Tirupati Case : తిరుపతి జంట హత్యల మిస్టరీ ఛేదించిన పోలీసులు.. పగతోనే ఘాతుకం!
Tirupati Case : తిరుపతి జంట హత్యల కేసు మిస్టరీని పోలీసులు ఛేదించారు. కుటుంబ వివాదాల్లో పాత కక్షలే కారణమని తేల్చేశారు. పగతోనే ఇద్దరి ప్రాణాలను బలిగొన్న నిందితులను పోలీసులు అరెస్ట్ చేశారు.
- Published By: Sreehari A , Published On : July 10, 2026 / 07:36 PM IST
Tirupati Twin Case Solved ( Image Credit to Original Source )
- తిరుపతిలో జంట హత్యల కేసు సంచలనం
- సునీల్ భార్యతో గొడవలు.. 10 నెలలుగా దూరం
- కుటుంబ గొడవల్లో జోక్యం చేసుకున్న మునిరత్నం
- ఊరి పెద్దమనిషిగా మందలింపు.. ఆగ్రహంతో హత్య
Tirupati Case : తిరుపతిలో సంచలనం సృష్టించిన జంట హత్యల కేసును పోలీసులు ఛేదించారు. కుటుంబ వివాదాలు, పాత కక్షలు, ఆగ్రహంతో ఇద్దరి ప్రాణాలను బలిగొన్న ఈ ఘటనలో ముగ్గురు ప్రధాన నిందితులను పోలీసులు అరెస్ట్ చేశారు. అదనపు ఎస్పీ రవి మనోహరాచారి కేసు వివరాలను వెల్లడించారు.
భార్యాభర్తల వివాదంతో విభేదాలు :
జంగాలపల్లి గ్రామానికి చెందిన సునీల్కు తన భార్యతో విభేదాలు ఉన్నాయి. ఈ వివాదాల కారణంగా గత 10 నెలలుగా సునీల్ తన భార్యకు దూరంగా ఉంటున్నాడు. భార్యాభర్తల మధ్య సమస్యలు ఇరు కుటుంబాల మధ్య కూడా ఘర్షణలకు దారితీశాయి. తరచూ గొడవలు, కేసుల నేపథ్యంలో సునీల్ కుటుంబం గ్రామాన్ని విడిచి వెళ్లిపోయింది. అయితే ఈ కుటుంబ వివాదాల్లో గ్రామ పెద్దగా వ్యవహరించిన మునిరత్నం కీలక పాత్ర పోషించాడు.
మునిరత్నంపై కక్షతోనే హత్య :
భార్యతో గొడవలకు సంబంధించి మునిరత్నం గతంలో కూడా చాలాసార్లు సునీల్ను ప్రశ్నించాడు. కుటుంబ సమస్యలను పరిష్కరించుకోవాలని సునీల్ను మందలించాడు. అయితే, ఇదే సునీల్ కుటుంబంలో ఆగ్రహానికి కారణమైంది. తమ కుటుంబ వ్యవహారాల్లో తరచూ జోక్యం చేసుకోవడంపై సునీల్ కుటుంబం మునిరత్నంపై కక్ష పెంచుకున్నట్లు పోలీసులు విచారణలో గుర్తించారు.
వివాహ వేడుకలో ఘర్షణే కారణం :
వివాహ వేడుకకు వెళ్లగా సునీల్ను తన భార్యతో ఉన్న వివాదాలపై మునిరత్నం, మరో స్నేహితుడు మణికంఠ సూటిగా ప్రశ్నించారు. మీ కుటుంబ సమస్యలను మీరే పరిష్కరించుకోవాలని సూచించారు. అయితే, అప్పటికే ఆగ్రహంతో ఊగిపోతున్న సునీల్ కుటుంబీకులు ఎదురు తిరిగి మునిరత్నం, మణికంఠలపై దాడి చేశారు.
అప్పటికే తెచ్చుకున్న కత్తులతో ఇద్దరిపై దాడి చేసినట్లు పోలీసులు తెలిపారు. అయితే, కత్తుల దాడిలో మునిరత్నం అక్కడికక్కడే ప్రాణాలు కోల్పోయాడు. తీవ్రంగా గాయపడిన మణికంఠను ఆసుపత్రికి తరలించినా చికిత్స పొందుతూ మృతిచెందాడు. ఘటనపై దర్యాప్తు చేపట్టిన పోలీసులు నిందితుల కదలికలు, ఆధారాలను పరిశీలించి కేసును ఛేదించారు.
ముగ్గురు అరెస్ట్.. :
ఈ జంట హత్యల కేసులో ప్రధాన నిందితులైన తండ్రి వాసు, కుమారులు సునీల్, ఉపేంద్రలను పోలీసులు అరెస్ట్ చేశారు. తిరుపతిలో సంచలనం సృష్టించిన ఈ ఘటనలో పోలీసులు వేగంగా కేసును ఛేదించి నిందితులను పట్టుకున్నారు.
