలో మీకు స్నేహితులు ఉన్నారా?
నాని గారు, రానా గారితో కలసి మాట్లాడాను. వారితో కలసినప్పుడు నటన గురించి చాలా అంశాలని పంచుకున్నాం.
#మీకు డ్రీమ్ రోల్ ఉందా ?
ఓషో పాత్ర చేయాలని వుంది. అవకాశం వస్తే ఆయన బయోపిక్ చేస్తాను.
