MI vs PBKS : క్వాలిఫయర్-2 మ్యాచ్ సంద‌ర్భంగా బీసీసీఐ పై నెటిజ‌న్ల విమ‌ర్శ‌లు..
క్వాలిఫయర్-2 మ్యాచ్ సంద‌ర్భంగా నెటిజ‌న్లు భార‌త క్రికెట్ కంట్రోల్ బోర్డు (బీసీసీఐ) పై మండిప‌డ్డారు.
- Thota Vamshi Kumar
- Published on- June 2, 2025 / 09:27 AM IST
Courtesy BCCI
ఐపీఎల్ 2025 సీజ‌న్‌లో భాగంగా ఆదివారం అహ్మ‌దాబాద్‌లోని న‌రేంద్ర‌మోదీ స్టేడియంలో క్వాలిఫయర్-2 మ్యాచ్ జ‌రిగింది. ముంబై ఇండియ‌న్స్‌, పంజాబ్ కింగ్స్ జ‌ట్లు త‌ల‌ప‌డ్డాయి. ఈ మ్యాచ్‌లో పంజాబ్ గెలిచి ఫైన‌ల్ మ్యాచ్‌కు అర్హ‌త సాధించింది. దీంతో జూన్ 3న జ‌రిగే ఫైన‌ల్ మ్యాచ్‌లో పంజాబ్ కింగ్స్ జ‌ట్టు రాయ‌ల్ ఛాలెంజ‌ర్స్ బెంగ‌ళూరుతో క‌ప్పు కోసం పోటీప‌డ‌నుంది.
ఇదిలా ఉంటే.. క్వాలిఫయర్-2 మ్యాచ్ సంద‌ర్భంగా నెటిజ‌న్లు భార‌త క్రికెట్ కంట్రోల్ బోర్డు (బీసీసీఐ) పై మండిప‌డ్డారు. ఇందుకు కార‌ణం లేక‌పోలేదు. క్వాలిఫయర్-2 మ్యాచ్ వ‌ర్షం కార‌ణంగా దాదాపు రెండు గంట‌ల స‌మ‌యం క‌న్నా ఆల‌స్యంగా ప్రారంభం కావ‌డ‌మే.
భార‌త్‌, పాకిస్థాన్ మ‌ధ్య ఉద్రిక్త‌త‌ల కార‌ణంగా ఐపీఎల్ ఓ వారం రోజుల పాటు నిలిపివేసిన సంగ‌తి తెలిసిందే. ఆ త‌రువాత ప్లేఆఫ్స్ కోసం కొత్త వేదిక‌ల‌ను ప్ర‌క‌టించింది. వాస్త‌వానికి ముందుగా నిర్ణ‌యించిన షెడ్యూల్ ప్ర‌కారం క్వాలిఫయర్-2 మ్యాచ్‌తో పాటు ఫైన‌ల్ మ్యాచ్ కోల్‌క‌తాలోని ఈడెన్ గార్డెన్స్ వేదిక‌గా జ‌ర‌గాల్సి ఉంది.
అయితే.. వాయిదా అనంత‌రం బీసీసీఐ ఓ ప్ర‌క‌ట‌న‌ను విడుద‌ల చేసింది. వాతావ‌ర‌ణ ప‌రిస్థితులు, ఇత‌ర పారామితుల‌ను దృష్టిలో ఉంచుకుని ఐపీఎల్ గ‌వ‌ర్నింగ్ కౌన్సిల్ ప్లేఆఫ్స్ ల కోసం కొత్త వేదిక‌ల‌ను నిర్ణ‌యించింది అని బీసీసీఐ ఆ ప్ర‌క‌ట‌న‌లో తెలిపింది.
కానీ.. క్వాలిఫయర్-2 వ‌ర్షం వ‌ల్ల ఆల‌స్యం కావ‌డంతో బీసీసీఐ పై నెటిజ‌న్లు మండిప‌డ్డారు.