అమ్మాయిలందరికీ ప్రేరణ మంగ్లీ ‘స్వేచ్ఛ’
ఆడపిల్ల గొప్పదనం తెలిపే చిత్రం.. ప్రముఖ గాయని మంగ్లీ టైటిల్‌ రోల్‌ పోషించి ‘స్వేచ్ఛ’ ..
- Published By: sekhar ,Published On : February 15, 2020 / 01:40 PM IST
ఆడపిల్ల గొప్పదనం తెలిపే చిత్రం.. ప్రముఖ గాయని మంగ్లీ టైటిల్‌ రోల్‌ పోషించి ‘స్వేచ్ఛ’ ..
ఆడపిల్ల పుడితే చాలు అమ్మో.. అనుకుంటూ అమ్మేస్తున్న సమాజమిది. అలా అమ్మకానికి గురై, అభాగ్యురాలైన ఓ యువతి ఎలా బతికింది? ఆమె ఏం సాధించింది అనే కథాంశంతో తెరకెక్కిన చిత్రం ‘స్వేచ్ఛ’. ప్రముఖ గాయని మంగ్లీ టైటిల్‌ రోల్‌ పోషించింది. అన్ని కార్యక్రమాలు పూర్తిచేసుకున్న ఈ చిత్రం ఈ నెల 28న ప్రేక్షకుల ముందుకు రానుంది. కెపీఎన్‌. చౌహాన్‌ దర్శకత్వంలో సరస్వతి డెవలపర్స్‌, లచ్చురాం ప్రొడక్షన్స్‌ పతాకంపై ఆంగోత్‌ రాజునాయక్‌ ఈ చిత్రాన్ని నిర్మించారు.
నిర్మాత మాట్లాడుతూ : ‘‘తండా స్థాయి నుండి ప్రపంచస్థాయి వరకు గాయనిగా ఎదిగిన మంగ్లీ ఈ చిత్రంలో అద్భుతమైన పాత్రను పోషించింది. ఆమె పాత్ర నేటి అమ్మాయిలకు ఎంతో ప్రేరణగా నిలుస్తుంది. సెంటిమెంట్‌, వినోదం మేళవింపుతో రూపొందిన ఈ చిత్రం అందర్ని అరిస్తుందనే నమ్మకం ఉంది. పాపికొండలతో పాటు పలు అందమైన లోకేషన్లలో చిత్రీకరణ జరిపాం’’ అని తెలిపారు. ‘ఒక మంచి పాత్రలో నటించడంతో పాటు సంగీతం అందించడం ఆనందంగా ఉందని’ భోలో షావలి తెలిపారు.
దర్శకుడు మాట్లాడుతూ : ‘‘పర్యావరణ పరిరక్షణకు చెట్లు ఎంత ముఖ్యమో, ఈ సృష్టికి ఆడపిల్ల అంతే ముఖ్యమని తెలిపే చిత్రమిది. ఆడప్లిలను పురిటిలోనే చంపకుండా వారిని చదివించి, ప్రయోజకులను చేస్తే మగవారికి ఏ రంగంలోనూ వాళ్లు తీసిపోరని చెప్పే అద్భుతమైన కథాంశమిది. మంగ్లీ నటన ఈ చిత్రానికి హైలెట్‌గా నిలుస్తుంది. చమ్మక్‌ చంద్ర ఈ చిత్రంలో ఓ ముఖ్యపాత్రలో నటించాడు’’ అని తెలిపారు. ‘బంజారే బంజారే..’ పాటను సింగర్‌ మంగ్లీ అద్భుతంగా ఆలపించారని చెప్పారు.
