Parliament intruders case
Parliament : పార్లమెంట్ భద్రతా ఉల్లంఘన ఘటన వెనుక విదేశీ శక్తుల హస్తం ఉందా అంటే? దీనిపై సమగ్ర దర్యాప్తు చేస్తున్నామంటున్నారు ఢిల్లీ పోలీసులు. లోక్‌సభ ఉల్లంఘన సూత్రధారి లలిత్ ఝా దేశంలో అరాచకాలను ప్రేరేపించడమే లక్ష్యంగా పెట్టుకున్నాడని, దీనికోసం అతనికి విదేశీ నిధులు అందాయా అనే కోణంలో తాము దర్యాప్తు ప్రారంభించినట్లు ఢిల్లీ పోలీసులు తెలిపారు. పార్లమెంటుపై దాడి వెనుక అసలు ఉద్దేశ్యం మరేదైనా శత్రు దేశంతో పాటు ఉగ్రవాద సంస్థలతో నిందితుల అనుబంధం గురించి తాము దర్యాప్తు చేస్తున్నామని పోలీసులు కోర్టుకు తెలిపారు.
ఏడు రోజుల కస్టడీకి ప్రధాన నిందితుడు
పార్లమెంట్ భద్రతా ఉల్లంఘన ఘటనలో ప్రధాన సూత్రధారి లలిత్ ఝా,అతని సహ నిందితులు తమ డిమాండ్లను నెరవేర్చేలా ప్రభుత్వంపై ఒత్తిడి చేసేందుకు దేశంలో అరాచకం సృష్టించాలని కోరుకున్నారని ఢిల్లీ పోలీసులు కోర్టుకు సమర్పించిన రిమాండ్ పిటిషన్‌లో పేర్కొన్నారు. పాటియాలా హౌస్ కోర్టు గురువారం రాత్రి ఝాను ఏడు రోజుల పోలీసు కస్టడీకి పంపింది. ఈ దాడి వెనుక పెద్ద కుట్రను వెలికితీసేందుకు సమగ్ర దర్యాప్తు అవసరాన్ని కోర్టు నొక్కి చెప్పింది.
ALSO READ : Parliament Election : పార్లమెంట్ ఎన్నికల కోసం ప్రధాన పార్టీల సమాయత్తం
2001వ సంవత్సరంలో భారత పార్లమెంటుపై దాడి జరిగిన తేదీనే మళ్ళీ ఈ సంఘటన జరిగింది. డిసెంబరు 13న ఇద్దరు వ్యక్తులు సందర్శకుల గ్యాలరీ నుంచి లోక్‌సభ ఛాంబర్‌లోకి దూకిన ఘటనను పునఃసృష్టించేందుకు ఢిల్లీ పోలీసులు పార్లమెంట్ అనుమతిని కోరే అవకాశం ఉంది. ప్రధాన సూత్రధారి అయిన లలిత్ ఝా ఢిల్లీ-జైపూర్ సరిహద్దు సమీపంలో తన ఫోన్‌ను పారేసినట్లు విచారణలో వెల్లడించాడు.
నిందితుల ఫోన్లు ధ్వంసం
ఇతర నిందితుల ఫోన్‌లను తాను ధ్వంసం చేశానని నిందితుడు పేర్కొన్నారు. పార్లమెంటులో భద్రతా ఉల్లంఘన చర్య వెనుక విదేశీ హస్తం ఉందని దర్యాప్తు బృందం అనుమానిస్తోంది. ఈ ప్రణాళిక కోసం తాము ఢిల్లీకి పలుసార్లు సందర్శించామని ప్రధాననిందితుడు ఝా చెప్పారు. పార్లమెంటు భద్రతను ఉల్లంఘించేందుకు కుట్ర పన్నేందుకు తాము చాలాసార్లు కలిశామని లలిత్ ఝా అంగీకరించారు.
