SSC MTS Notification 2025: పదో తరగతి పాసయ్యారా? 11,908 కేంద్ర ప్రభుత్వ ఉద్యోగాలకు బంపర్ రిక్రూట్‌మెంట్!

SSC MTS Notification 2025 Released

నిరుద్యోగులకు శుభవార్త. స్టాఫ్ సెలెక్షన్ కమిషన్ (SSC) భారీ నోటిఫికేషన్‌ను విడుదల చేసింది. పదో తరగతి అర్హతతో కేంద్ర ప్రభుత్వ శాఖల్లో స్థిరపడాలనుకునే వారికి అవకాశాన్ని కల్పించనుంది. ఈ నోటిఫికేషన్ ద్వారా మొత్తం 11,908 మల్టీ టాస్కింగ్ స్టాఫ్ (MTS), హవల్దార్ పోస్టులను భర్తీ చేయనున్నారు. ఆసక్తిగల అభ్యర్థులు జూలై 24, 2025 లోపు అధికారిక వెబ్ సైట్ ssc.gov.in ద్వారా దరఖాస్తు చేసుకోవచ్చు.

విభాగాల వారీగా పోస్టుల సంఖ్య

• మల్టీ టాస్కింగ్ స్టాఫ్ (MTS): 10,210
• హవల్దార్ (CBIC & CBN): 1,698

ఎవరు దరఖాస్తు చేసుకోవచ్చు?

విద్యార్హత: గుర్తింపు పొందిన బోర్డు నుండి కనీసం పదో తరగతి/ తత్సమాన పరీక్షలో ఉత్తీర్ణత సాధించి ఉండాలి.

వయోపరిమితి: MTS, హవల్దార్ (CBN) పోస్టులకు దరఖాస్తు చేసుకునే అభ్యర్థుల వయసు 18 నుంచి 25 సంవత్సరాల మధ్యలో ఉండాలి. హవల్దార్ (CBIC) పోస్టులకు దరఖాస్తు చేసుకునే అభ్యర్థుల వయసు 18 నుంచి 27 సంవత్సరాల మధ్యలో ఉండాలి. ప్రభుత్వ నిబంధనల ప్రకారం SC/ST, OBC అభ్యర్థులకు వయోపరిమితి సడలింపు ఉంటుంది.

ఎంపిక ప్రక్రియ: అభ్యర్థుల ఎంపిక రెండు దశల్లో జరుగుతుంది. పేపర్-1 (కంప్యూటర్ బేస్డ్ టెస్ట్), పేపర్-2 (డెస్క్రిప్టివ్) ఉంటుంది. హవల్దార్ పోస్టులకు దరఖాస్తు చేసుకున్న అభ్యర్థులు శారీరక దారుఢ్య పరీక్షలలో ఉత్తీర్ణత సాధించాల్సి ఉంటుంది.

ఆన్‌లైన్‌లో దరఖాస్తు చేయడం ఎలా?

• ముందుగా అధికారిక వెబ్‌సైట్‌ ssc.gov.in లోకి వెళ్ళాలి.
• కొత్త యూజర్ అయితే ‘New User? Register Now’ ఆప్షన్ పై క్లిక్ చేయాలి.
• ప్రాథమిక వివరాలతో రిజిస్ట్రేషన్ పూర్తి చేయాలి.
• ఇప్పుడు మీ రిజిస్ట్రేషన్ నంబర్, పాస్‌వర్డ్‌తో లాగిన్ అవ్వాలి.
• తరువాత లేటెస్ట్ నోటిఫికేషన్స్ టాబ్ లో Multi-Tasking (Non-Technical) Staff, and Havaldar Examination, 2025′ లింక్‌పై క్లిక్ చేయాలి.
• తరువాత Apply బటన్ పై క్లిక్ చేయాలి.
• వ్యక్తిగత, విద్యార్హత వివరాలను జాగ్రత్తగా ఎంటర్ చేయాలి.
• సూచించిన ఫార్మాట్ లో ఫొటో, డిజిటల్ సంతకాన్ని అప్‌లోడ్ చేయాలి.
• ఆన్‌లైన్ లేదా ఆఫ్‌లైన్ ద్వారా ఫీజు చెల్లించాలి.
• తరువాత సబ్మిట్ బటన్ పై క్లిక్ చేయాలి.

ముఖ్యమైన తేదీలు:

• జూన్ 26, 2025న నోటిఫికేషన్ విడుదల
• జూన్ 26, 2025 నుంచి దరఖాస్తుల ప్రారంభం
• జూలై 24 దరఖాస్తుకు చివరి తేదీ
• సెప్టెంబర్ 20 నుండి అక్టోబర్ 24, 2025 వరకు పరీక్షలు (పేపర్-1) జరుగుతాయి.