MEA in Qatar: ఖతార్‌లో మరణశిక్ష విధించబడిన 8 మంది భారత మాజీ సైనికుల్ని మరోసారి కలుసుకున్న భారత రాయబారి
ఖతార్‌లోని కోర్టు ఇటీవల ఎనిమిది మందికి మరణశిక్ష విధించింది. ఇది జరిగిన తర్వాత కూడా భారత విదేశాంగ మంత్రిత్వ శాఖ ఈ నిర్ణయంతో దిగ్భ్రాంతికి లోనయ్యామని పేర్కొంది.
- Published By: 10TV Digital Team ,Published On : December 7, 2023 / 08:09 PM IST
ఖతార్‌లో మరణశిక్ష విధించబడిన 8 మంది మాజీ నావికాదళ సిబ్బంది కేసుపై భారత ప్రభుత్వం నిఘా ఉంచిందని విదేశాంగ మంత్రిత్వ శాఖ గురువారం తెలిపింది. ఉరి శిక్ష విధించబడిన 8 మందిని భారత రాయబారి తాజాగా మరోసారి కలిశారు. అలాగే, అప్పీల్ విషయమై కోర్టులో ఇప్పటివరకు రెండు సార్లు విచారణ జరిగింది.
ఈ విషయమై విదేశాంగ మంత్రిత్వ శాఖ ప్రతినిధి అరిందమ్ బాగ్చి మాట్లాడుతూ.. “ఖతార్‌లో ఎనిమిది మంది మాజీ మెరైన్‌లకు మరణశిక్ష విధించిన కేసులో మా అప్పీల్‌పై రెండు విచారణలు జరిగాయి. మేము ఈ విషయంపై నిఘా ఉంచాము. అన్ని రకాల న్యాయ సహాయం అందిస్తున్నాము. ఆదివారం (డిసెంబర్ 3) జైలులో ఉన్న ఎనిమిది మందిని కలవడానికి మా రాయబారి కాన్సులర్ యాక్సెస్ పొందారు. ఇది సున్నితమైన విషయం. అయితే మేము చేయగలిగినదంతా చేస్తాము’’ అని అన్నారు.
ఈ సమయంలో సీఓపీ 28 సందర్భంగా ప్రధాని నరేంద్ర మోదీ ఖతార్ ఎమిర్ షేక్ తమీమ్ బిన్ హమద్ అల్ థానీని కలిశారని బాగ్చీ చెప్పారు. ఇందులో రెండు దేశాల మధ్య ద్వైపాక్షిక సంబంధాలు, ఖతార్‌లో నివసిస్తున్న భారతీయుల సంక్షేమంపై ప్రధాని మోదీ, బిన్ హమద్ అల్ థానీ మధ్య చర్చ జరిగింది. అయితే, ప్రధాని మోదీ, హమద్ అల్-తానీ ఏం మాట్లాడుకున్నారో బాగ్చీ చెప్పలేదు. 8 మంది మాజీ మెరైన్‌లకు మరణశిక్ష విధించిన అంశాన్ని థానీకి ముందే ప్రధాని మోదీ లేవనెత్తారని భావిస్తున్నారు.
వాస్తవానికి, ఖతార్‌లోని కోర్టు ఇటీవల ఎనిమిది మందికి మరణశిక్ష విధించింది. ఇది జరిగిన తర్వాత కూడా భారత విదేశాంగ మంత్రిత్వ శాఖ ఈ నిర్ణయంతో దిగ్భ్రాంతికి లోనయ్యామని పేర్కొంది. దీనికి సంబంధించిన అన్ని చట్టపరమైన అంశాలను వెతికి, వారిని స్వదేశానికి తిరిగి రావడానికి భారత ప్రభుత్వం నిరంతరం ప్రయత్నాలు చేస్తోంది. ఖతార్‌లోని అల్ దహ్రా కంపెనీలో పనిచేసిన ఎనిమిది మంది మాజీ మెరైన్‌లకు గూఢచర్యం కేసులో మరణశిక్ష విధించినట్లు భావిస్తున్నారు. అయితే ఈ ఆరోపణలపై ఖతార్ అధికారికంగా ఏమీ చెప్పలేదు.
