PM Modi Amaravati Tour
PM Modi: ప్రధాని నరేంద్ర మోదీ మే2 (శుక్రవారం) న ఏపీ రాజధాని అమరావతిలో పర్యటించనున్నారు. మధ్యాహ్నం 3.25గంటలకు ప్రధాని సచివాలయం హెలిప్యాడ్ కు చేరుకుంటారు. అమరావతిలో రాజధాని నిర్మాణ పనులు పున: ప్రారంభిస్తారు. రాజధాని ప్రాజెక్టులతోపాటు పెద్దెత్తున కేంద్ర ప్రాజెక్టులకు ప్రధాని నరేంద్రమోదీ వర్చువల్ గా శంకుస్థాపనలు, ప్రారంభోత్సవాలు చేస్తారు. అనంతరం అమరావతిలో జరిగే బహిరంగసభలో పాల్గొని ప్రధాని ప్రసంగిస్తారు. బహిరంగ సభకు భారీగా ప్రజలను తరలించేందుకు కూటమి నేతలు ఏర్పాట్లు చేస్తున్నారు.
ప్రధాని మోదీ శంకుస్థాపనలు, ప్రారంభోత్సవాల వివరాలు..
♦ ప్రధాని నరేంద్ర మోదీ రాజధాని అమరావతిలో చేపట్టే రూ. 49,040 కోట్ల పనులకు శంకుస్థాపనలు చేస్తారు.
♦ శాశ్వత హైకోర్టు, సెక్రటేరియట్, అసెంబ్లీ భవనాలతోపాటు న్యాయమూర్తుల నివాస సముదాయాలకు శంకుస్థాపన చేస్తారు.
♦ ఎమ్మెల్యేలు, మంత్రులు, ఆలిండియా సర్వీసెస్ అధికారుల గృహ సముదాయం నిర్మాణాలకు శంకుస్థాపన చేస్తారు.
♦ రాజధాని ప్రాజెక్టులతోపాటు పెద్దఎత్తున కేంద్ర ప్రాజెక్టులకు ప్రధాని నరేంద్రమోదీ శంకుస్థాపనలు, ప్రారంభోత్సవాలు చేస్తారు.
♦ డీఆర్డీఓ, డీపీఐఐటీ, రైల్వేస్, NHAIకు సంబంధించిన రూ.57,962 కోట్ల ప్రాజెక్టులకు శంకుస్థాపనలు, ప్రారంభోత్సవాలు చేస్తారు.
♦ నాగాయలంకలో దాదాపు రూ.1,500 కోట్లతో నిర్మించే మిసైల్ టెస్ట్ రేంజ్ కు, అదేవిధంగా వైజాగ్ లో కేంద్ర ప్రభుత్వం నిర్మించే యూనిటీ మాల్ కు ప్రధాని మోదీ శంకుస్థాపన చేస్తారు.
♦ రూ.293 కోట్లతో గుంతకల్ వెస్ట్ నుంచి మల్లప్ప గేట్ వరకు చేపట్టిన రైల్వే ప్రాజెక్టుకు, మరో రూ. 3,176 కోట్ల విలువైన నేషనల్ హైవే ప్రాజెక్టులకు కూడా అమరావతి వేదికగా వర్చ్యువల్ పద్దతిలో మోదీ శంకుస్థాపనలు చేస్తారు.
♦ రూ.3680 కోట్ల విలువైన పలు నేషనల్ హైవే పనులను ప్రధాని మోదీ ప్రారంభిస్తారు.
♦ రూ.254 కోట్లతో పూర్తి చేసిన ఖాజీపేట – విజయవాడ 3వ లైన్, గుంటూరు గుంతకల్ డబ్లింగ్ ప్రాజెక్టులో భాగంగా చేపట్టిన బుగ్గనపల్లి, కెయిఎఫ్ పాణ్యం లైన్ లను ప్రధాని మోదీ ప్రారంభిస్తారు.
