మూవీ రివ్యూ – ఫ్యాన్స్‌కి ఫుల్‌మీల్స్
పేట ఈ సంక్రాంతికి తలైవా ఫ్యాన్స్‌కి మాత్రమే నచ్చే సినిమా.
- Published By: sekhar ,Published On : January 10, 2019 / 06:50 AM IST
పేట ఈ సంక్రాంతికి తలైవా ఫ్యాన్స్‌కి మాత్రమే నచ్చే సినిమా.
సూపర్ స్టార్ రజినీకాంత్, సిమ్రన్, త్రిష హీరోయిన్లుగా నటించగా, కార్తీక్ సుబ్బరాజ్ డైరెక్షన్‌లో, కళానిధి మారన్ సమర్పణలో, సన్ పిక్చర్స్ నిర్మించిన సినిమా, పెట్టా.. ఈసినిమాని, తెలుగులో పేట పేరుతో డబ్ చేసారు. బాషా తర్వాత సంక్రాంతికి రిలీజవుతున్న రజినీ సినిమా పేటనే కావడంతో తెలుగులోనూ మంచి అంచనాలు ఉన్నాయి. సంక్రాంతి కానుకగా ఈరోజు (జనవరి 10) పేట, తమిళ్, తెలుగులో భారీగా రిలీజ్ అయ్యింది. తెలుగు పేట ప్రేక్షకులను ఎంత వరకు ఆకట్టుకుందో ఇప్పుడు చూద్దాం.
కథ :
కాళీ (రజినీకాంత్) ఒక హాస్టల్ వార్డెన్. అక్కడ స్టూడెంట్స్ ఎదుర్కొంటున్న రకరకాల సమస్యలను తనదైన స్టైల్‌లో పరిష్కిరిస్తూ మంచి గుర్తింపు తెచ్చుకుంటాడు. ఒకానొక టైమ్‌లో, కాలేజీలో చదువుకునే ఒక ప్రేమ జంటకి పెళ్ళి చేస్తాడు కాళీ. అప్పుడు అనుకోకుండా అక్కడి లోకల్ రౌడీతో గొడవ జరుగుతుంది. కాళీ అసలు పేరు పేట అని, అతనిది ఉత్తరప్రదేశ్ అనీ, అక్కడ సింహాచలం (నవాజుద్దీన్ సిద్ధిఖీ) అనే రాజకీయ నాయకుడితో పేటకి విభేదాలున్నాయని తెలుస్తుంది. అసలు కాళీకీ, సింహాచలానికీ గొడవలేంటి, కాళీ మళ్ళీ ఉత్తరప్రదేశ్ వెళ్ళాడా, లేదా? అనేది పేట కథ.
నటీనటులు, సాంకేతిక నిపుణులు :
సూపర్ స్టార్ రజినీకాంత్ స్టైల్ గురించీ, ఎనర్జీ అండ్ మేనరిజమ్స్ గురించీ కొత్తగా చెప్పక్కర్లేదు. కబాలి, కాలా వంటి సినిమాల్లో ఆయన స్టైల్ మేనరిజమ్స్ లేకపోవడంతో నిరాశ చెందిన ఫ్యాన్స్‌కి, పేట కాస్త ఊరటనిస్తుంది. యంగ్ గెటప్‌లో రజినీ స్టైల్, సిమ్రన్‌తో లవ్ ట్రాక్‌లో కుర్రాడిలా మారిపోయి ఆడియన్స్‌ని మెప్పించిన రజినీ, కాళీగానూ చక్కగా నటించాడు. సిమ్రన్, త్రిష లుక్స్, యాక్టింగ్ పరంగా ఆకట్టుకుంటారు. బాబీ సింహా, విజయ్ సేతుపతి, నవాజుద్దీన్ సిద్ధిఖీ క్యారెక్టర్స్‌కి పెద్దగా స్కోప్ లేదు. అనిరుధ్ పాటలు సినిమాకి అడ్డుపడుతున్నాయనే ఫీలింగ్ తీసుకొస్తే, బ్యాక్ గ్రౌండ్ స్కోర్ మాత్రం బాగా కొట్టాడు. తిరు కెమెరా వర్క్ బాగుంది.
పిజ్జా, జిగర్తండా సినిమాలతో తమిళనాట దర్శకుడిగా గుర్తింపు తెచ్చుకున్న కార్తీక్ సుబ్బరాజ్, రజినీని వేరే రూట్‌లోకి తీసుకెళ్ళి, కొత్త యాంగిల్‌లో ప్రజెంట్ చేస్తాడని రజినీ ఫ్యాన్స్, ఆడియన్స్ ఎక్స్‌పెక్ట్ చేసారు. కట్ చేస్తే, కార్తీకే రజినీ రూట్‌లోకి వచ్చి, ఆయన ఇమేజ్‌నీ, అభిమానులకు కావాల్సిన కయర్షియల్ ఎలిమెంట్స్‌నీ దృష్టిలో పెట్టుకుని కథ రాసుకున్నాడు. ఫస్ట్‌హాఫ్‌లో అసలు కథ అనేదే ఉండదు. సెకండ్ హాఫ్ సాదాసీదా రివేంజ్ డ్రామాగా సాగిపోతుంది. భాషా, ముత్తు, నరసింహా సినిమాల తరహాలో, ఫ్లాష్ బ్యాక్ కాస్త స్ట్రాంగ్‌గా ఉండుంటే, సినిమా మరోలా ఉండేది. పేట ఈ సంక్రాంతికి తలైవా ఫ్యాన్స్‌కి మాత్రమే నచ్చే సినిమా..
వాచ్ పేట ట్రైలర్…
