Assembly Elections 2023: మరో వారం రోజులే ప్రచారానికి సమయం ఉండడంతో మధ్యప్రదేశ్‌లో ఎన్నికల ప్రచారం తారాస్థాయికి చేరుకుంది. రాష్ట్రంలో అధికారాన్ని కైవసం చేసుకునేందుకు బీజేపీ, కాంగ్రెస్‌లు ఏ అవకాశాన్ని వదలడం లేదు. ఇక ఈ ఎన్నికలపై సర్వేలు ఒక్కో రోజు ఒక్కోలా చెబుతున్నాయి. కొన్నిసార్లు ప్రభుత్వాన్ని కాంగ్రెస్ పార్టీ ఏర్పాటు చేస్తుందని, మరొకరోజు బీజేపీ ఏర్పాటు చేస్తుందని ఎవరికి వారే చెబుతున్నారు. బెట్టింగ్ మార్కెట్‌లోనూ ఇరువర్గాల ధరలు స్టాక్‌ మార్కెట్‌ మాదిరిగానే హెచ్చుతగ్గులకు గురవుతున్నాయి.
రాష్ట్రంలో ప్రధాన పోటీ కాంగ్రెస్, బీజేపీ మధ్యే ఉన్నప్పటికీ.. కొన్ని స్థానాల్లో ముక్కోణపు పోటీ నెలకొంది. అయితే ఈ స్థానాలే రాష్ట్ర భవిష్యత్తుని నిర్ణయిస్తాయని అంటున్నారు. దాదాపు 25 స్థానాల్లో బీజేపీ, కాంగ్రెస్ లను ఎస్పీ, బీఎస్పీ, ఆమ్ ఆద్మీ పార్టీ అభ్యర్థులు ఇబ్బందులకు గురి చేస్తున్నారు. రాష్ట్రంలో ప్రభుత్వాన్ని ఏర్పాటు చేసేందుకు కావాల్సిన మెజారిటికీ ఈ స్థానాలే కీలకం కానున్నట్లు విశ్లేషణలు వస్తున్నాయి. ఇదొకటైతే.. కాంగ్రెస్, బీజేపీ పార్టీల్లో టికెట్లు రాని వారే ఇతర పార్టీల నుంచి పోటీ చేస్తూ ఆ రెండు పార్టీలను మరింత ఇబ్బందికి గురి చేస్తున్నారు.
ఇది కూడా చదవండి: విమానంలో నిద్రిస్తున్న మహిళ ప్రైవేట్ భాగాల్ని తాకిన వ్యక్తి.. తర్వాత ఏం జరిగిందంటే?
నర్మదాపురం జిల్లా హోషంగాబాద్ అసెంబ్లీ నియోజకవర్గంలో బీజేపీ మాజీ అసెంబ్లీ స్పీకర్ డాక్టర్ సీతాశరణ్ శర్మను పోటీకి దించగా, కాంగ్రెస్ ఆయన అన్నయ్య అయిన గిరిజాశంకర్ శర్మను పోటీకి దింపింది. బీజేపీ అసమ్మతివాదులు పార్టీ సీనియర్ కార్యకర్త భగవతి చౌరేను రంగంలోకి దించారు. గుణ జిల్లాలోని చచోడా సీటులో కూడా ఇదే ఆసక్తికర పోటీ కనిపిస్తోంది. ఇక్కడ బీజేపీ నుంచి ప్రియాంక మీనాకు టికెట్ ఇవ్వడంతో మమతా మీనాకు కోపం వచ్చింది. మీనా ఆప్ టిక్కెట్‌పై పోటీ చేశారు. మరోవైపు కాంగ్రెస్ ఎమ్మెల్యే లక్ష్మణ్ సింగ్ మళ్లీ ఎన్నికల బరిలో నిలిచారు.
ఇండోర్ జిల్లాలోని డాక్టర్ అంబేద్కర్ నగర్ మోవ్ అసెంబ్లీ నియోజకవర్గంలో బీజేపీ అభ్యర్థిగా మంత్రి ఉషా ఠాకూర్, కాంగ్రెస్ నుంచి రామ్ కిషోర్ శుక్లా పోటీ చేస్తున్నారు. కాంగ్రెస్ మాజీ ఎమ్మెల్యే అంతర్ సింగ్ దర్బార్ స్వతంత్ర అభ్యర్థిగా పోటీ చేస్తున్నారు. కాగా ధార్ అసెంబ్లీ నియోజకవర్గంలో బీజేపీ-కాంగ్రెస్ రెబల్స్ రంగంలోకి దిగారు. బీజేపీ జిల్లా మాజీ అధ్యక్షుడు రాజీవ్ యాదవ్ స్వతంత్ర అభ్యర్థిగా పోటీ చేస్తున్నారు. ఎమ్మెల్యే నీనా వర్మపై మాత్రమే బీజేపీ విశ్వాసం వ్యక్తం చేసింది. కాంగ్రెస్ రాష్ట్ర ప్రధాన కార్యదర్శి కులదీప్ సింగ్ బుందేలా స్వతంత్ర అభ్యర్థిగా ప్రభా గౌతమ్‌ను అభ్యర్థిగా నిలబెట్టింది.
ఇది కూడా చదవండి: రద్దీగా ఉన్న రైలులో యువతి డ్యాన్స్.. ఈ ట్రెండ్ ఆపండి అంటూ నెటిజన్లు ఫైర్
బుర్హాన్‌పూర్ అసెంబ్లీ నియోజకవర్గంలో మాజీ మంత్రి అర్చన చిట్నీస్‌కు టికెట్ ఇవ్వడాన్ని నిరసిస్తూ, బీజేపీ మాజీ రాష్ట్ర అధ్యక్షుడు నందకుమార్ సింగ్ చౌహాన్ కుమారుడు హర్షవర్ధన్ సింగ్ చౌహాన్ స్వతంత్ర అభ్యర్థిగా పోటీ చేస్తున్నారు. కాంగ్రెస్ ఎమ్మెల్యే సురేంద్ర సింగ్ షేరాను అభ్యర్థిగా నిలిపింది. ఇక వింధ్య ప్రాంతంలో కూడా ఇలాంటి పరిస్థితులే కనిపిస్తున్నాయి. వింధ్య ప్రాంతంలోని సిద్ధి స్థానానికి చెందిన ఎమ్మెల్యే కేదార్‌నాథ్ శుక్లా బీజేపీ నుంచి టిక్కెట్టు తెగిపోవడంతో స్వతంత్ర అభ్యర్థిగా పోటీ చేస్తున్నారు. ఆయన బీజేపీ అభ్యర్థి రీతీ పాఠక్‌, కాంగ్రెస్ అభ్యర్థి జ్ఞాన్‌సింగ్‌లకు సవాల్‌ విసురుతున్నారు.
