Telangana Revenue Growth: తెలంగాణ ఖజానాకు కాసుల వర్షం.. ఒక్కనెలలో రూ.7,735 కోట్ల రికార్డ్ ఆదాయం.. భారీగా పెరిగిన వ్యాట్, జీఎస్టీ వసూళ్లు!
తెలంగాణ వాణిజ్య పన్నుల శాఖ (Telangana Revenue Growth)2026 అక్టోబర్ నెలలో జీఎస్టీ, వ్యాట్ వసూళ్ల ద్వారా రూ.7,735 కోట్ల ఆదాయాన్ని ఆర్జించి, గతేడారితో పోలిస్తే 22.16 శాతం రికార్డు వృద్ధిని నమోదు చేసింది.
- V Santhosh Kumar
- Published on- November 9, 2026 / 05:00 PM IST
Telangana commercial taxes department records 22 percent growth in october 2026 revenue
Telangana Revenue Growth: తెలంగాణ రాష్ట్ర ప్రభుత్వ ఖజానాకు వాణిజ్య పన్నుల శాఖ భారీగా రాబడి సమకూర్చి రికార్డు స్థాయి ఆదాయాన్ని అందించింది. జిఎస్‌టి (GST), వ్యాట్ (VAT), ప్రొఫెషనల్ ట్యాక్స్ వసూళ్లలో గణనీయమైన ప్రగతి నమోదుకాగా, 2026 అక్టోబర్ నెలలోనే ఏకంగా రూ.7,735 కోట్ల ఆదాయం ప్రభుత్వానికి లభించింది. గత ఏడాది అక్టోబర్‌లో వచ్చిన రూ.6,332 కోట్లతో పోలిస్తే ఇది 22.16 శాతం బలమైన వృద్ధిని కనబరిచిందని ప్రభుత్వం తెలిపింది. అక్టోబర్‌లో వచ్చిన మొత్తం రాబడిలో ఒక్క జీఎస్టీ ద్వారానే రూ.4,590 కోట్లు రాగా, వ్యాట్ రూపంలో రూ.3,065 కోట్లు, ప్రొఫెషనల్ ట్యాక్స్ ద్వారా రూ.80 కోట్లు రాబడి సమకూరింది.
ఏడు నెలల్లో రూ.52,110 కోట్లు.. వార్షిక లక్ష్య సాధన దిశగా వేగంగా అడుగులు:
నడుస్తున్న 2026-27 ఆర్థిక సంవత్సరానికి సంబంధించి ఏప్రిల్ నుంచి అక్టోబర్ వరకు ఏడు నెలల కాలంలో రాష్ట్రానికి పన్నుల రూపంలో మొత్తం రూ.52,110 కోట్ల భారీ ఆదాయం(Telangana Revenue Growth) దక్కింది. గతేడాది ఇదే సమయంలో వచ్చిన రూ.44,598 కోట్లతో పోలిస్తే ఇది 16.85 శాతం అధికం. ఈ ఏడు నెలల్లో జీఎస్టీ ద్వారా వచ్చిన రూ.29,627 కోట్లతో వార్షిక లక్ష్యమైన రూ.52,490 కోట్లలో 56.44 శాతం పూర్తయింది. అలాగే వ్యాట్, సేల్స్ ట్యాక్స్ ద్వారా సమకూరిన రూ.21,893 కోట్లతో వార్షిక లక్ష్యం రూ.38,106 కోట్లలో 57.45 % శాతాన్ని రాబట్టడం విశేషం.
ఆర్థిక పరిస్థితికి ఊతం.. రాబోయే 5 నెలల వసూళ్లు రాష్ట్ర బడ్జెట్‌కు ఎంతో కీలకం:
వాణిజ్య పన్నుల శాఖ సాధిస్తున్న ఈ వేగవంతమైన రాబడి వృద్ధి రాష్ట్ర ఆర్థిక వ్యవస్థకు గొప్ప ఊరటనిస్తోందని ప్రభుత్వ వర్గాలు హర్షం వ్యక్తం చేస్తున్నాయి. మిగిలిన 5 నెలల కాలంలో కూడా ఇదే తీరులో పన్నుల వసూళ్లు కొనసాగితే 2026–27 వార్షిక బడ్జెట్‌లో నిర్దేశించుకున్న నిర్దిష్ట ఆదాయ లక్ష్యాలను సులభంగా చేరుకుంటామని అధికారులు ధీమా వ్యక్తం చేస్తున్నారు. సంక్షేమ పథకాలు, మౌలిక వసతుల కల్పనకు ఈ భారీ ఆదాయం ఎంతో కీలకంగా మారనుంది.