INDW vs PAKW : పాక్ బ్యాటర్లకు చుక్కలు.. 8.4 ఓవర్లలోనే భారత్ విక్టరీ!

INDW vs PAKW

• పాక్‌కు స్పిన్ షాక్.. భారత్‌కు హ్యాట్రిక్
• 55కే పాక్ ప్యాకప్.. భారత్ ఘన విజయం
• చరణి, రావత్ దెబ్బకు పాక్ చిత్తు.. భారత్ సెమీస్‌కు

INDW vs PAKW : మహిళల ఆసియా కప్‌లో టీమిండియా జైత్రయాత్ర కొనసాగుతోంది. వరుసగా మూడో విజయంతో భారత్ హ్యాట్రిక్ సాధించింది. చిరకాల ప్రత్యర్థి పాకిస్థాన్‌తో జరిగిన ఏకపక్ష పోరులో 7 వికెట్ల తేడాతో భారీ ఘన విజయాన్ని అందుకుంది. భారత స్పిన్నర్లు శ్రీ చరణి, ప్రేమా రావత్ విజృంభించడంతో తొలుత బ్యాటింగ్ చేసిన పాకిస్థాన్ 18.1 ఓవర్లలో కేవలం 55 పరుగులకే కుప్పకూలింది. అనంతరం స్వల్ప లక్ష్యాన్ని భారత్ 8.4 ఓవర్లలో 3 వికెట్లు కోల్పోయి ఛేదించింది.

టాస్ గెలిచి బ్యాటింగ్ ఎంచుకున్న పాకిస్థాన్‌కు షఫాలీ వర్మ తొలి దెబ్బ తగిలింది. మునీబా అలీని 13 రన్స్ వద్ద బౌల్డ్ చేసి వికెట్ల పతనానికి నాంది పలికింది. ఆ తర్వాత శ్రీ చరణి, ప్రేమా రావత్ స్పిన్‌తో పాక్ బ్యాటర్లను ఉక్కిరిబిక్కిరి చేశారు. మరో ఓపెనర్ షవాల్ జుల్ఫికర్ 14 రాణించగా, మిగతా బ్యాటర్లు ఎవరూ రెండంకెల స్కోరు దాటలేకపోయారు. 4 బ్యాటర్లు డకౌటయ్యారు.

Read Also : Honda September Offers : హోండా కార్లపై భారీ ఆఫర్లు.. ఎలివేట్‌పై ఏకంగా రూ.1.79 లక్షల బెనిఫిట్..!

శ్రీ చరణి 3 వికెట్లకు కేవలం 7 పరుగులు ఇచ్చింది. ప్రేమా రావత్ 3 వికెట్లతో 9 పరుగులకే పరిమితమైంది. దీప్తి శర్మ 2, షఫాలీ వర్మ ఒక వికెట్ పడగొట్టారు. దీంతో పాకిస్థాన్ 55 పరుగులకే ఆలౌటైంది. అంతర్జాతీయ టీ20ల్లో పాక్‌కు ఇదే అత్యల్ప స్కోరు. 2024లో న్యూజిలాండ్‌పై 56 పరుగులకు ఆలౌటైంది.

లక్ష్య ఛేదనలో భారత్‌కు ఫాతిమా సనా ఆరంభంలోనే గట్టి షాకిచ్చింది. షఫాలీ వర్మ 12, ప్రతీకా రావల్ 4 పరుగుల వద్ద ఔటయ్యారు. ఆ తర్వాత స్మృతి మంధాన 9 పరుగుల వద్ద ఎల్బీగా వెనుదిరిగింది. దీంతో భారత్ 29 పరుగులకే 3 వికెట్లు కోల్పోయింది.

అయితే, కెప్టెన్ హర్మన్‌ప్రీత్ కౌర్, దీప్తి శర్మ ఆచితూచి ఆడారు. చివరిలో నష్ర వేసిన 9వ ఓవర్లో హర్మన్‌ప్రీత్ వరుసగా ఫోర్, సిక్స్ బాది మ్యాచ్‌ ముగించింది. హర్మన్‌ప్రీత్ 18, దీప్తి శర్మ 12 పరుగులతో నాటౌట్‌గా నిలిచారు. ఈ విజయంతో పాకిస్థాన్‌పై ఆసియా కప్‌లో భారత్ తన ఆధిపత్యాన్ని కొనసాగిస్తూ సెమీఫైనల్‌కు దూసుకెళ్లింది.