Deeksha Divas : ‘దీక్షా దివస్’కు నేటితో 16ఏళ్లు పూర్తి.. కవిత ఆసక్తికర కామెంట్స్.. హరీశ్, కేటీఆర్ ఏమన్నారంటే?

Deeksha Divas

Deeksha Divas : తెలంగాణ రాష్ట్ర సాధన దశ, దిశను మార్చిన అపురూప ఘట్టం దీక్షా దివస్. తెలంగాణ వచ్చుడో.. కేసీఆర్‌ సచ్చుడో, కేసీఆర్‌ శవయాత్రో.. తెలంగాణ జైత్రయాత్రో అని ప్రకటించి బీఆర్ఎస్ అధినేత, మాజీ ముఖ్యమంత్రి కేసీఆర్ ఆమరణ నిరాహారదీక్ష కోసం సిద్దిపేటకు బయలుదేరి సరిగ్గా నేటికి 16 ఏళ్లు అవుతుంది. 2009 నవంబర్‌ 29 నుంచి డిసెంబర్‌ 9 వరకు 11రోజులపాటు సాగిన కేసీఆర్‌ ఆమరణ దీక్ష తెలంగాణ చరిత్రలో మర్చిపోలేని ఘట్టంగా మిగిలిపోయింది. దీక్షా దివస్ ను బీఆర్ఎస్ ఆధ్వర్యంలో రాష్ట్ర వ్యాప్తంగా ఘనంగా నిర్వహిస్తున్నారు. అయితే, దీక్షా దివస్ సందర్భంగా తెలంగాణ జాగృతి అధ్యక్షురాలు కల్వకుంట్ల కవిత ‘ఎక్స్’ వేదికగా ఆసక్తికర పోస్టు చేశారు.

‘ఒక యోధుని దీక్ష, అమరుల త్యాగం యావత్ తెలంగాణ జాతికి మేలుకొలుపైంది.. ఐక్యతా గీతమైంది.. ఉద్యమ స్ఫూర్తిని నింపింది.. తెలంగాణ ఉద్యమాన్ని విజయపథం వైపు నడిపింది.. రాష్ట్ర సాధనకు దారి దీపమైంది.. భౌగోళిక తెలంగాణ సాధించాం.. ఇక సామాజిక తెలంగాణ సాధిస్తాం.. జై తెలంగాణ జై జై తెలంగాణ. అంటూ కవిత తన ‘ఎక్స్’ ఖాతాలో పేర్కొన్నారు.

ఉద్యమ జ్ఞాపకాలు నా గుండెల్లో పదిలంగా ఉన్నాయి: హరీశ్ రావు
దీక్షా దివస్ సందర్భంగా తెలంగాణ ఉద్యమం నాటి రోజులను మాజీ మంత్రి, బీఆర్ఎస్ నేత హరీశ్‌రావు గుర్తుచేసుకున్నారు. ‘తెలంగాణ వచ్చుడో.. కేసీఆర్‌ సచ్చుడో’ నినాదంతో 2009 నవంబర్‌ 29న ప్రారంభించిన ఆమరణ దీక్ష, ఉద్యమ గతిని మలుపు తిప్పింది. సరికొత్త చరిత్రకు నాంది పలికింది. తెలంగాణ ఏర్పాటుకు బాటలు వేసిందని అన్నారు. ‘రానే రాదు, కానే కాదు’ అన్న ప్రత్యేక రాష్ట్ర ఏర్పాటును సబ్బండ వర్గాలను ఏకం చేసి సుసాధ్యం చేసి చూపిన ఘన చరిత కేసిఆర్ ది’. నాలుగు కోట్ల ప్రజల ఆకాంక్ష సాధనకు అలుపెరగని పోరాటం చేసిన చరిత్ర కేసీఆర్‌ ది. పదవులే కాదు, తెలంగాణ కోసం ప్రాణాలుసైతం త్యాగం చేసేందుకు సిద్ధపడ్డ ధీరత్వం కేసీఆర్ ది. తెలంగాణ అజరామర చరిత్రకు వీరోచిత సంతకం కేసీఆర్. నాలుగు కోట్ల ప్రజల్లో మార్మోగే ‘జై తెలంగాణ’ అనే రణ నినాదం కేసీఆర్. నవంబర్‌ 29న కేసీఆర్‌ దీక్ష లేకుండా డిసెంబర్‌ 9 ప్రకటన లేదు. డిసెంబర్‌ 9 ప్రకటన లేకుండా తెలంగాణ రాష్ట్రం లేదు. దశాబ్దాల పోరాటంతోనే తెలంగాణ సిద్ధించింది తప్ప పాలకుల దయాదాక్షిణ్యాలతో కాదన్నది అక్షర సత్యం. తెలంగాణ రాష్ట్ర ఏర్పాటుకు కారణమైన కెసిఆర్ దీక్షా కాలం ఉద్యమ జ్ఞాపకాలు నా గుండెలో పదిలంగా ఉన్నాయి. జై తెలంగాణ అని నినదీస్తున్నాయి. తెలంగాణ స్ఫూర్తిని నిత్యం రగిలిస్తున్నాయి. అంటూ హరీశ్ రావు తన ‘ఎక్స్’ ఖాతాలో పేర్కొన్నారు. ఈ సందర్భంగా అప్పటి వీడియోను షేర్ చేశారు.

దీక్షా దివస్ సందర్భంగా అప్పటి వీడియో పోస్టు చేసిన కేటీఆర్ ..
దీక్షా దివస్ సందర్భంగా తెలంగాణ ఉద్యమం నాటి రోజులను బీఆర్ఎస్ వర్కింగ్ ప్రెసిడెంట్ కేటీఆర్ సర్మించుకుంటూ తన ‘ఎక్స్’ ఖాతాలో ఓ వీడియోను పోస్టు చేశారు.  ‘కరీంనగర్ లో కేసీఆర్ ను అరెస్టు చేసిన సమయంలో ప్రజల్లో నుంచి వచ్చిన ఆగ్రహ జ్వాలలు తెలంగాణ ఉద్యమానికి కొత్త ఊపు ఇచ్చిందని కేటీఆర్ అన్నారు. అప్పటి పరిస్థితులను గుర్తుచేస్తూ ఆనాడు కరీంనగర్ లో తీసిన వీడియోను సోషల్ మీడియాలో పంచుకున్నారు.