Aram Ghar Chourasta
MGBS-Aramghar : హైదరాబాద్ పాతబస్తీలోని బహుదూర్‌పురా వద్ద మల్టీ లెవల్ ఫ్లైఓవర్ నిర్మాణ పనులు కారణంగా ఎంజీబీఎస్ నుంచి ఆరాంఘర్ వైపు వెళ్లే రహదారిలో ట్రాఫిక్ ఆంక్షలు అమలు చేస్తున్నారు. సోమవారం నవంబర్ 15 నుంచి దాదాపు మూడు నెలలపాటు అంటే వచ్చే ఏడాది (2022) ఫిబ్రవరి 15వ తేదీ వరకు ఈ ఆంక్షలు అమలులో ఉంటాయి.
ఈమార్గంలో నడిచే వాహనాలను తొంబై రోజుల పాటు దారి మళ్లిస్తారు. కేవలం భారీ వాహనాలను మాత్రమే అనుమతించడం లేదని…లైట్‌ మోటార్‌ వెహికిల్స్‌ను యధావిధిగా అనుమతించనున్నామని పోలీసు అధికారులు తెలిపారు.
పోలీసుల అధికారులు తెలిపిన వివరాల ప్రకారం …ఆరాంఘర్ చౌరస్తా నుంచి బహదూర్‌పురా ద్వారా పురానాపూల్‌ చేరుకునే భారీ వాహనాలను దారి మళ్లించనున్నారు. బెంగుళూర్‌ హై వే కావడంతో ఈ రోడ్డులో టీఎస్‌ఆర్టీసీ బస్సులతో పాటు ఏపీఎస్‌ఆర్టీసీ, కేఎస్‌ ఆర్టీసీ బస్సులు రాకపోకలు సాగిస్తుంటాయి. వీటికి తోడు ప్రైవేట్‌ ట్రావెల్స్‌ బస్సులు, లారీలు ఇతర భారీ వాహనాలు నడుస్తుంటాయి.
భారీ వాహనాలు బహదూర్‌పురా చౌరస్తా మీదుగా కాకుండా మైలార్‌దేవ్‌పల్లి, బండ్లగూడ, మహబూబ్‌నగర్‌ క్రాస్‌ రోడ్డు, చాంద్రాయణగుట్ట, డీఎంఆర్‌ఎల్, మిధాని, ఐ.ఎస్‌.సదన్, సైదాబాద్, చంచల్‌గూడ ద్వారా నల్గొండ క్రాస్‌ రోడ్డుకు చేరుకునేలా సంబంధిత అధికారులు ఏర్పాట్లు చేస్తున్నారు.
కార్లు, ఆటోలు, ద్విచక్ర వాహనాలు ఎప్పటి లాగే పురానాపూల్‌ నుంచి ఆరాంఘర్ చేరుకోవచ్చని పోలీసులు తెలిపారు. పాతబస్తీతో పాటు నగరంలోని ఇతర ప్రాంతాల నుంచి భారీ వాహనాలు ఆరాంఘర్ వెళ్లడానికి రెండు ప్రత్యామ్నాయ మార్గాలను పోలీసులు సూచించారు.
Also Read : Golden Mask : ఈ బంగారం మాస్క్ ఖరీదు రూ.5.70 లక్షలు
ఆయా వాహనాలు దారుషిపా, పురానీహవేలీ, బీబీబజార్‌ చౌరస్తా,షంషీర్‌గంజ్,ఫలక్‌నుమా రైల్వే ఓవర్‌ బ్రిడ్జి,చాంద్రాయణగుట్ట చౌరస్తా ద్వారా ఆరాంఘర్ చేరుకోవడానికి వీలుంటుందన్నారు. మరో మార్గమైన నల్లొండ క్రాస్‌ రోడ్డు ద్వారా ఆరాంఘర్ వెళ్లాల్సి ఉంటుందంటున్నారు.
ఇప్పటికే హైదరాబాద్ పోలీసు కమిషనరేట్‌ పరిధిలోని పురానాపూల్‌ నుంచి ఆరాంఘర్ వరకు భారీ వాహనాల రాకపోకలపై ఆంక్షలను విధిస్తూ పోలీసులు ఆదేశాలు జారీ చేశారు. మొత్తంగా అటు సైబరాబాద్‌ కమిషనరేట్‌ పరిధి లోని ట్రాఫిక్ డీసీపీ… ఇటు హైదరాబాద్ కమిషనరేట్‌ పరిధిలోని ట్రాఫిక్ డీసీపీ భారీ వాహనాలపై ట్రాఫిక్ ఆంక్షలను కొనసాగించనున్నారు.
