Uttar Pradesh Shocker: ఉత్తర ప్రదేశ్‌లో దారుణం జరిగింది. పాస్‌పోర్ట్ సైజ్ ఫొటో కోసం స్టూడియోకు వెళ్లిన ఒక అమ్మాయిపై ఫొటోగ్రాఫర్ అసభ్యంగా ప్రవర్తించాడు. ఆమెపై లైంగిక దాడి చేసేందుకు యత్నించాడు. ఈ ఘటన ఉత్తర ప్రదేశ్ రాజధాని లక్నోలో జరిగింది.
పోలీసులు తెలిపిన వివరాల ప్రకారం.. 18 ఏళ్ల యువతి స్థానికంగా ఉన్న ఫొటో స్డూడియోకు వెళ్లింది. అక్కడ తనకు పాస్‌పోర్ట్ సైజ్ ఫొటోలు తీయాలని ఫొటోగ్రాఫర్‌ను కోరింది. ఈ సమయంలో అక్కడ ఫొటోగ్రాఫర్, ఆ యువతి తప్ప ఎవరూ లేరు. ఫొటోగ్రాఫర్ సూచన మేరకు యువతి స్టూడియో రూమ్‌లో కూర్చుంది. ఫొటో తీయడానికి వచ్చిన కెమెరామెన్, ఆ అమ్మాయిని డ్రెస్ సర్దుకోమని చెప్పాడు. అతడు చెప్పినట్లుగానే ఆ అమ్మాయి డ్రెస్ సర్దుకుంది. కానీ, ఆ ఫొటోగ్రాఫర్ ఆ యువతి దగ్గరికి వచ్చి తనే డ్రెస్ సర్దేందుకు ప్రయత్నించాడు. ఈ క్రమంలో ఆమె ఒంటిని తాకుతూ అసభ్యంగా ప్రవర్తించాడు. లైంగిక దాడికి యత్నించాడు.
IND vs AUS: నేడు ఆస్ట్రేలియాతో భారత్ రెండో టీ20.. సిరీస్ గెలవాలంటే నెగ్గాల్సిందే
దీంతో వెంటనే ఆ అమ్మాయి అతడ్ని నెట్టేసి, స్డూడియో నుంచి బయటకు పరుగెత్తుకుంటూ వచ్చింది. తర్వాత అతడు ఆమెను బెదిరించాడు. ఈ ఘటన విషయం ఎవరికైనా చెబితే చంపేస్తానని బెదిరించాడు. దీనిపై బాధితురాలు స్థానిక పోలీసులకు ఫిర్యాదు చేసింది. కేసు నమోదు చేసుకున్న పోలీసులు నిందితుడి కోసం గాలిస్తున్నారు. ప్రస్తుతం నిందితుడు పరారీలో ఉన్నాడు. అతడిని మహేంద్ర జైశ్వాల్‌గా గుర్తించారు.
