Viral Marriage: సాదాసీదా చిరుద్యోగి పెళ్లి కూడా ధూమ్ ధామ్ గా చేయాలని భావించాలని భావించే కాలం ఇది. పెళ్లంటే.. తప్పేట్లు.. తాళాలు.. విందుభోజనాలు.. ఇంకాస్త ముందుకెళ్తే దావత్.. పెళ్ళికి ముందు బరాత్ ఇలా ఎన్నెన్నో పేర్లతో పెళ్లంటే ఆ జంటకి జీవితకాలం గుర్తుండేలా కలలు కనే రోజులివి. అలాంటిది వరుడు ఆర్మీ మేజర్.. వధువు ఓ సిటీకి మేజిస్ట్రేట్. మరి ఇక ఈ జంట పెళ్లి ఇంకెలా ఉండాలి. వచ్చిపోయే స్నేహితులు, బంధువులతో పెళ్లి ప్రాంగణం కళకళలాడాలి.
సహా ఉద్యోగుల నుండి రాజకీయ నేతల వరకు అందరూ వచ్చి ఆ జంటను ఆశీర్వదించి వెళ్ళాలి. కానీ.. ఈ జంట మాత్రం ఆడంబరాలకు దూరం.. పట్టుమని పదిమంది కూడా లేకుండా.. భాజాభజంత్రీల సంప్రదాయానికి కూడా చరమగీతం పాడేసి సింపుల్ గా ఒక్కటయ్యారు. ఈ పెళ్ళికి రిజిస్టారాఫీస్ వేదిక కాగా కేవలం రూ.500తోనే ఈ పెళ్లి తతంగాన్ని ముగించేశారు. మహారాష్ట్రలోని ధార్ సిటీ మేజిస్ట్రేట్ శివాంగి జోషి.. ఆర్మీ మేజర్ అంకిత్ చతుర్వేది పెళ్లి చేసుకున్నారు.
కేవలం ఇరు కుటుంబాల సమక్షంలో స్థానిక రిజిస్టార్ ఆఫీసులో ఈ పెళ్లి వేడుక జరిగింది. కేవలం వధూవరుల దండలు, స్వీట్ల కోసం రూ.500 ఖర్చుతో పెళ్లి తంతును ముగించేశారు. ఉన్నతస్థాయి ఉద్యోగాలు.. ప్రజాసేవలో పునరంకితులైన ఈ ఇద్దరూ ఇలా నిరాడంబరంగా పెళ్లి చేసుకోవడం ఇప్పుడు దేశవ్యాప్తంగా వైరల్ అవుతుండగా నెటిజన్లు ఈ జంట చేసిన పనిని మెచ్చుకుంటూ మనస్పూర్తిగా ఆశీర్వదిస్తున్నారు.
