Suryapet Boy missing case : సూర్యాపేటలో బాలుడు అదృశ్యం కేసులో కొత్త ట్విస్ట్ వచ్చింది .. బాబు కర్నూలులో ఉన్నాడంటూ సమాచారమందించారు గుర్తు తెలియని వ్యక్తులు. ఈ సమాచారాన్ని బాలుడి ఇంటి వద్ద ఉన్న టైలర్‌కు ఫోన్‌ చేసి తెలిపారు.. దీంతో అప్రమత్తమైన పోలీసులు దర్యాప్తు ప్రారంభించారు.
ఫోన్‌ నెంబర్‌ ఆధారంగా కాల్ చేసింది ఎవరు? ఎక్కడి నుంచి వచ్చిందన్న కోణంలో దర్యాప్తు చేస్తున్నారు.. బాలుడిని త్వరలోనే గుర్తిస్తామంటున్నారు పోలీసులు. సూర్యాపేటలోని భగత్‌సింగ్‌ నగర్‌లో గౌతమ్‌ అనే బాలుడు నిన్న రాత్రి నుంచి కనిపించకుండా పోయాడు.
నిన్న రాత్రి బాణసంచా కోసం వెళ్లిన గౌతమ్‌… ఇంటికి తిరిగిరాలేదు. దీంతో తల్లిదండ్రులు గాలించగా… బాణసంచా షాపు సమీపంలో గౌతమ్‌ సైకిల్‌ లభ్యమైంది. చుట్టుపక్కల ప్రాంతాల్లో వెతికినా గౌతమ్‌ ఆచూకీ దొరక్కపోవడంతో… అతడి తల్లిదండ్రులు సూర్యాపేట పోలీసులకు ఫిర్యాదు చేశారు.
దీంతో గౌతమ్‌ కోసం పోలీసులు గాలింపు చేపట్టారు. అసలు గౌతమ్‌ బాణాసంచా షాప్‌ నుంచి ఎలా మిస్సయ్యాడన్న కోణంలో పోలీసులు దర్యాప్తు చేపట్టారు. గౌతమ్‌ను ఎవరైనా కిడ్నాప్‌ చేశారా? చేస్తే దానికి గల కారణాలేంటీ? అన్న కోణంలో దర్యాప్తు చేస్తున్నారు పోలీసులు.
